Le Ménage ès Feuvres,
St. Ouën.

Lé 16 d'août, 1975.

Moussieu l'Rédacteu,

Eh bein, m'èrvélà r'vénu d'Nouormandie. Lundi pâssé j'tais acouo là, et en moto auve l'Abbé Le Légard dé l'Abbaye d'La Lucerne j'allis à Cherbourg vais si l'estatue d'Napoléon à j'va 'tait acouo sus la cauchie auve le fanmeux dgèrryi pointant en direction d'l'Angliétèrre atout san preunmié dé. Oui dgia, oulle est acouo là, et Napoléon n'a pon pus d'chance d'envahi l'Angliétèrre au jour d'aniet tch'i' n'avait y'a quâsi deux chents ans!

J'vis l'estatue en 1909 ou 1910 pour la preunmié fais quand j'fis un tou d'la côte du Cotentin en bicyclette auve l'Avocat Edmund Toulmin Nicolle. J'y'allînmes par baté d'Gouôrray à Carteret, et j'mé sis tréjous r'souv'nu qué nouot' preunmié arrêt fut dans eune pétite ville appelée Les Pieux et qué ch'tait là qué j'mangis ma preunmié omelette. Et quand j'èrvînmes à Carteret au but d'nouot' touannée j'y trouvînmes lé Juge Alfred Messervy, l'fanmeux matématicien tch'avait fait les cartchuls dé rente qué nou vait dans l's almonas des Chroniques du temps pâssé. I' nouos învitit à dîner auve li à s'n hôtel dévant nouos rembèrtchi à bord du baté pour lé viage d'èrtou à Gouôrray.

L'Avocat Nicolle, Ségrétaithe dé La Société Jersiaise dans chu temps-là, 'tait un mangnifique compangnon dé viage, et ch'tait un grand honneu pour mé d'aver 'té învité à aller en Nouormandie auve li quand nou pense qué j'avais acouo les talons jaunes dans chu temps-là. Il 'tait un fanmeux archéologue, et ch'tait eune êducâtion dé l'ouï distchuter l's âges ou êpoques dé construction des vielles églyises des villages auve les tchuthés. Et il 'tait si charmant qué touos les tchuthés li faîsaient la beinv'nue.

Pus tard, dans l'temps qué j'tais Commis-Vicomte, l'Avocat Nicolle avait loué la tour sus l'île au Guerdain, et j'allais là auve li à mé bâsse, et eune fais la mé haute j'faîsions l'tou d'l'îlot à la nage et pis j'restions là, sans doute, jusqu'au r'tchiyant d'la mathée.

Un tas dg'ieau a pâssé par La Corbiéthe dépis ches bieaux jours-là, et la trantchilité d'la Baie du Portelet a 'té rempliaichie par lé catchet des touristes tchi l'ont envahie. Un Angliais mé d'mandit l'année pâssée s'i' y'avait un nommé Janvrîn d'entèrré la viyant qu' l'ile avait nom Janvrin's Tomb. I' n'savait pon, sans doute, qué san vrais nom 'té l'île au Guerdain. Et quand j'veins à y penser, y'a probabliément un tas d'jannes Jèrriais tchi n'lé savent pon n'tout, et pour ramémouaither un mio des dêtails ès cheins tchi l's ont oubliés, i' vaut la peine d'èrcorder qué l'Cap'taine Philippe Janvrîn, èrvénant d'Nantes dans san navithe et oblyigi d'faithe quarantaine dans l'havre d'La Belle Croute, mouothit à bord lé 25 dé septembre, 1721, à l'âge dé quarante-quatre ans. I' fut entèrré sus l'île au Guerdain lé 27 du mème mais viyant tch'i' v'nait d'France, où'est tch'i' y'avait la peste dans l'temps, et qué l'Gouvèrneux et les Mêssieux d'Justice ordonnîdrent tch'i' fûsse entèrré sus eune ile dont la mer fait le tour. Mais tchiques sémaines pus tard, sa veuve, née Elizabeth Orange, dé St. Brélade, eut pèrmission d'faithe transféther l'corps du Cap'taine dans l'chînm'thièthe pârouaîssial dé sa pâraisse.

En r'vénant d'Nouormandie l'aut' jour, la preunmié chose qué jé d'mandis 'tait! Tch'est tch'a gângni l'êlection pour Sénateu? Eh bein, i' faut féliciter l'Sieur Morvan pour aver changi san d'mié-bas chapé dé Député pour lé bill-tappeur dé Sénateu, et li souhaiter bouanne chance. En mème temps i' faut faithe ses condoléances ès pèrdants. Mais ch'est honteux d'vaie tch'i' lus mains qué l'quart des êlecteurs tchi prîndrent la peine dé voter pour Sénateu.

Lé privilège dé voter est précieux, viyant qué v'la tchi donne eune vouaix pèrsonnelle dans l'gouvèrnément d'l'Île au chein tchi vote. Mais quand jé l'disais à un homme l'aut' jour i' m'dit: Tch'est qu' nou gângne dé voter? Touos les candidats font des promêsses tch'i' n'gardent janmais eune fais tch'i' sont êlus! Ch'est eune pèrte d'temps, d'aller voter.

Eh bein, j'lî dis, ch'est vrai qué chose promînse est deue, comme nouos l'dit l'vièr diton. Mais ch'est bein pus aîsi d'promettre qué d'faithe.

P't-êt' bein, i' m'dît, mais nou-s-éthait pus d'confiance dans un candidat tchi vouos dithait net et cliai: 'Jé n'm'en vais pon êprouver à vouos faithe un tas d'promêsses qué jé n'pouorrais probabliément pon garder, mais jé f'thai d'man mus!'

Véthe dgia, j'lî dis. Ch'tait pûtôt d'mème qué les candidats lus exprînmaient quand j'tais mousse à St. Ouën. Et nou pouvait s'fier d'ssus quand il' 'taient Louothièrs!

George d'La Forge.
 

Viyiz étout: