Lé Ménage ès Feuvres,
St. Ouën.
Moussieu l'Rédacteu,
M'èrvéla en Jèrri! Ch'est tréjous eune jouaie d'y r'vénîn, et v'la tchi m'donne eune idée du pliaîsi qu'les vièrs naviguants d'vaient aver quand les navithes èrgangnaient Jèrri à la fîn d'un long viage. À m'suthe qué nou-s apprèche dé l'Île en mé, nou c'menche à r'garder pour les mèrs lé long d'la côte. J'mé r'souveins qu'en appréchant d'Jèrri en 1946, auprès aver 'té houors-pays pour dgiex-huit ans, j'èrgardais pour lé moulîn près d'l'églyise dé St. Ouën. J'viyais l'clioche d'l'églyise, mais pon d'moulîn en veue, et j'mé d'mandais tch'est tch'en 'tait dév'nu! Quand j'vîns à tèrre et qu'j'allis vaie mes vièrs accoints et marchi les rues dans la pâraisse natale, j'vis qué l'moulîn 'tait acouo-là mais qué l's aubes avaient dispathu!
À la longue nou s'accouôtunme ès changements. I' faut bein ches jours, car nou né r'connaît presque pon l'Jèrri di temps jadis. Lé temps passé, quand j'tchittais l'Améthique pour eune visite dé trais ou quat' mais en Jèrri, j'viyais pus d'changements en rentrant en Améthique qué j'n'avais veu dans vîngt ans en Jèrri. À ch't heu ch'est l'contraithe! Ouaithe tch'i' n'y a qu'treize mais qué j'tais houors-l'Île, i' m'sembl'ye qué les maiethons ont crû partout commes des champingnons. Dans La Route des Tchennevais, tch'avait 'té êlaizie dans l'entrétemps, j'trouvis tout un village nouvieaument bâti! Dgieu mèrci, nou peut acouo vaie tchiques grands clios tchultivés ou en hèrbe lé long d'La Grand' Route dé St. Jean, et ès Landes à St. Ouën. D'en par ichîn il' ont êcappé d'la folie d'bâti d'ssus, mais Lé C'mîn du Moulîn - du côté d'L'Êta - a pèrdu sa trantchillité d'campangne à ch't heu. Il est pliein d'neuves maiethons!
À L'Êta même, j'vis eune drôle dé chose! Y'a eune affiche tch'annonce qué l'nom d'L'Etacqu'sè veurt dithe Eune attaque sus chu rotchi! Ch'est en Angliais, sans doute. Jé n'crai pon qu'autcheun Jèrriais es'sait bête assez d'înventer du niolîn d'même! I' m'sembl'ye tout d'même qué tchique autorité dév'thait însister qué l'affiche fûsse halée ou changie, viyant qué v'la tchi donne eune fausse împression ès visiteurs.
Mais ch'est en ville, qué nou vait d'drôles d'êmanues! Des gens - garçons et filles - habilyis drôlement, et les garçons atout les j'veux long, et tchiquefais des barbes, et les filles en braies tchi lus cliutent ès gambes et pus haut! Et pis i' n'pathaîssent pon propres. Dans d'aut' pays nou-s en vait iun ou deux d'même dans les villes dé temps en temps, mais janmais en grands nombres comme en Jèrri. Dans les gâzettes ches jours j'vai des lettres nouos disant tch'est qué l's autorités dév'thaient faithe pour l's empêchi dé v'nîn. J'ai ieune ou deux idées mé-même. Dévant lus pèrmett' dé rester dans l'Île, j'lus don'nais l'chouaix dé s'en r'aller où-est tch'i' sont v'nus, ou d'aver lus j'veux (et barbes) copés à ras atout eune tondeuse à j'va et pis d'êt' scrobés comme i' faut das eune toubée dg'ieau fraide!
Eune aut' manièthe dé les d's'encouothagi d'rester, es'sait dé l's amather à un pilyi dans les clios, huit heuthes par jour, à faithe sèrvi d'êpeûthas pour êffriter l's ouaîthieaux! Un tas d'ieux pathaîssent si sales qué nou pouorrait les cliuter contre la muthâle, mais un êpeûthas est mus pliaichi dans l'mitan du clios!
Eune chose tchi m'frappe tréjous en arrivant est la vitesse des motos dans nouos p'tites rues d'campangne. Appathemment, tout l'monde craient qué la lînmite dé quarante milles à l'heuthe les justifient d'cachi à chutte vitesse-là partout. J'sis bein d'avis qué ch'est eune vitesse raisonnabl'ye dans certaines grand' rues comme La Route des Mielles et L'Avenue Victoria, mais trente milles à l'heuthe est vite assez dans la grand' partie d'nouos routes où-est qué l'motoriste est apte à rencontrer ou passer les fèrmiers à condithe les vaques à la pâtuthe ou à les rentrer. Les visiteurs n'ont pon l'avis d'arrêter pour les laîssi passer.
Dans La Route des Mielles, ch'est affreux d'vaie les fosses à sablion et les creux tch'ont 'té faits à des bords en tchithiant l'sablion. Évidemment eune entréprînse profitabl'ye pour tchitchuns. I' faut espéther qu'un mio du profit s'en va êt' fait sèrvi à rempl'yi les creux ou r'dréchi la surface sacagie sa affreusement!
J'avais grande envie d'aller ès pihangnes à basse-ieau et d'en mangi un bouan fricot, mais i' pathaît tch'i' n'y en a pon acouo. Il' ont évidemment abandonné l'rotchi ou r'mué en Dgèrnésy! Mais j'ai mangi un bouan vièr fricot Jèrriais en b'vant du thée - eune bédache d'andgule rôtie. Ch'est d'tchi bouan, man bouanhomme! Quand nou-s à ieu ch'la pour lé thée et eune bouanne bolée d'soupe dé caboche pour dîner, nou s'en lique les babinnes! La soupe faite par eune femme dé fèrme en Jèrri est la millieuthe au monde entchi!
Ieune des choses pliaîsantes quand nou r'veint en Jèrri est d'rencontrer les vièrs anmîns et d'bailli d'sa bec en Jèrriais auve ieux. J'en rencontris eune dgaîngue l'aut' sé à L'Assembliée d'Jèrriais quand j'eunmes l'honneu d'nouos assièthe dans La Cour Rouoyale et d'ouï Moussieu l'Bailli L'Masuthi nouos raconter l'histouaithe dé La Cour. Ou pathaît mangnifique dépis qu'oulle a 'té r'peinte. Lé discours du Bailli fut si întérêssant qu'nou l'éthait êcouté toute la niet!
Man vièr Jèrri! J'y tcheins! Jèrri où-est qué j'fus né : Mouôn Doue, tchi bonheu d'y r'vénîn!
George d'La Forge
1965
Viyiz étout: