F.M.H.

À man fréthe Françouais et mé,
not' mémèe a dêjà d'mandé:
tch'est qu'es'sa not' profession?
Car oulle a eune ambition
dé nos vaie comme professeur,
ou d'un conmèrce, directeur.

Not' mémèe a décidé
en mêssieurs dé nos touônner;
dé nos vaie ès bieaux habits,
v'là tchi lî f'thait grand pliaîsi.
Jé crai qu'lé tchoeu lî romp'thait,
s'ou savait la véthité.

J'n'avons pas assez d'chèrvé
pouor un examen pâsser.
Françouais es'sa tchèrpentchi,
Mémèe trouv'tha ch'na grôssyi...
Pouor qu'oulle ait du pain à mangi
j'm'en vais être un boulandgi.