Lé Caouain à Noué 1935
Pouor un buan Noué, ch'fut un drole de Noué sièz nous.
Couomme de couotume l'Sieur Caouain rentrit à la sinette du jour, s'n'extchuse étant qu'oprès avèr aidji Mess Simon à vendre d's'almanachs l'boss ly avait douonnait l'ordre de s'rendre à la catholique vais q'il y avait beaucoup de monde à la messe de minièth.
Un tas de menteries, bé seur, mais tch'est qu'vous voulez. Noué n'arrive pon touos les jours et à un ouaisé couomme l'Caouain qu'a l'filet bein copé et tréjous la gorge sec, ch'n'est pon les amins qui ly manquent pouor l'abreuver en dithèt jour qu'la serveille de Noué. Encouore heureux qui m's'méprins pon d'porte et putmonter l'd'grès sans les d'valer pus vite que chunna ly aurait fait pliaisi.
Il y avait quassiment une heuthe qu'l'buanhomme était couochi quand j'fut réveillie par un tintamarre à la porte de notre mansarde. Ch'tait l'vaisin qui criyi au travers d'l'hus: Marie, Marie, il y a tchique chose qui n'va pon avec l'engin de “La Chronique,” car d'pis une heuthe pon miyen d'frumer les yièrs pouor dormir avec l'brit du moteur! Faut craithe que l'vaisin avait la berlue car ch'n'était pas le brit d'un motor, mais le ronfliement du Sieur Caouain.
Pouor une fais, j'avions décidé d'inviter l'couosin Phlip, de Portinfer, et sa couosine (à la mode de Bretagne, j'crais) une drinette qui n'a pas freit ès yièrs. Pouor vos dithe je n'la connaissait pon de d'vant, car si j'avais seu chein que j'sais achteu j'aurais envièth l'couosin Phlip et sa couosine lus faithe quatorze.
Viyant que l'couosin Phlip est un miot ordgilleux de sa sorte, j'voulis ly montrer que couomme ménagière Marie Hibou avait d'tchi être fière et ch'est d'antchi que j'prépari aun dinèth tchique chose couomme au Palace Hotel.
En v'chin le menu:-
Entrée.
Bênits, V'licots et Manchots.
Poisson.
Orfi, vertes crabes stuffées.
Volaille.
Un biau pirot que l'Sieur Caouain avait gagni – a chein qui m'a dit.
Roti.
Jambon d'bérisse du Mouothi.
Dessert.
De la gâche à crétons, de la gâche à fouée, des galettes, des corinthes, des monkeynuts, du bianc-mange, d'la cornflour, etc.
Couomme l'couosin Phlip n'est pon teatotler j'avais ieut d'la pitchette et couomme litcheux du gin de preunelles.
Vous pourrez dithe chein que vous voudrez mais ch'n'est pon touos les jours qu'nous peut faithe un ditet diner, même pon les siens qui vons luncher au Palace Hotel ou qui s'font jouaie d'assister au banquet d'la Royale.
J'avais dréchi la table de mon mus et quand nos couosins arrivites touot était prêt. Allons, que je lus dis,mettous à table et d'un bon n'v'la l'Sieur Caouain qui saute au cou d'la couosine du couosin et l'embrache!!
L'couosin en d'vint blianc couomme un lincheux. Quant à mé j'failli tchès bas de dithét affront. Mais l'cauain s'mint à rithe et nous montri le miot de mistletoe qu'il avait amathé avec du filin au pliafond.
“Ch'est la couotume et une buanne vieille couotume,” qui s'fit. Et tch'est que j'pouvions faithe sinon d'en rithe, mais m'est avis que la couosine en fut la pus contente de touos.
L'couosin et sa couosine étaient d'un bord de la table et mé et l'Sieur Caouain d'l'autre bord.
Touot alli d'charme. Le Sieur Caouain avait du bagout couomme quatre. Sa vaisine, la couosine au couosin, était en jouaie et sembliait un miot excitée.
J'en étions au jambon de bérisse quand patatras n'v'la l'Sieur Caouain qui s'affale à bas et qui capsize les cases à patates qui m'servaient de drécheur et ce fut une salade de bianc-mange, de gâche, de galettes, de cornflour.
La couosine ly en pouffait de rithe, couomme s'il y a d'tchi rithe du mâ d's'autres. L'Caouain poussait des brès viyant qu'il avait été brulé à la fâche par l'poudin d'riz que j'venais d'haler du four.
L'couosin n'comprenait mot à touot chunna. Savous tchi en fut la cause?
J'vas vous l'dithe mé. Che fut un p'tit revenez y du Sieur Caouain. Couomment? Ch'est en voulant coudpiser sa vaisine sous la table que l'Sieur Caouain mantchi son coup et ch'est pouor chunna que la couosine en pouffait d'rithe.
Achteu ch'est mé qui en pouffe de rithe d'vant les pliaintes de chut oisé d'malheu. Faut pon l'dithe au couosin! djia! car y s'rait si marri qu'il ne nous apporterait pus d'patates pendant la saison.
Pour quant à mé, pus d'autres invités sièz nous, que chunna sait pour Xmas, l'prumi de l'an ou n'importe tchi fête. Chein que j'regrette l'pus ch'est chu blianc-mange qui fut touot gazouillé et ch'tait de tchi buan viyant que j'en avais gouoté un miot d'vant l'mettre sus l'drécheur.
Quant au Sieur Caouain, il ven achteu sus l'mus. P't'être que ch'est l'ieau de canelle qui ly a fait du bein.
A touos et a chacun, une raide buanne année.
Marie Hibou
Les Chroniques de Jersey 28/12/1935
Viyiz étout: