Les Pages Jèrriaises

Ah ! garçons, le pouor' caouan a-t-i' bein fait de resté muchi

Ah ! garçons, le pouor' caouan a-t-i' bein fait de resté muchi Mêcredi au sé. Avec la grille, plyie, le feu, l'ôrage, s'il avait tèt en touonnèe, seux du coup qu'il éthait tèt tué et touos ses anmins éthaient tèt dans la paine. Oui, car j'cré bein que malgré tout le ma' que nou a dit d'mé, malgré qu'i y-en a bein des piéches qui voudrait me vais crévé, parce que j'ai la becque trop longue, mé, je cré qui y'en éthait occuo tchi dithaient : Chu pouor' caouan, i' nos avait tant amusé.

Ch'tait dans l'cliochi de la Trinitai que j'tais muchi. J'ai veu qu'un fort forgeux a pâssé par là, car y-a ieu une belle petite job de faite.

J'sors de ma niche et apperchant une belle boutique – i' y-ont meins de neuves fenêtres – j'pensi que j'entendrais tchique chose de bon. Ma fé, y'avait tout un p'tit meeting et iun disait en bouan français : "L'enfant prodigue est retourné vers sa demeure, et le père alla au devant de lui et l'embrassa et le revêtit d'un bel habit. Le père ordonna de tuer le plus gras bouc et ils firent un grand festin."

Yun s'mint à dithe : I' tuirent le pus biau bicho !

J'cré bein que chès là la lecture ou le sujet pour Samedi au sé.

J'vit bein que le biau yacht à papa Jim qui fliottait dans la tchuisine. Un yacht ma fé, comme i' y-en a pas dans la baie du Boulai d'pis que ch'tait unne traie.

Mais tout chounna, ch'est du niollin et chein qu'j'ai à vos raconté, v'là qui vos intéressera, garçons.

V'là qui concerne le p'tit trip que les Messieurs de la pâraisse firent à St. Malo, là, iou que coq chanta.

J'en ai ouï, bouonnes gens, oh ! mais, j'en ai t'y ouï sus chu trip, mais j'pense qui faut mus que j'taise me bec, car ou viyîs, mé, caouan, je ne crais pas toutes chés histouèthes-là.

Chein que j'sait pour saeux ch'est qu'i y'eut daeux câsaques de perdues et qu'un moussieu dounni 10 francs à un coachman pour l'y rapporté la sienne qu'était restée à Cancale et qu'il éthait peut avé pour tchiques sous en téléphonant.

Le pus biau d'l'histouèthe, ch'est que tchiqu'uns de nos Trin'taie savent achteu pourtchi qu'i n'ont pas peut veîs la coue de la coumète.

Ch'était dans la grand' rue, j'pense, qu'i s'proum'naient pour veïs les patates (!!) quand iun d'ieux appèrchu eunne maison iou qu'il 'tait mins sûs eunne sign-board : "Café de la Comète."

Ah ! comme se fit notre anmin, ne v'chin la boustre de coumète !

La missis qu'était sûs l'pas d'sa porte l'î dis : Sav'ous pourtchi qu'ou n'l'avez pas veue, la coumète ?

- Parce qu'ou n'avait pas la coue longue assez, s'fit not' brave jèrriais.

- Non fait, l'î rêpounnit la bourgeouaise, et ou' y'explitchi pourtchi qu'y'en avé tant qui n'avaient pas veu la coumète.

S'ou voulèz savé poutchi, d'mandèz ès siens qui firent le trip à St. Malo. Pour de mé je l'sait bein, mais je n'voudrais pas dithe ouvertement.

Mé, Caouan, j'sis saeux que la Trinitai tai viède. Tchès tchi tai maître de la paraisse depis que toute la police tait en France. Admettons qu'un voleux éthait pénétré dans l'poulanyi d'un mousieu des champs pour volé la plus belle poule ! Coument et à tchi qu'ils éthaient porté pliainte ?

A bétôt garçons.

Caouain
11/6/1910
 

Viyiz étout:

 

Les Pages Jèrriaises