Les Pages Jèrriaises

D'èrtou en Jèrri

Le Ménage ès Feuvres,
St. Ouën.

Lé 24 mai, 1969.


Moussieu l'Rédacteu,

J'y sis r'vénu si souvent dans mes vièrs jours, en Jèrri, qué ch'n'est rêéllement pon rein d'nouvé pour mé dé r'vaie les vièrs accoints, et acouo y'a tchiquechose dé pliaîsant en r'viyant La Corbièthe et La Baie d'St. Ouën quand l'avion pâsse par dessus, et nou r'sent eune mannièthe dé sensâtion d'êt' "Siez nous" quand nou met l'pid à tèrre!

Châque année amène quand-mème des changements, et des pèrtes d'vièrs anmîns. Quand j'mîns l'pid à tèrre chutte fais, j'tais justément en temps pour mé changi et aller à l'entèrrement du Juge Francis Le Boutilyi qué j'avais connu d'pis que j'tions mousses ensembl'yes à St. Ouën. San p'pèe, et l'mein étout, 'taient des vielles réchinnes du Louothi, et nou s'viyait souvent. Un charmant corps, lé Juge, et un fidèle anmîn, et v'là tch'i' m'fait chose dé penser qué jé n'lé r'vèrrai pon dans chutte vie.

I' s'en vont à grands pas, les vièrs anmîns. Y'a eune vîngtaine d'années, j'rencontrais souvent 'Douard et Mary Hamon d'Portînfer, Reuben Thatcher et l'Avocat John Fleury L'Cornu siez-li à Highfield, et j'avions d'bouannes séthées ensembl'yes. I' sont touos hors au r'pos êtèrnel à ch't heu.

J'viyais des changements dans la ville étout quand j'y étais hièr. La Rue d'Drièthe du vièr temps n'est pus la rue d'drièthe, et auve les neuves grand' boutiques d'un côté, ou' pathaît pus comme eune ville du Nouvieau Monde, et oulle a bein gangni san nom modèrne de la rue du rouai!

Ch'tait întérêssant d'vaie l'gros creux tch'est l'c'menchement d'la tonnelle sous L'Mont d'la Ville. V'la tchi m'faîsait penser au vièr nom d'La Folie - La Rocque Creuse - et v'la tchi m'ramémouaithait qué si les rats tch'avaient donné lus nom - Le Coin ès Rats - à la vielle cauchie pouvaient r'vénîn, il' adoptéthaient probabliément chu gros creux-là pour lé leu à la pliaiche dé rester dans lus vièr accoint!

Et tchi grand balivèrne d'bâtisse tchi craît à côté d'l'églyise dé la ville! Ch'est assez pour qué s'n ombre env'loppe Lé Vièr Marchi! Si l's anciens allaient r'vénîn, i' chang'geaient probabliément l'nom d'La Rue Trousse Cotillon ou La Rue du Chînm'tchiéthe (lé nom dé Church Street dans lus temps) à La Rue du Gratte-Ciel.

I' sont întérêssants, les vièrs noms des rues d'la ville, mais il' avaient dêjà dispathus par lé temps qué j'fus né. J'crai bein tch'i' n'y'a pon fort dé jannes Jèrriais tchi sont întérêssis à les dênichi d'nouos jours. J'connais un moussieu tchi peut les nommer tous - l'Académicien Fraînque Le Maistre. J'avais pensé dans tchique temps qué Georgetown avait p't êt' 'té nommé pour iun d'mes anchêtres, et j'fus surprîns d'ouï l'contraithe quand l'Sieur Le Maistre mé dit qué san vièr nom 'tait Lé Fief dé Gorges. Et ouaithe qué l's anciens couoyaient hardi, il' 'taient génétheux quand fallait donner des noms ès rues. La cheinne qué j'connaissons comme Hill Street 'tait quatre petites rues à but ieune de l'autre tch'avaient nom La Rue d'Haut, La Rue des Forges, La Rue du Pid d'La Montangne, et La Rue ès Trais Pigeons! Ch'est seux qué Library Place d'à ch't heu n'sé vant'tait pon d'san vièr nom. Ch'tait L'Coin ès Couochons! New Cut 'tait L'Bel ès Ânes, et nouot' Queen Street d'au jour d'aniet 'tait La Rue ès Porcqs. Et j'crai (j'n'en sis pon trop seux) qué Peirson Place avait nom La Rue ès Couochons!

Tout ch'la veurt dithe que l's annimaux tch'étaient villais 'taient honorés par l's autorités dans l'temps jadis, mème les rats! Mais La Rue ès Porcqs n'en 'tait pon du nombre - oulle 'tait nommée pour eune fanmile dé chu nom-là. Par contre, Lemprière Street n'était pon nommée pour la fanmile Lemprièthe, car oulle avait nom La Ruette des Prés.

I' faut avouer que j'mé pliais mus dans les routes dé la campangne qué dans les rues d'la ville. I' sont belles à ch't êpoque, les routes dé la campangne. Les bouais sont en fielles et les fossés sont couvèrts dé vèrduthe et d'flieurs sauvages. J'èrmèrtchais hièr qué La Route dé Vînchelez dé Highfield au Mangni d'Vînchelez dé Haut, est r'dév'nue comme oulle 'tait quand j'tais mousse. Quand j'èrvîns en Jèrri en 1946 quâsi touos ses bouais avaient dispathu - par la vieillèche, et par les haches des Allemands, nou m'dit dans l'temps - et la route 'tait toute à l'ouvèrt. À ch't heu, des nouvieaux bouais ont r'prînt lus pliaiche, et duthant les vîngt-deux ans passés il' ont cru hauts assez pour qué les branques dé haut èrforment l'arche et la votte tch'avait fait Vînchelez "Lane" fanmeuse dans man janne temps.

J'sis bein content d'vaie, étout, qué des jannes bouais ont 'té pliantés entre les vièrs dans La Route du Mangni (d'St. Ou). Y'en a parmi ches vièrs-là tchi sont comme mé - i' c'menchent à châtchi - mais, malheutheusement pour mé, nou n'peut pon m'ravigotter en pliantant un janne bouais pour mé rempliaichi! J'ai quand-mème tchique espéthance dépis qu'les docteurs peuvent vouos transplianter d'nouvelles pompes dans l'corps et vouos donner la pôssibilité d'eune deuxième gestion!

George d'La Forge

 

Viyiz étout:

 

Les Pages Jèrriaises