Les Pages Jèrriaises

D'èrtou en Jèrri

Trenton, Michigan,
USA,
Lé 28 dé mai, 1977.

Moussieu l'Rédacteu,

Par lé temps qu'chutte lettre ichîn pathaîtra dans la gâzette j'dév'thais êt' en Jèrri, et j'mé d'mande si j'm'en vais trouver des changements en arrivant. J'ai raîson d'craithe qué oui. L'obelisque au Connêtabl'ye Pièrre Le Sueur (1811 - 1853) dans la Grande Rue s'en va êt' pus bé tch'i' n'l'était quand j'tchittis Jèrri dans l'mais d'novembre dé l'année pâssé, car j'vai dans la gâzette du 7 d'avri tch'i' s'en va êt' netti et restaûré. Ch'est damage qué ch'est un lieu d'aisances tch'est san pus près vaîsîn. Un p'tit gardîn, bein flieuthi, y'éthait fait pus honneu et éthait mus embaûmé l'air à l'entou. En mème temps i' faut admettre qué l'obélisque a bein pus d'visiteurs comme l'affaithe en est!

La Rue ès Français s'en va valer la peine dé vaie étout. Un portrait dans la gâzette montre un homme à la paver atout des pièrres dé taille. I' m'sembl'ye m'èrsouv'nîn tch'i' y'avait ieu pâlement d'aboli la rue, et j'sis bein content d'vaie qu'au contraithe oulle est en train d'êt' nouvellement pavée.

J'vai qu' l'Sénateu Shenton, comme Président du IDC, est à la tête du conmité enchèrgi d'prépather les plians pour la Baie d'St. Ouën. J'sis seux qu'Moussieu l'Connêtabl'ye Pithouët s'en va garder s'n'yi sus les dêbâts et souangni d'protégi la bieauté d'la baie.

J'èrgret d'vaie qué L's Êtats n'ont pon voulu taxer les j'vaux. J'sis d'l'avis du Connêtabl'ye Pithouët tchi dév'thaient y'être. I' sont eune embête dans les rues et i' galopent partout. Les membres tch'étaient contre pathaîssaient craithe qué la taxe 'tait trop p'tite et n'valait pon la peine. Si l'Connêtabl'ye avait d'mandé pour vîngt-chîn louis à la pliaiche dé dgix, il éthait p't-êt' ieu pus d'chance! Enfîn, il a un bieau souôri sus sa fache dans san portrait dans la gâzette, ch'est en tchi i' n'pathaît pon en aver pèrdu grand dormi.

Tch'est tch'éthait janmais pensé qué des membres d's Êtats éthaient crititchi des règliéments proposés dans La Chambre en Français, la langue officielle dé Jèrri! Et i' n'y eut qu'un Député, l'Député Jean Amy L'Maistre, à d'fendre l'ûsage dé la langue officielle. A tch'il êtat qué j'sommes vénus! Ch'est assez r'mèrquabl'ye, quand nou pense, qué la mâjorité d'nouos r'présentants dans L's Êtats n'savent pon la langue officielle dé l'Île!

J'm'èrsouveins tout-à-fait bein du temps qué l'cadran dans l'Vièr Marchi 'tait sus l'Corps dé Garde à côté d'La Nouvelle Chronique. Quand j'îthai en ville (j'espéthe!) mêcrédi ou jeudi d'la s'maine tchi veint, j'îthai vaie comment tch'i' pathaît atout sa nouvelle câsaque dé peintuthe. Ch'est eune bouanne chose tch'i' n'a pon attithé l'attention des pigeons. I' l'éthaient peint drôlement! Sans doute i' n'est p't-êt' pon trop aîsi à s'jutchi d'ssus, et v'la tch'est en sa faveur.

Appathemment, un tas d'conmèrçants du haut des Ruettes tch'appréche dé La Rue du Milieu (appelée La Rue des Porcqs étout) n'sont pon contents d'la vaie întèrdite à la cirtchulâtion d'boulants et touânnée en promenade comme La Rue d'Driéthe. Pourtant, ch'est eune mangnifique idée d'pouver marchi dans ieune ou deux des rues d'la ville à chaque pas à cause dé l'audace dé motoristes tchi n'pathaîssent pon saver, en Jèrri, qué l'piêton a l'preunmié drouait d'pâssage. Combein d'fais qu' j'ai r'mèrtchi ch'là en ville. Ouaithe qué jé n'sommes qu'à maîntchi civilîsés en Améthique, la "priorité" du piêton est un prîncipe bein connu.

La gâzette du 7 d'avri nouos dit qu' Messire Billy Butlin a acaté eune syraine. À c'menchi, j'ai pensé "Tchi niolîn!", mais quand j'ai veu qu'la gâzette montre l'êtang dans tchi qu'ou d'meuthe, j'ai ieu à changi m'n idée et accepter tch'i' y'a telle criatuthe qu'eune syraine! Pourtant, Papa, tch'avait navidgi, m'avait dit quand j'tais mousse qué ch'tait des sornettes dé matelot et tch'i' n'existaient pon véthitabliément. P't-êt' qué Messire Billy mé laîss'sa aller la vaie, la syraine? I' faut trous vivre en espéthance!

George d'La Forge
 

Viyiz étout:

 

Les Pages Jèrriaises