Je vos dis iune des aut'es semaines que j'vos racont'tais oquo des aventuthes que j'avais ieu quand j'fus à Binic.
Eh bain, un matin quand j'me l'vi, je sortis de ma cabine et je r'gardi alentou d'mé en respithant l'air frais comme d'habitude.
La mathée 'tait basse et l'port était tout à fait à sec.
A ma grande surprînse je vis une demié-douzaine des hommes de l'êtchipage avec châtchun lus pelle à travaillyi sus l'sablion au pid d'la muthaille. Le Cap'taine et l'Chef mécanicien étaient sus l'bord du tchai à lus donner des instructions.
Je trouvi l'tchuisinnyi et je li d'mandi pourtchi qu'ches gens-là étaient à creuser dans la cauchie et i' m'dit qu'il avait oui tchqu'un dithe qu'i' s'en allaient enfoui l'Caouain.
Ou pouvez bain penser que v'là qui m'êpouvanti mé. J'ai tréjous ieu le pressentiment que j'aithai une triste fin, mais je n'voudrais pas tout-d'même être enterré si liain de m'n île natale. Je sis enchanté d'Binic mais pas assez pour y laissi ma carcasse, surtout s'oulle tait enfoui dans l'fond du port comme la sienne d'un tchan.
J'étais sus l'point d'aller m'muchi tchiquebord dans les falaises pour ênviter une pathielle tragédie quand je dêcouvri que je n'tais pas en dangi du tout. I' s'agissait tout simplyement du nivelage de la grève pour asseuther une bouanne assiette au “Dinard” quand i' r'viendrait faithe san prechain viage.
A une autre occasion je fus rêvellyi dans l'mitan d'la nièt par un terriblye rêmouage sus l'pont. Je me l'vi pour vaie tch'est qu'i' pouvait y aver.
Et v'chin chein qui s'était arrivé.
Le Secrétaithe du Syndicat des Fermiers était à bord et v'nait justement de s'couochi. Il avait resté par les c'mins assez tard chute séthée-là et comptant que tout l'monde était à bord avait hallé la plianche qui servait d'passerelle.
I' v'nait justement de s'mettre au lièt quand i' oui des gens qui pâlaient et qui marchaient sus la cauchie.
I' r'connu la vouaix de Henri Roger, qu' s'en r'venait avec sa femme opprès aver passé la séthée siez d's amins. Sachant qu'il avait rentré la plianche, i' sauti tel qu'il 'tait de dans san liet et couothi pour la r'mettre.
Madame Roger, qui n's'attendait pas à vaie une 'telle appathitition, fit un brèt et faille d' s'êvanni.
Henri, li, viyant une squelette vêtu que d'une quéminse, qui couothait sus l'pont de “Dinard” s'êcriyi comme chenna.
“Tiens, v'là not'e baté troublié par des fantômes! Et ch'n'est pas mé qui m'trompe pourtant, car je n'ai bu que d'la limonade?”
Quand l'fantôme li pliaichi la passerelle et li dit, “Tch'est qui fait qu'ous êtes par les c'mins à ches heuthes ilo?” i' r'connu la vouaix du secrétaithe et vi bain tout d'suite que sa bouanne dame et li s'étaient fait peux pour rain.
Caouain
1929
Viyiz étout: