I' pathaît que v'là tchiques semaines que mes lecteurs se d'mandent “Tchest qu'est devenu du Caouain?”

Châque semaine en ouvrant lus gâzette i' s'attendaient de vaie m'n êffigie au haut d'ma colonne comme d'habitude et n'y trouvant rain i' lus sont imaginés bain naturellement, que l'Caouain était malade, qu'il avait 'té mins à la porte, ou qu'il 'tait p't-être mort.

Tout en vos faisant, mes chiers amins, mes pus sincèthes apologies pour man long silence, je n'peux sinon bliâmer l'Chef pour ne vos aver pas dit, que les Directeurs avaient réalisé, à la fin, qu'i' m'fallait du r'pos, et qu'i' m'avaient envié passer tchique temps en France pour améliorer m'n êtat d'santé, qui, comme nou dit en bouan français “laissait beaucoup à désirer.”

I' fut décidé que l'air de Bretagne pouorrait me faithe du bain et nous fit des arrangement avec Moussieu Buesné, l'estimablye agent de la Ligne France-Jersey de m'envier d'abord à St. Malo erjoindre le vapeur “Dinard” qui m'emportethai à Binic quand il îthait cherchi les ouvriers Bretons.

Je partis don faithe man viage, le Chef me donnant deustrais chelins pour mes besoins personnels, en m'disant que si ch'est qu'i' m'donnait trop d'sous, je pouorrais les dêpenser mal à propos.

Le viage se fît sans autchun incident qui vaîlle la peine de rapporter, mais il 'tait bain êvident, à en jugi par le respé et la courtouaisie avec tchi je fut traité à bord, que le Cap'taine Cozie et ses officiers ressentaient tchelle honneur que ch'tait d'aver l'Caouain à bord de lus baté.

En arrivant à Binic je vouli sauter à terre pour aller vaie des connaissances que j'ai par là, mais v'là t-i' pas un grand moussieu en uniforme me criyi, “Halte-là!”

Ch'tait l'Brigadier d'la Douane, sapresti!

Je pensais, mé, qu'i' s'en allait me d'mander, comme ils avaient fait à St. Malo, “Avous tchiquechose à dêcliather?”

Et sus chu point-là, j'avais la conscienche bain cliaithe, car les Caouains ne sont pas fraudeurs.

Mais à ma grande surprinse, i' m'dit “Avous 'té vacciné?”

“Oui,” j'li raîponni, “et j'en porte oquo les merques.”

“Combain qu'i' y a d'temps?”

“Chinquante-huit ans,” j'li dis, “par le Docteu Chuquemelle!”

I' n'pathu pas satisfait d'chenna, et i' m'dit “Restez à bord!”

J'vos d'fends d'mettre le pied à terre! You qu'est l'Cap'taine?”

Et i' s'en fu li d'mander s'il avait 'té vacciné li, avec les membres de s'n êtchipage.

Le Cap'taine li produit les certificats nécessaithes attestant que tout était en réglye.

Là d'sus, i' li d'mandi, “Tch'est qu'est ch't ouaisé-là qu'ou nos avez amené là?”

Cap'taine Cozie li dit, “Mais ch'est là le Caouain des Chroniques!”

Mais chenna n'li disait rain à li jamais i' n'avait oui pâler d'mé.

“I'faut qu'i' sait vacciné le prumié chose demain au matin! Autrement ous allez le r'emmener de là ouest qu'il est v'nu! Je vos tchains responsablye.”

Je n'dormi pas quâsi du tout chute nièt-là et le lendemain à la pointe du jour je m'en fu m'jutchi sus la passerelle, contemplier man triste sort.

Je ouiyais l'coucou qui chantait dans les falaises et j'dis à mé-même, “Je n'sais s'il a 'té vacciné, li. I' vaint de dans les pays tropiques et il est capablye d'amener toutes sortes d'maladies contagieuses avec li, mais il est probablye que nou n'y a pas dit rain!”

Pus tard dans la matinée je fus à terre pouor trouver un vétérinaithe pour me faithe l'opéthation.

J'entri, en passant l'village, pour dithe bonjour à une demouaîselle que j'connais, mais ou m'dit comme chenna “Arrièthe de moi, satan! N'appréchie pas d'mé! Tu n'as pas 'té vacciné, et tu ès capablye d'empouaîsonner tout Binic avec la vétheule.”

Touos mes amins me fuyaient comme la peste.

I' n'y a pas d'vétérinaithes à Binic et à la fin je trouvi la maison d'un docteu.

Je tappi à la porte et je fut condi dans sa salle d'attente.

Quand man tou vint, je li dis que j'tais v'nu par les ordres du Préfet des Côtes du Nord, pour être vacciné.

“C'est bien,” qu'i' m'dit.

Et opprès qu'il eut ramassé ses ôtils, i' décârri les pliumes au haut de m'n aile gauche et êprouvi à m'pitchi.

Mais j'ai la pé comme du tchui et i' n'pouvait pas la perchi.

“Qu'est-ce qui m'a flanqué une peau comme celle-là?” i' s'êcriyi.

Et i' criyi à sa servante pour li touâner le meule pouor affiler san bistouri.

A la deuxième êpreuve i' r'pathi de m'haller une gouette de sang à treis bords et pis i' m'dit que j'pouvais m'en aller.

“Mais,” j'li dis, “i' m'faut un certificat pour montrer au Brigadgi d'la Douanne, autrement je n'pouorrai pas viagi librement.

Et don, i' m'remplyi un certificat dont y'chin une copie Département des Côtes-du-Nord,