"Héllo, Sam! Ouat's euppe?" s'fit Mess Hueûlin, hier-ô-matin, en m'viyant v'né cliopinnant a l'office.
Ouat's euppe? Ch'est pus tôt: Ouat's daounne! qui faûdrait dithe. La véthité; ch'est que j'tais pus-ou-mains en margalo, hier-ô-matin! l's'yeux bouchis, l'nez teur, deux dents èslouaissis, eunne ouethelle fendue, et un fond d'gris papi a mes braies - respé d'vous - les suites, mes pouôres èsfants, d'avé dîné siez m'n'onclye Dînmanche.
Pour un dîné d'Noué, ch'tait, faut l'avoué, un bouan dîné d'Noué. L'onclye avait ben fait les choses; et si j'ai yeu eunne tournéoualleupe de preunmié classe, j'avais au mains 'té ben lesté d'vant la mèslée. Un picot de trente-chinq ch'lings d'siez Orviss, des Up-to-dates d'la store a Rouèssi, des "sprouts" patouollyis d'beurre de la "dairy" (fourni au mème prix qu'l'Hopita), un poddin d'preunnes fliambé ov du Jonni Oualkeur, et pus d'un sièxtonnyi d'codrettes - ov du Café du Mont Saint Michet (lé miyeu café d'l'île) pour "wind-up" - Oh! n'y;a pas a dithe lé contraithe, ch'fut un dîné d'Noué "an no mistake!" J'eus a dèsboutonné ma veste et aut'chose pus d'eunne fais a m'z'uthe qu'j'avanchaîmes; et pour un autre itet bantchet j'cré quâzi qué j'sis pret a avè eunne autre ouallenpinne - quand jé s'sai r'graies.
L'Affaithe se gâtit quand l'oncle dit: "Mettous tous aoutouôre du feu, bouonnes gens, et tandi qu'Bella nos rôtitha des châtainnes, j'm'en vais vos liethe tchiq' histouethe dans l'almana d'la Chronique qué j'rapporti hier: y'a eunne fameuse histouethe dédans, a ch'qué m'dit Piteur Michet, hier, en s'èsgouffant d'rithe."
Lé malheur en voulut qué m'n'onclye tchi dret sus l'histouethe dé "Miss Bella Billo" qu'ou z'avès sans doute touôs lu dèja. A m'zuthe qué l'bouonhoumme lièsait y vint coumme tchi dithait un frét dans l'parleux.
Persounne ne souffliait mot au qu'mench'mant. Ma tante s'mint bétot a toutre, Bella laissi brulé ses châtainnes, et l'bouonhoumme lièsait d'pus en pus haut.
"Tchès qu'est l'infèrna pendloque qui nos a mins dans l'alména?" s'fit y tout d'un coup en tchulbutant sa tchaise.
"Ch'est li! ch'est Sam-hu-elle!" barbéleûte ma couôsinne en s'èsgouffant a plieuthé.
"J'm'en doutais, panphèque," hurla m'n'oncl'ye (le propre fréthe dé man pouôre péthe défunt) en m'happant tout-d'un-co au collet.
Jé n'vos en dithai pas pus long! J'fut grimmé, mordu, coup-d'pîzi, houspillyi, èsgliemmi. J'but envié bas a coups dé g'nou (des g'nous d'gemme, si vos pliait,) et r'léve a coups d'tchaise. J'fut traîné dans l'aithe, sus l'dos, sus l'ventre (réspé d'l'hounneu a la compagnie) et fliantchi d'hors dans l'puté, nueûx tête, mes braies en q'daches, et l'tchan fut mins a-bannin sououtre mé pour mé faithe couôre pus vite!!
"Ah! ch'est d'mème!" s'criyit ma tante (ou'l a la vouée aigre coumme un vis d'prînseu mal huilé). J't'emplions d'poddin et tu nos emplyis dé riditchulle! Ta pouôrre couôsinne té rôtis des châtainnes et tu'èscris d's'histouethes sus yi dans l'almana! I't'en badrons, des Miss Bella Billo! et des boutiques a p'tun souos la Société d'Agritchultuthe!" et a chaque mot ou'l èscopissait sus mé et quétilliait sus mé ov un g'nest pien d'bouse.
Et j'vos d'mande! Y'a eunne histouethe sus Bella dans l'alména, ch'est vrai! Ch'est et-tout vrai qu'ch'est mé qui l'ai èscritte. Mais j'pensais faithe ben en pâslant d'ma couôsinne! J'criyais qu'ou s'sait contente dé savé qu'les garçons vindraient rôdé d'san bord! Et a la pliche d'eunne slindgeuse j'mé s'sais pus-a-co attendu a des r'mécîments et offuche eunne pièche-d'èstchu. Mais nennin! Mé v'la arrôné pour eunne bouonne pôse, man miyeux fat en brédelles, ma seule qu'mînze blianche en q'daches; et l'bouon houmme s'en va consulté l'counnèstablye dé Saint Pierre pour savé coumment nou s'y prend pour eunne rémontrance.
Samuel
La Chronique de Jersey 28/12/1910
Viyiz étout: