Atout du pain ichîn dans chutte bouaîs'sie,
Deux d'gouts dé vîn, un livret dé poésies,
Et s'tu'es auve mé, à chanter, dans lé d'sèrt...
Ma fé, chu d'sèrt es'sa man Paradis!
Eh bein, tchi belle journée! J'ai pâssé eune bouonne partie d'l'arlévée êtrav'lé l'ventre au solé dans l'
gardîn auve un tas d'livres, d'la musique, et eune pétite pann'lée d'frâses (du supèrmarchi - j'ai deux-trais p'tites frâses sus man frâsyi dans l'gardîn mais v'là tch'est bein liain d'êt' un fricot).
Tout dans l'gardîn craît à tigue dé corps. J'ai des
poummes sus touos les trais
poummièrs (et y'a eune brantchie d'poummes vèrtchie au d'ssus d'ma longue tchaîse). Les deux louothièrs sont pâssabl'yes (iun des louothièrs a 'té saccagi par d's
însectes - j'l'ai sprayé raide et des fielles èrveinnent). Lé louothi fait un bouôn fricot pouor des carpéleûthes - mais j'ai êpié au mains eune papillote à ches drein. Dgieu mèrcie qu'l'attaque d'êtchèrbots d'lavande sembl'ye aver pâssé - les lavandes et les roumathîns sont rêtablyis achteu, et les lavandes attrioquent un tas d'
moûques à myi et d'bourdes.
Véthe, lé gardîn à roses d'Irám n'est pus,
Et la tâsse à Djamchyd a dispathu.
Mais l'russé d'rubis coule acouo d'la vîngne
Et au pid d'l'ieau, y'a des gardîns fieillus.
Ch'est en tchi j'ai êcouté aniet eune pièche dé musique qué j'avais êcouté pouor la preunmié fais en 1983 et tchi n'a janmais r'té présentée d'pis chu temps-là. L'enr'gistrément a justément 'té publié sus CD et j'l'ai acaté et don mé v'là aniet, êtrav'lé sus la longue tchaîse dans man gardîn souos iun d'mes poummièrs à r'êcouter les
Robaïyat d'Omar Khayyam arrangis pouor orchestre et tchoeu par Messire Granville Bantock.
Et j'ai fait des portraits en crèyon sus des buts d'papi, en r'gardant l's însectes - les moûques à myi, les bourdes, et des moûques à flieurs - à dgêper et vithevarder l'tou des flieurs.
Mais où'est qu'ches G'zettes-là craîssent - hé, tch'est tchi sait
S'i' y'a ofûche ieu tchique Grand entèrré?
Ou ches Bliuets, Mèrgots, Pipots, Coucou -
Si l'sang dé tchique pouôrre Corps les fait pousser?
Et dans man gardîn y'a d'la menthe (du p'pèrmène, d'la menthe à l'eau d'colongne, d'la menthe au vèrt limon, du pouoillot), du bouais limonné, du thŷmbre, d'l'origan, du chuchet, d'la marjolaine, du maît' - épis pouor l'architectuthe des fielles: des palmes (cordylines), du pêtre, des ros...
Et l'solé lit sus tout.
Épis j'ai tchilyi tchiques fielles pouor graie man souper, et tout a 'té arrouôsé atout eune vèrrée (des vèrrées d'
vîn). Et j'pense à mé-même: ch'est l'Êté au gardîn!
Et mille Flieurs êpannies, d'aniet à d'main
Sont parfénées et vite s'en r'vont à rein:
La Vie est d'même - et lé tché d'entre nous
Tchi sait, enfîn, si ch' s'sa san tou l'préchain?
Geraint Jennings (auve des buts des Robaïyat dé Omar Khayyâm - acouo tchiques vèrsets)
Viyiz étout:
