Les Pages Jèrriaises  

Bouan Noué!

 

Bouan Noué

 

Noué, ch'est la saîson des présents, du bouan fricot, du podîn, des cartes dé Noué, d'la gâche dé Noué...

Bouan Noué! Ou ch'est-i' pustôt un moment dans l'année pouor penser ès choses tchi sont vraînment înmportantes dans la vie?

Y'a bein des gens achteu tchi craient qué Noué est trop conmèrcialîsé - auve toute la boutiqu'sie à faithe et les compangnies à nos encouothagi à acater un tas d'tchi par lus annonces et lus prépathâtis pouor Noué tchi c'menchent dans les boutiques au mais d'Septembre.

Les villes haûlînguent lus dêcorâtions pus tôt châque année pouor haler tchique avantage conmèrcial dans la compétition auve les villes vaîsinnes ou les grandes boutiques hors les villes.

Bouan Noué! Mais j'sommes-t-i' pus satisfaits si j'oublions qué tout chu train est pouor ramémouaither un p'tit êfant tchi fut né dans eune êtabl'ye y'a deux mille ans (pus ou mains) et tch'est not' Dgieu?

Bein seu, j'avons les cantiques dé Noué - mais j'les ouïyons l'pus souvent dans l's allées des supèrmarchièrs dès l'mais d'Septembre en cachant nos tchéthettes l'long d'ais remplyis d'podîns d'Noué, d'cracots, d'chucrîns et d'chocolats. J'viyons même des fronmages patchis tout spécialement pouor Noué.

Et les vîns! Mouon Doue d'la vie, j'sommes-t-i' encouothagis d'baithe à Noué! Ch'est quâsiment coumme si j'éthions 'té transportés ès temps des Romains auve lus fêtes d'mié-hivé quand les jannes hoummes lus habilyaient coumme des loups à chasser les jannes fil'yes...

Bouan Noué! Et nou dit qu'not chièr Papa Noué n'est rein qu'la drogu'thie! Ch'est à l'originne un chaman, un tchéthaûd des peupl'yes du Nord. Ches gens-là d'meuthaient dans des maîsons couvèrtes dé tèrre pouor lus însuler d'la fraid - et ches maîsons avaient un creux dans la lief pouor laîssi pâsser la feunmée du feu. Et don ch'fut par chu creux qu'lé tchéthaûd entrait pouor présenter ses drogues ès gens.

Et les chèrs tchi volent? Né v'là acouo eune preuve dé hallucinn'nie!

Nou dit qu'les couleurs des habits à Papa Noué nos ramémouaithent les couleurs du “champîngnon magique” tchi donne les hallucinnâtions - mais y'en a étout tchi dithent qué ch'fut la compangnie Coca-Cola tchi changit l'vèrt dé Papa Noué en rouoge pouor lus annonces duthant l'vîngtchième siècl'ye. Et n'y'a rein d'pus conmèrcial qué chenna!

 

Geraint Jennings
2001

 

Bouan Noué!

 

 

Viyiz étout:

 

 

Les Pages Jèrriaises