Porte Infé, St.-Ou,
29 Juillet 1896.
Moussieu, - J'avais termié Sam Vôtchi, des P'tites Hèches, a v'né Samdi, dan vot office, pour qué j'lis payisse eunne douzaine d'oeus d'canotte, qui m'èspeignit le r'nouvé passé.
Vos pliétha-ti lis dithe (ou lé réconnaitrez bin par eunne véthue t'chil a dan l'nez, et un ponnyi plien d'trippes) dé v'né Samdi tchi vin, à la même heuthe, ou, si j'nétais pon là, l'Samdi d'auprès, ou offuche la s'maine en r'venant ou a la Saint Michet - n'y a pon d'presse.
J'men vais en France, l'Président d'La République s'en vint à St.-Malo Mardi tchi vint, et mes paraissiens m'ont dit qu'chest man d'vé, coumme principa et ancien Chantnyi, d'allé jusqu'a là, r'présenté l'île, d'pis qu'Moussieu Baudains n'peut y'allé, et tchi n'ya qu'li et mé en Jerri accuotumés a viagi parmi l'grand monde.
J'ai envié mendation au Counnétable dé St. Malo, qué j'men v'nais, mais dé n'pon s'dèsrangi dé m'gardé sa buonne chambre, j'ai d'sammins à St.-Malo siez tchi jé d'meuththai deux-très jours. J'tais a j'en sai si jé d'vais emporté m'nuniforme de troopeur, an cas qué l'Président m'invittai a dîné, coumme qué oui, s'nou lis dit que j'sis dans l'senvithons, mais a tout pensé, coumme man sabre est hardi roui, et tchi s'en faut très pouces qué j'piesse boutonné ma casaque, j'ai laissi cheunna dan l'armouèthe et j'men vais habillyi en moussieu, coumme d'amor.
Chose seuthe tchi s'en va y'avé d'belles fêtes à St.-Malo, et qu'bin des Jerriais voudront allé ves cheunna. Nancy en faisait la r'merque justéman achteu - Ch'est pas tuos les jours t'chi s'adounne qu'un Président d'République et un chantnyi d'St. Ou s'trouvent en même temps dans la même ville. Les Malouothachais en r'pâllont longtemps.
A man r'tou, j'vos f'thai savé coumment l'affaithe s'est passée.
Yours truly,
Bram Bilo, Esq.,
Chantnyi.
P.S. - Vos pliétha t'y dounné ma gazette à Laiesse et dithe a Moussieu Sullivan qu's'il avait l'temps d'êscrithe eunne verge ou deux bieaux versets en l'honneu du Président et d'mé, j'puorrais p't'être les faithe imprimé dan la gazette dé St.-Malo.
Viyiz étout: