Duthant les djaix ans que Pierre Rondé a 'té empliyé dans l'office d'un êcrivain, jamais i' n'avait profité d'ses vacances pour aller faithe un tou en France.
San péthe faisait valer oquo sa ferme et comme i' tchultivait une masse de tomates Pierre passait ses tchinze jours de vacances à aidgi au bouan-homme à tchillyi et à patchi la récolte.
Mais comme le vier Rondé a tchitté le labouothage Pierre se vit libre l'année passée de joui d'ses vacances d'une difféthente manièthe et i' s'décidi d'aller passer tchiques jours à St. Malo.
Sa femme était soi-disant pour y aller avec li mais à la dernié minute ou changi d'idée, oulle a une terriblye peux du ma d'la mé, et pis quand'même sa bouonnefemme de méthe n'étant pas dans la miyeu santé, ou n'aimait pas à la laissi toute seule.
Mais ou fut bain raisonnablye. Ou savait que Pierre avait besoin d'un holiday et ou n'vouli pas bouleverser ses plians ch'est pourtchi oulle insisti qu'il y fusse tout seu.
Le pouore garçon n'y t'nait que d'sorte car i' n'avait jamais sorti l'île et il avait peux de s'trouver êpithoté sans sa Caroline à souogni d'li.
Enfin, i' prins couothage et oppress aver remplyi toutes les formalités i' fut ramasser san passeport à la District Office et s'embertchi à bord du St. Brieuc.
Le temps n'était pas trop bé chu jour-là, i' ventait une forte brise du seur-vouest et l'baté s'mins à rouler des qu'il eut passé l'briselames.
Pierre s'était assis sus un banc sus l'pont mais i' c'menchi à s'trouver mal à s'n aise. Il avait allumé sa pipe en sortant d'la cauchie, mais il l'a mins bain vite dans sa pouchette, il avait perdu l'envie d'fumer.
Chinq minutes oppress, coumme i' passaient au large de la “Demie-des-Pas,” Cliément Martin, le “steward,” le trouvi cramponné à la “rail” à pousser les pus affreux gémissements et à pâler à san tout seu.
Comme i' disait, “Extchuse-mé, ma pouore Caroline, de t'aver tréjous dit que l'ma d'la mé était raique de l'imagination. Oh, que j'voudrais être siez-nous! Oh, mon doux, mon doux!”
Cliément, qu'a tréjous d'la sympathie pour les minséthablyes, s'appréchi d'li et li dit qu'i' s'sait pus confortablye couochi sus l'sofa en bas dans la chambre, et le prenant par le bras, i' li aidgi à d'valler les d'grets.
Opprès l'aver mins bain confortablye i' li d'mandi si ch'est qu'i' voulait prendre tchiquechose, mais Pierre n'avait pas d'sai à chu moment-là et pis quand-même i' n'aithait pas peu garder rain sus s'n estoma.
Treis passagiers étaient à jouer une gamme de dominos et i' li d'mandithent de les joindre.
“Ah, nennin mercie!” se fit Pierre, “i' n'm'en est pas d'rain à l'Hôtel de l'Europe, avec Tom de Gruchy et Laïesse Le Boutillyi, mais pas ichin. Laissiz-mé trantchille, j'vos en prie!”
Le pouore corps fut malade quâsiment tout l'long d'la traverse et r'gretti bain des fais d'aver tchitté san siez-li, mais enfin en appréchant de St. Malo i' s'ravigotti un mio et r'était tout-à-fait li-même quand i' dêbertchi.
Caroline li avait acaté une toute neuve valise, et avait patchi ses habits d'dans bain soigneusement en li disant qu'i' n'fallait pas la perdre d'veue pour un instant, car i' s'arrivait souvent que des bagages se trouvaient volés ou emportés par mêprinse.
Ch'tait pour ch'la que quand un Douanier li dit de la dêposer sus une tablye, i' li raîponni “Oh, ch'n'est pas la peine, mercie, je peux en souogni, mé!”
Et i' cherchi à s'estchiver hors du bureau.
Naturellement, i' fut prins pour un fraûdeux et un gendarme le prins par le collet et le rameni à la tablye.
Le Douanier li airaichi sa valise des mains et faille d'la trillyi en deux, il ouvri si brusquement.
I' viédgi tout l'contenu sus la tablye en un lopin et s'mins à êtcherpi tout, comme un tchan qui gratte dans un têrri d'lapin. Sa bringe-à-c'veux, san savon, san dêmêleux, sans wash-glove, san râseux, enfin toutes les p'tites âtivelles que Caroline avait arrangi si bain, tout fut êparpillyi sus l'conteux par chu peûle de Douanier dans san zèle pour trouver du p'tun ou des cigarettes. Mais ch'fut peine perdue pour li car Pierre jamais n'en fait servi, n'étant pas fumeux.
Opprès aver tout dêlabré et chiffonné touos ses habits i' laissi le pouore Pierre erpatchi les debris du mus qu'i' pu et quand la valise fut r'frumée, avec un geste d'mârrisson, i' fit une crouaîx avec un morcé d'craie.
Chute feis dja Pierre Rondé s'emporti.
Ch'tait pus qu'i' n'pouvait supporter, de vaie la valise à Caroline êgrinfliée d'chute manièthe-là!
Il êprouvi à fliantchi une cliamûse au Douanier, si bain que la police s'en mêli, et sinon que deustrais des autres passagiers intercédithent pour li, il aithait 'té mins au cliou.
Une feis cliai de tout ch't embarrass-là, i' s'en fut s'promener dans la ville pour vaie les boutiques et cherchi pour des louogements, mais i' n'avait pas marchi djaix perques qu'il aperchu une demouaîselle à la porte d'un café qui li dit en Angliais, “Hallo, my dear!”
“Bon,” i' pensi, “en v'la iune qui pathait m'connaître.” Et i' crouaîsi la route pour la vaie d'pus près.
Oulle li fit tout-à-fait la bainvenue et li d'mandi d'entrer et li servi un café.
Par chu temps-là, sa soeur, sa cousine et sa tante, qui d'meuthaient toutes dans la même maison, s'étaient appréchies d'ieux et oppress aver 'té présentées à Pierre, s'assiévithent à la même tablye et c'mandithent châtchune lus consummation.
Jamais Pierre Rondé n'avait rencontré de pus “nice” gens.
Dès qu'i' surent qu'i' cherchait des louogements i' l'invitithent à rester siez-ieux li disant qu'i' pouvaient l'acc'moder à un prix raisonnablye.
Pierre s'y arrangi et duthant lus conversation i' dêcouvri qu'i' connaissaient plusieurs de ses vaisins et sustout les membres de la police de sa pâraisse. I' pathaît que quand i' furent pour lus picnique l'année passée i' passithent une séthée ou deux siez-ieux.
La petite Yvette li d'mandi comment qu'était le Chantn'yi Sam Desperques et li dit qu'oulle tait même sa nièche.
I'li nommithent ettou Ph'lippe Crespin l'Vingtenyi, Jack Halledoque, Tom Grapin et même Dan Mêtin, le prédicateur.
Georgette, la cousine li, montri même tchiqu'unes de lus photographies.
Pierre Rondé était comme siez-li, seulement qu'i' vint à s'aperchever qu'i' l'faisaient dêpenser une masse de sous et au but d'quatre jours quand i' dêcouvri qu'i' n'li restait pus que vingt-chinq francs, i' pensi qu'il 'tait temps de s'en r'venin.
Il avait promins à Caroline de la rapporter un biau présent, mais tch'est qu'ou voulez faithe avec vingt-chinq francs, avec l'êchange comme il est? I' savait bain qu'oulle aimait bain l'paisson, ch'est pourtchi i' li remporti siex livres d'capelain.
Quand i' fut r'venu siez-li i' donni naturellement une acconte de san viage à Caroline qui fut lyi, bain êtonnée de ouï que l'Chantn'yi Sam Desperques avait des pathents à St. Malo, et tchiques jours opprès étant grands amins avec Gladys Desperques sa femme ou fut li rendre visite une arlevée.
Gladys li d'mandi si Pierre était r'venu et s'il avait enjoyé san holiday.
“Oh oui,” Caroline li raîponni, “mais comment qu'chenna s'fait que tu n'm'avais jamais dit que Sam avait une nièche à St. Malo?”
“Une tchi?” Gladys s'êcriyi, tout-à-fait êtonnée. “Une nièche, qu'est à d'meuther avec deux cousins et sa tante.”
“Eh bain, par exemplye! Jamais je n'en avait ouï pâler! Arrête une minute, Sam est ichin dans l'gardin à plianter des caboches, je m'en vais li crier.”
Opprès que Sam fut entré et eut châtchi d'main avec Caroline, sa femme li dit comme chenna, “Tu n'm'avais jamais dit que tu avais des pathents à St. Malo!”
Sam se mins à rithe et raîponni que ch'tait des nouvelles pour li, que jamais i' n'en avait ouï pâler.
“Caroline,” se fit Gladys, “raconte li tout chein que tu vains de m'dithe.”
Et Caroline li dit don, tchi charmantes gens que Pierre avait trouvé et comment qu'il avait d'meuthé siez ieux pour quatre jours, que ch'tait une dame et ses deux filles, Yvette et Pauline et lus cousine Georgette qui li avait dit que Sam était s'n onclye, et ainsi d'suite.
Le pouore Chantn'yi rouogi jusqu'ès ouotheilles et les femmes le tchestionnithent de si près pour un quart d'heuthe qu'i lus conti pus d'ment'ties qu'i' n'avait de c'veux sus la tête.
Le même sai i' s'en fut trouver l'Connaîtablye et deustrais des autres membres de la police et lus raconti comment que l'imbécile de Pierre Rondé était r'venu d'St. Malo et avait chanté toutes sortes d'histouaithes à sa femme et qu'achteu che n'tait qu'du brit à la maison.
Au moment actuel i' n'y a pas un homme mains populaithe dans la pâraisse que Pierre Rondé.
Il avait idée de prendre pour office du Connaîtablye, mais il a biau y êprouver, jamais i' n'y arrivetha acheteu.
Caouain
Viyiz étout: