A Moussieu l'Editeu.
Moussieu, - Ou z'allez être désappointès, mais pas pus qu'mé. J'vos envie chu p'tit mot ichin pour vos guerni (j'sis à êp'ler d'man mus mais j'n'ai pas l'habitude d'êcrithe et ou m'extchusethez) que le pouorre Caouain a dispathu!
Il avait qu'menchi à êbauchi un êcrit pour la gazette, car sus le drièthe d'une couvertuthe de boëte à coco j'ai trouvè des mots entouor une êlection, des Mont Madotins, des St.-Ouannais, un présent de vingt chinq mille louis, et un tas d'autres choses mais je n'peux pas en faithe ni fond ni coupé et faut attendre qui r'veinje - si j'amais nou le r'vait pour en savair l'effet.
I' s'nallit hier matin, en disant qui d'vait suivre une tchéthue pour happer des mulots, mais i' n'est pas r'venu. J'ai fait tout l'tout du clios et n'y a pas signe de veue du pouorre ouaisé. Je crains qui n'ait restè embrontchi dans des rachines de paivres à ch'vaux et que la terre n'ait 'tè toùannèe sus san co, de sorte qu'il est souos la biête à l'heuthe qu'il est, tout probablièment.
Toute la famille est inconsolabl'ye et j'allons nos mettre en deu s'i ne r'veint pas.
Sa veuve toute engroutèe,
Marie Hibou.
P.S. - Il 'tait asseuthè à la "Prudential." Coumment faut-il que j'faiche pour avair les sous, et èche vrai qui r'tcheinnent tchique chose du montant quand n'y a pas de frais d'enterrement à payi? Che s'sait honteux s'i l'faisaient dans un cas comme chonnechin.
Les Chroniques de Jersey 15/12/1917
Viyiz étout: