Les Pages Jèrriaises

Je voudrais saver, mé

Je voudrais saver, mé, pourtchi que l'Editeu des Chroniques se permins, Samedi passé, d'imprimer les sottises que Marie Hibou avait êcrit sus man co. D'abord, je proteste contre la désécrations de ma colonne de chute maniéthe-là. Ch'est m'faithe une insulte, un ouaisé sage, instruit et intelligent comme je sis, de prétendre rempliaichi mes êcrituthes par le radotage à Marie Hibou.

Il est vrai que j'avais dispathu pour tchiques jours la s'maine passée, mais au temps critique dans tchi que j'vivons acheteu, i' n'est pas tréjous possiblye pour un personnage de m'n importance de divulguer ses opéthations à toutes sortes d'tchuthieurs.

Marie Hibou était sous l'impression que j'étais à suivre une tchéthue pour happer des mulots, et que j'avais 'té tout probablyement enfoui. Eh bain, qu'on pense chenna si on veur, che s'sait damage de la désillusionner...

Mais, je m'attends bain qu'ou s'en va être bain désapointée de vaie qu'ou n'peut pas oquo touchi le montant de m's asseûthance. Ou vîtes bain par sa lettre que ch'tait-là la prumié chose qui li vint à l'idée quand ou s'aperchu que j'mantchais. evidemmment je li vaudrais mus mort qu'en vie, mais "wait a bit," ma vieille, le Caouain ne châque aqouo au manche, et pis quand-même qu'i' li arrivethait un accident ne t'fait pas trop seuthe que che s'sait pour té les sous, i' y a telle chose comme un testament, tu sais!

* * *

Je vai par les gâzettes que la race ouaiseline est appréciée en Dgèrnesi.

A lus êlection l'aut'e jour les êlections dgernesiais pliaichirent au haut d'la liste des Députés un moussieu du nom de "Drake," ch'qu'qui veurt dithe en jerriais "Maillard." Et che n'est qu'juste ettou! Je sus seux que si ch'est qu'i' y avait ieu un "Picot" parmi les candidats i' s'sait v'nu gentiment haut ettou. Ou pouorrethiez oquo vaie le Caouain li-même Bailli d'Jêrri, tchique jour.

* * *

Mais, en pâlant d'picots, v'là tchi m'fait penser que ch'est la s'maine tchi vaint, Noué! ch'nest pas que j'voudrais suggéther à mes lecteurs de m'en envier iun; j'ai grand peux que che s'sait perdre man temps. J'y ai êprouvé pour bain d's'années, mais que ch'fusse que je n'm'étais pas exprimé assez cliaithement ou bain qu'i' n'entendaient pas de ch'tte ouotheille-là, jamais i' n'y en a ieu d'laissis au bureau pour mé.

Enfin, tréjous ch'est comme je vos ai dit, ch'est la s'maine tchi vaint Noué et je manquethais à man d'vé si ch'est qu'je n'faisais pas comme d'habitude touos mes miyeurs souhaits à mes lecteurs et à mes ammins.

Le "manque d'espace" et l'êcarcité du papi ne m'permet pas de vos ênumether tous, et pis d'ailleurs je n'saithais pas par iou c'menchi ni iou fini. J'en ai d's ammins, ou savez!

Si ch'est qu'ou voulez vos en former une idée, ergardez dans autchun "Directory." Opprès chonna ajouotez-y es noms des siens qu'y sont mentionnés toutes lus femmes et lus êfants, les domestiques et les servantes, enfin pour en r'pather pus court, j'ai l'honneur de compter parmi mes ammins touos les habitants de l'île de Jerri sans pâler d'une multitude dans des pays ètrangièrs.

Conséquemment, le Caouain souhaite "Un Bouan Noué" à tout l'monde, sans autchune exception.

Caouain
Les Chroniques de Jersey 22/12/1917
 

Viyiz étout:

 

Les Pages Jèrriaises