Les Pages Jèrriaises

J'n'sais pon tchi sorte d'Noué que vous avez passé, buannes gens

J'n'sais pon tchi sorte d'Noué que vous avez passé, buannes gens, mais j'espèthe bein que n'v'la qui fut pus pliaisant que sièz nous.

D'vant d's'n'aller à l'office, la serveille de Noué, oprès l'thée, l'Sieur Caouain s'fit que p't'être bein qui s'rait un miot tard à rentrer, viyant qu'il avait promins d'aidji à vendre des almanachs et que l'office n's'rait pon frumée d'vant les onze heuthes du sé.

Achteu qu'il y a des buses qui vont courre dans touotes les paraisses de l'Ile, pour seur, qui s'fit, que les gens d'la campagne allaient lus en v'nir à la ville par sentaines et ch'est d'antchi qu'il y aurait hardi de travas à l'office pouor servir touos les cliants. Et pis, couomme y s'fit: Tu sais bein Marie que ch'est l'temps des Xmas Box.

J'ly dis que j'avais laissi à l'office, à la garde de Mess Simon, un pagat qu'il n'fallait pon oublier d'm'apporter et n'v'la qui fut entendu d'même.

Oprès avèr scrobbé la tchuisine et netti l'saucepan, je me mins à ravauder des cauches - pon pour les pendres dans la chuminée pouor seur - mais quand j'entendis souonner minièth à l'horlouoge de l'Eglise de la Ville, j'pensi que j'avais attendu assez longtemps l'Sieur Caouain et j'allis m'erposer.

J'tais à rêver qu'un amin m'avait fait présent d'un biau motor pouor mon Noué quand j'fut réveillies par un tintamarre. Ch'tait l'Sieur Caouain qui v'nait de rentrer et qui s'était trébuqui avaut les dégrets!

Et ch'est qu'il en chantait! J'pensis à mé même l'mus ch'est de faithe minne de n'rein entendre et j'l'oui satchi une demi douzaine d'allumettes, s'faisant: Là v'la tchèest que ch'est d'acater des allumettes à un chelin la grosse, y n'prennent pon en touot! Oh, tchi minsèthe de vie! Enfin il alli s'couochi et s'mint à ronflier couomme l'engin à Mess Cappelain.

Deux ou trais heuthes pus tard, s'fut une autre chanson! Touot touorner à chein qui disait et il avait mâ au tchoeur. Pouor seur ch'est l'flu, qui s'fit, et ch'est dans la boutique que j'ai attrappé chunna.

J'l'y réponni que ch'tait p't'être bein ailleurs, viyant que j'savais bein que la boutique était frumée deux ou trais heuthes d'vant qu'il était rentré.

Savous cheine qu'y m'dit? Eh bein, y m'dit que l'boss l'y avait douonné l'ordre d'aller à la messe de minièthe à la Catholique vais chutte cérémonie pouor en mettre un rapport dans la gazette! Des menteries pouor seur.

Je le laissi s'erposer un miot. D'ver dièz heuthes j'pensi qu'il tait temps de préparer notre fricot d'Noué, mais iou qu'il avait mins l'pagat? J'voulis l'réveiller pouor saver iou qu'était chu pagat dans tchi j'avais mins une sauchisse pouor stuffer les deux pigeons que l'Sieur Caouain avait gaffé sus la Place du Vièrr Marchi, tandis que l'amin George, l'sien à la tunette à saluette et à la casaque avec brass buttons était à écouter sa Missis ly lièthe la gazette dans son parleur qui s'adonne du bord d'Hill Street. Pas moyen de réveilli l'Sieur Caouain. quant vint un temps y s'mint à chantonner, touot endormi "Another little one, another little one."

N'v'là qui m'alarmi et j'pensi que ch'tait p't'être la fiève qui l'faisait chantonner d'mètme et je m'dis p't'être bein qu'oprès touot il est malade. Touot d'un coup y s'mint à pousser un brait et s'fit: Oh! ma pouore tête s'en va en sauter!

Ch'n'est pon avec ce qu'il y a dedans, que je l'y dis, mais couomme il n'prenait pon avis à mé et était blianc couomme une chiquette je m'décidi d'aller trouver l'boss pouor saver s'il fallait faithe v'nir le vet.

L'boss était à fumer une grosse cigare, ieun qu'il avait ieut de douonner pour Noué pour seur, car ch'n'est pon ly qui voudrait en acater avec ses sous. J'ly raconti dans tchi triste état s'trouvait l'Sieur Caouain et savous chein qu'y me réponni? J'sis bein aise d'apprendre qu'il est malade, car n'v'la qui l'y apprendra à mettre un p'tit pus d'ieaue.

Caouain
31/12/1932
 

Viyiz étout:

 

Les Pages Jèrriaises