Les Pages Jèrriaises

Lé nez dans la bliaze

Ah, nos en v'là ti d'biaux, j'som's le naiz dans la bliaze
Et chu pouor boustre d'naiz, nou n'sait même en vais l'but.
La Mé qu'menche à r'tirer, j'ssons bétost dans la vaze;
Demmin, demmin, j'é cré qu'l'Solai-z-a trop bu.
Nouos v'là sus Saint-Maslo, - z-a siex perques de terre,
A mangir, à fumer en attendant l'Solai.
Mé, j'prends un locquet d'boeu, z-ov de la pomme-de-terre
Et d'bouans ouefs fricachis, ov man café z-au lait;
Lé Steward est ti dan fi, dé vais tant d'monde à table;
V'là qui fait sen affaire et remplit san gousset;
Mais à s'nh'onneu j'dirai tout y'est bain confortable,
Et chest un bouan garçon pus fin qu'Cadet Rousset,
Ne v'la Captain' Harvey qui r'gard' dans la long' veue,
Mais com' le marmouset d'la Magique Lantern,
Quest qui vait? i n'vait rein; i n'vait qu'une nai' veue,
I n'y vait pas pus cliai que "Jack in the cistern".
Now man Capt' Harvey tan Wonder n'y vait goute,
Il a fraid, i grenotte, il a bu z-un coup d'trop,
Il est a un stand still, oh il a bu la goutte
Et il a veu la Lun' la Lunne par sous l'troc.
Ah man biau 'tit Solai, sors d'dans ta co gnière
Sicq'tout chu crachin là, car j'voulons nos' naller
Le steamoeux est tout prêt et l'iau de sa chausgière
En bouillant, en bostant pouorrait nos fair' couler.
Ah tu n'ouet gout' valet, tu nos laisse dans l'sombre,
J'm'en vais au vier Eol, il a z-un' poucq' à vent
I l'ouvrira bain d'saeux et i chass'a ten ombre,
En poffant en suffliant com' i fait si souvent.
Now Eol tu m'r'fus' je t'vai dans l'hipodrosme
A nouer ta viel' pouquet', tu veux t'moquir vier laid,
De chu chorchi français, de chu Matchi d'la Drosme
Qui se dit pus malin que tai z-ou le Solai.
Vez je veux m'en mocquir et je jure by Jogue
Que j'l'y jouairai, z-un tou, z-et je prouv'rai bain d'saeux,
A touos vous mes garçons qu'ch'est un Marquis d'la Drogue
Un conteux de gnolin, qu'il est un impostoeux;
Angniet i promettait une afflambai' tempête
I comptait sans sen hoste - ah tu te crait malin,
Tu cré que je sis sot - tu cré que je sis beste -
J'm'fich' de tes histouair's et de tout tan gnolin.
Je n'ouvrirai ma poucq' rain que pour te confondre
Et quand tu promettras un biau jeu, du biau temps,
J'ouvrira mes souffliets et je férai bain fondre
Tes sottes prédictions, d'Estai z-et de Printemps.
Quand à té vier rimoeux j'n'exauc' pon ta prière
Va z-au bouan hom' Solai, - je n'soufflierai qu'd'main;
Gardais vos foeux a haut, et cauffais vouot chausguière
Le Solai s'esvilton' i vos don' un cop d'main.
Ne v'là l'Solai qui brille et le steemoeux qui rouolle
Et nos v'là z-au tombé du Grand Chastébriand -
Agui reste précioeux devant vous je m'agenoulle
Inspirais me souvent... je m'en vais en priant...

Ah nos v'là z-a Césambre, et je faison bouan' route;
Marches, marches, steemoeux, j'allons vais les Minquiers,
(      ?      ) et Maistre Ile, et Gerry sans nul doute -
(      ?      ) volons a costai des roquiers.
(      ?      ) qui parait - viyis - v'là la Corbière,
(      ?      ) de Gniermont, Saint-Cliement, l'vier Chasté
(      ?      ) Pontac, l'Crapaud et l'Histrière
(      ?      )*

J.S.

* texte tchi manque

 

Viyiz étout:

 

Les Pages Jèrriaises