Sanm'di, lé 10 d'dézembre, 1977, lé sèrvice dé neu leçons et cantiques dé Noué eut lieu dans la Chappelle Méthodiste d'Ebênhézer à huit heuthes lé sé.
Lé Sieur W. G. Perchard fit la beinv'nue, annoncit l'preunmyi cantique et fit la priéthe, et Notre Père fut chanté. Lé préchain cantique 'tait Seigneur Jésus et auprès, lé Président, lé Sieur J. N. Richard, liut la preunmié leçon et lé sèrvice continnuit sans arrêt. Huit membres du tchoeur chantîtent ensembl'ye et lé Sieur John Picot chantit Aujourd'hui l'Églyise en fête. La Dlle. Ruth Amy chantit Le Fis d'Marie et lé tchoeur Il est né le Roi du Monde. Les membres suivants liûtent les autres leçons - les Dlles. C. de Gruchy et Audrey Le Feuvre, Mesdanmes Hilda Syvret et J. Vautier, les Sieurs E. B. de Gruchy, S. J. Le Breton, K. W. Syvret et J. D. Richardson, Connêtabl'ye d'la Trinn'té.
Y'avait du bouan chant dans touos les cantiques, auvec lé Juge G. A. Le Breton coumme maître d'chant et lé Sieur P. P. Luce à l'orgue.
Lé Sieur Perchard fit les annonces et les r'mèrciéments ès officièrs d'la Chapelle d'Ebênhézer. La collecte fut prînse en faveur d'la chapelle et auprès lé dèrnyi cantique, Hosanna, bénis soit, fut chanté. Lé Sieur Perchard donnit la Bénédiction et les membres et lus anmîns s'en fûtent pour la Salle Pârouaîssiale dé la Trinn'té pour lé souper et l's affaithes. Mde. E. Le Sueur jouit tchiques chansons pour amuser l'monde et l'Président fit l'annonce du dînner annuel, jeudi, lé 16 d'févri, à l'Hôtel L'Horizon, St. Brélade. Lé Président èrmèrcyit lé Conmité Dramatique pour aver arrangi la séthée et lé Connêtabl'ye pour la salle, et souhaitit les complyîments d'la saîson à tous. Ches complyîments li fut r'touônnés.
Viyiz étout: