Le Ménage ès Feuvres,
St. Ouën.
Lé 16 novembre, 1968.
Moussieu l'Rédacteu,
Mé v'là r'vénu d'l'Afrique - et j'm'en r'vais en Améthique! Auprès aver 'té dans la chaleu des pays cauds, j'trouvis hardi fraid en arrivant à Londres. La tempéthatuthe là 'tait d'quarante dégrés. Oulle 'tait 44 dégrés quand j'arrivis en Jèrri. Eune bouanne chose qué j'avais ma grand' câsaque! J'l'avais emportée auve mé en Afrique en cas tch'il éthait tchaie d'la plyie là-bas. J'tchittis Nairobi à 11 heuthes du sé dans l'avion à rêaction des East African Airways et j'arrivînmes à Entebbe dans l'Uganda eune heuthe pus tard. J'tions à Rome à sept neuthes lé matîn, et à Londres à neuv' heuthes.
J'sis r'vénu en temps pour vaie les deux séthées Jèrriaises à l'Eisteddfod, et v'là tch'i' m'fit pliaîsi d'vaie les pièches dé théatre jouées pas les r'présentants des pâraisses dé St. Sauveux, St. Martin et St. Hélyi. I' faut féliciter l'Député Charles Billot pour la manniéthe tch'i' fait - dans sa capacité d'Président d'La Séthée Jèrriaise - la beinv'nue à Moussieu l'Bailli et ès Officièrs d'La Couronne, et à l'audience généralement. Nou peut dithe tch'il a la langue bein pendue! Moussieu Edgar Bétchet, l'Adjudicateur, n'avait pon eune aîsie tâche. À c'menchi, ch'est eune tâche tch'est îngrate - chein tchi fait pliaisi à iun fait l'dêpiet d'l'autre. Et bein souvent les compétiteurs sont si bouans qu'ch'est bein difficule dé jugi tch'est tch'est l'miyeu. Et pis, y'a l'affaithe dé pâraisse : Si l'Adjudicateur donne lé preunmié prix à sa pâraisse, i' couôrre lé risque d'êt' atchûsé d'l'aver favorisée au dêpit d's'autres! J'vouos asseûthe qué ch'est eune tâche qué j'n'aimethais pon, et j'admithe les cheins tch'ont l'couothage dé l'entréprendre. Enfin, i' faut avouer qu'Moussieu Bétchet en fît eune raide bouanne rêussite. J'ouïyais tout l'monde lé dithe en sortant à la fin des deux séthées! Il est si bouan comme Adjudicáteur qué nou dév'thait l'nommer perménant. V'la tchi sauvethait la peine tch'i' y'a tréjous à pèrsuader tchitchun d'consenti a y'être!
Missis Alice Blampied, née Léonard, n'est pus du rang des vivants, et j'avions r'gret dé n'pus ouï san bouan vièr pliat Jèrriais d'St. Ouën en r'citàtion. V'la tchi m'ramémouaithe qué ch'tait tréjous un pliaîsi d'ouï l'défunt Sieur Winter du Tot r'citer étout dans san vivant. Janmais j'n'ai ouï “Lé Vièr Garçon” r'cité aussi bein comme i' pouvait l'faithe!
Quand nou r'veint d'un viage, tchitchun vouos d'mande tréjous s'nou-s-a trouvé des changements en Jèrri dépis qu'nou-s-en 'tait houors. Eh bein, l'miyeu changement qu'j'ai trouvé est tch'i' y'a mains d'motos pas les c'mîns, et qu'ch'est à ch't heu tchiquesfais pôssibl'yes dé stationner dans l'enclios sus la cauchie. Ch'est mangnifique dé pouver cachi dans nouos rues sans s'trouver encafotés par des motos en d'vant et en drièthe dé sé tch'ont l' “H” à côté du nunmétho d'licence. Et pis y'a bein mains d' “Mini-robes” par les c'mîns, et un homme n'a pon bésoin d'êt' tréjous à mett' ses naithes leunettes pour n'aver pon à s'haler la veue dé d'ssus la route l'avant à li!
Y'a acouo des drôles dé pèrrots d'jannes hommes (nou sé d'mande tchiquesfais s'i' sont fille ou garçon!) tchi marchent les rues d'la ville atout des longs j'veux et d'la barbe, et des sales habits. Si j'tais chef d'immigration en Jèrri, j'lus don'nais deux chouaix comme conditions d'atèrri quand il' arrivent d'Angliétèrre - d'aver les j'veux et barbe copés et d'êt' bein scrobés dans un bain dg'ieau caude, ou dé s'laissi êt' embaûchis comme êpeûthas pour êffriter l's ouaîsieaux dans les gardins. À les vaie, nou dithait qu'ch'en est, d's êpeûthas, et jé n'peux pon comprendre comment qu'des jannes filles peuvent lus associer auve ieux! Mais tout est boulevèrsé d'nouos jours. Mème les êtudiants sont à lus r'bînfrer contre l'autorité des professeurs dans l's univèrsités. Nou créthait tch'i' dév'thaient aver l'avis d'êt' heutheux d'pouver aller à l'êcole si longtemps. Quand j'tais mousse, fallait tchitter l'êcole à treize ans et c'menchi à gangni sa vie - à mains qu'nou-s-eûsse des pathents tch'avaient un tas d'hèrpins.
Ch'est vrai qué l's idées changent. Mème dans l's Êtats! J'viyais dans la gâzette qué la tonnelle souos l'Mont d'La Ville s'en va êt' creûsée d'vant longtemps. I' m'sembl'ye qué l's Êtats 'taient contre y'a tchique temps. Et pis y'a p't êt' des chances dé vaie la tour dé La Rocco être èrbâtie à ch't heu - ouaithe qué l's Êtats n'montraient pon fort d'envie d'la vaie r'graie d'vant. Enfîn, ch'est des changements d'mème qué nou-s-aime bein vaie, et tchi font honneu ès Êtats!
Y'a d'aut' changements à tchi nou-s-est dév'nus accouôteunmés - ch'est la bâtithie d'neuves maisons. En allant d'ichîn à l'églyise dé St. George Dînmanche passé, j'viyais qu'eune vielle maison qu'j'avais veue toute ma vie a dispathu complièment d'un jour à l'autre! Oulle 'tait d'l'aut' côté d'la route dé la maison au défunt Mait' Douard Maugi, où'est qu'j'allais à l'êcole y'a septante ans! Et eune neuve est en train d'êt' bâtie. J'mé d'mande souvent où'est tch'i' s'trouve assez d'monde pour démeuther dans les neuves maisons qu'nou vait craître partout comme des champîngnons!
George d'La Forge.
Viyiz étout: