Mé, qui n'a pas ieu un seule Christmas-box, mé qui n'a pas peut mangi un miot de pudding; mé, qu'a tèt oblligi de couochi d'hors souos la plluie, veu qu'la fumèe ou bein que papa Christmas m'ont empêchi de m'muchi dans tchiques chumenaies, mé qui n'avait pas d'cauches à pendre au pid d'man yèt, puisque toute ma pouore vie i' faut que j'dorme jutchi sus tchique chose, mé, le pus vilain ouêsé de l'arche d'Noé. I' faut que je vous fais des souhaits, pisqu'ils l'ont mins dans la gâzette.
Fouai de hibou, j'aimethais mus allée vés si touôs les viaux sont bein es siens des vaques qu'nou lus a douné coumme mèthe au Herd Book, mais pisqui faut vous faithe des complliments, en v'chin:
J'vous souhaite que vos patates vos f'thont seize cabots la perque et que vot'e vaisin n'en ai qu'iun.
J'souhaite que toutes les patates du vaisiné saient brûlès par la g'lèe, mais pas les vôtres.
Je souhaite que chaque fais qu'ou z-îthès au bridge, le prix des paptates augmente d'un ch'lin par cabot pour votre cherge seulement.
Je souhaite que les marchands lus ent'e battent à coups de ch'lins, bein entendu, pour acater les produits de votre ferme.
J'espèthe que les Améthitchains îthont sièz vous pour vous apporté des pouchètèes d'dollars en échange pour votre pièthe géniche.
J'espèthe que vot'e beurre se vendra d'about pus chi que l'sien d'Sibéthie.
Je voudrais qu'ils oubllithaient à vos mettre au rât pour ne pas à avé à dépenser des sou'.
Je souhaite qui y-ait des tas d'élections pour qu'ou n'éthêtes pas à payï pour vos cigares.
Je souhaite qu'aux shows, où remportethaie les premiers prix et les autres rein du tout.
S'ou êtes mathièt, je souhaite qu'ou z-éthais besoin de prams à deux pièches!
S'ou êtes engagis, je souhaite que la lunne ne s'mautre pas du tout au sé et que les fossés saient bein sès!
A tous les siens qui m'aiment bein et qui voudraient m'vés crévèt, parce que j'ai la langue trop longue, je souhaite que lus anmins leur faîche cadeau d'un pop-gun pour me tithé.
J'espèthe que l'aulouoge qui sert de monument à certain parish hall s'ra mise en mouvement pour que les riches aussi bein que pauvres règle lus montre par yï.
A tous et à chachun, je souhaite qu'ils se portent aussi bein que le pouor caouan qui n'fait pas de cas du ma' ou du bein qu'nou dit de lui.
Caouain
La Chronique de Jersey 1/1/1910
Viyiz étout: