La modestie m'empêche de m'vanter trop du rétentissement causé dans l'île par m'n articlye de Samedi passé, mais je sis seux que mes lecteurs appréciêthont l'augmentation dans l'nombre des volontaithes qu'en a 'tai incontestablyement le rêsultat direct. Même les membres des Etats en furent si êmouvés qu'i' s'réunirent tous à une séance spéciale pour distchutter la tchestion. Et je crai bain que comme mé ou z-avez tous 'tai agréablyement ravis des sentiments patriotiques de nos messieux.

Je n'tais pas présent à l'assembliaie mais à en jugi par les discours prononcés par plusieurs membres, des discours qu'ont 'tai publiés dans les gâzettes, i' sembliaithait quâsi que je sommes sus l'point de les vaie tous lus en aller au front. Je n'pouvons pas permettre une patheille calamité par exemplye!

Et je n'sais pas si ch'est que par nos anciennes louais et constitutions, ils en aithaient réelement l'drouait.

I' sont vos serviteurs oquo au but du compte, ch'est vous qu'en avez nommé la pus grand' partie pour remplyi les postes qu'ils occhupent et je n'crait pas qu'i' peuvent abandonner ches postes-là d'un moment à l'autre, que j'séyons en djerre ou pas, sans votre permission.

Nennin, garçons, applaudissez-les tant qu'ou voudrez pour lus patriotisme et lus sentiments djerriers, mais en même temps défendez-lu de sorti l'pays.