Touos l's ans à Noué j'ai ieu l'habitude d'adressi à mes lecteurs des bouans souhaits
Touos l's ans à Noué j'ai ieu l'habitude d'adressi à mes lecteurs des bouans souhaits. La couotume n'en est p't être pas mauvaise et je n'vai pas auchune raison pour la discontinuer, sustout comme je sis persuadé qu'i' s'saient tous désappointés si je n'le faisais pas.
I' n'me semblye pas qu'y a déjà un an que j'étais à êcrithe m'n articlye de Noué, l'année s'est passée comme sus d's ailes. Mais che s'sa une année qui restetha tréjous gravée sus la mémouaithe de touos nous et de tchi qu'nou pâlela souvent dans l'temps à v'nin à cause de ses êvènements historiques. Les siens qu'éthaient ieu l'audace de prédithe l'année passée, seulement la maintchi de choses qui se sont dêjà passêes, aithaient 'tai r'gardés comme des pouores dêrangis d'esprit. Tch'est qu'aithai jamais pensé que d'un jour pour l'autre toute l'Europe aithait 'tai pliongie dans une djerre pus acharnée et pus révoltantes qu'i' n'y en a jamais ieu iune?
Mais ch'en est d'même pourtant.
Si nou z-avait dit à nos miliciens l'êté passé, "Prépathous s'ous voulez garçons, car ou z-allez rester tout l'temps souos votre uniforme, et ou d'meuth'ey dans l's êcoles de St. Martin, dans la Canning Factory, et dans les Barracks à St. Pierre. Des soudards angliais occhupethont une parties des Halls et la Grande Hôtel es'sa touannée en une "Barracks."
Un soudard es'sa mâté d'but, avec sa bayonnette fixée, à l'entrée d'la Grand' Poste et i' y'étha une garde à toutes les pièches d'auchune importance.
La nièt ou s'sey à faithe la garde le long des pliains et dans les falaises avec châchun chent rondes d'ammunition dans vos cartouchiéthes, les auberges frumethont à huit heuthes du sé, et enfin, tout es'sa désorganisé en Jêrri pour la raison que l'Angliéterre, la France, la Russie, la Belgique et la Serbie essont en djerre contre l'Allemagne et l'Autriche."
* * *
Eh bain, garçons, tch'est qu'ou z-aithaites pensé d'un individu qu'éthait ieu l'audace de pâler comme chenna?
Ou vos séthiez bain motchis d'li est-che pas? Et ou z-éthiez dit "Emmenez-mé ch't ouaisé là à l'Asîle immédiatement!"
Mais ou viyiz bain qu'les choses en ont' tai d'même pourtant, chein qui prouve qu'i' faut tréjous être prêtd pour auchune éventualitér, et de jamais se faithe une fausse position en s'imaginant que d'patheilles choses sont impossiblyes ou improbablyes.
Tch'est qu'éthait jamais pensé que j'éthions veu nos Pasteurs faithe un patheil volte-face! Opprès nouos avé prêchi toute lus vie, sus "l'amour de son prochain," "Tu ne tueras point," et opprès avé êprouvé à nos convaincre que quand nous est frappés sus une joue, qu'i' faut presenter l'autre, les v'là-t-i' pas à user toute lûs êloquence pour tâchi de persuader autant d'volontaithes que possiblye de s'n aller sus l'champ d'bataille tuer autant d'Allemands comme i' verront.
Et i' faut dithe que ches braves hommes-là ne se sont pas arrêtés à des vaines patholes, mais que certains d'entre ieux sont ieux-mêmes hors au combat, tandis qu'y en a d'autres qu'ont offert lus services mais à tchi qu'nou n'a pas donné permission de sorti.
Vaithe, garçons, ch'est bain vrai que nous n'éthait jamais pensé que l'année 1914 aithait produit de patheils bouleversement, et souos les circonstances déplorablyes, i' semble quâsi que ch'est une moquethie de s'entre souhaitter "Un Bouen Noué."
Dans bain des cas l'êchange du souhait étha un son creux, et bain des familles se sentithont l'tchoeu gros, tout en disant "A Merry Christmas" avec un souorit sus les lèvres.
Ch'a tréjous 'tai la couôtume à Noué pour les familles de d'réuni ensemblye autant qu'possiblye, même si y fallait viagi hors pays pour se rencontrer, et dans l'cas de l'absence d'un membre à sa pliache accouotumée, ch't absemce là est tréjours pus frappante le jour de Noué qu'en auchun autre temps.
Ch'te année, hélas! les brèques attouo d'la tablye es'sont pus nombreuses que jamais.
Malheutheusement, tchiqu'unes de ieux ne s'sont jamais remplyies par les êtres aimés qui jadis les avaient occhupées et dans ches cas là i' nouos est impossiblyes, et i' s'sait même indiscret de cherchi à en dêcrithe la tristesse. Avec notre pus profonde sympathie, laissons un vouaile sus l'deu de ches pouores gens-là.
D'autres es'sont attristés pour le temps, par l'absence des siens qui sont à la frontiéthe à combattre l'ennemin, et malgré une crainte déconcertante d'un malheur possiblye et lus combattent contre autant qu'i' peuvent, et êprouvent à s'rêjoui dans la pensée que les absents sont avec ieux en esprit et qu'au mains, à Noué tchi vaint nou s'rétha touos ensemblye comme d'habitude.
* * *
I' n'faut pas être "down-hearted," garçons! Malgré toute la souffrance, la peine, et la minséthe qu'accablyent le pays pour le moment, tâchons de rêjoui touos les siens qu'ont l'esprit abattu et lus aidgi à passer un
Merry Christmas.
En conclusion, - A touos mes anmins lecteurs, le Caouain souhaitte
"UN BOUAN NOUÉ."
Caouain
La Chronique de Jersey 1914
Viyiz étout: