 Ch'est eune vaque Jèrriaise 
|
En présentant la proposition du Conmité d'Agritchultuthe au mais d'octobre, lé Président, lé Député Harry Baudains fit allûsion à l'histouaithe dé la bête à lait Jèrriaise et à la position împortante qu'oulle à pour sa production d'lait partout l'monde au jour d'aniet. I' pâssit la r'merque qué toute vaque Jèrriaise au monde, qu'est la race dé bêtes à lait la deuxième pus nombreuse, peut tracer ses anchêtres à l'Ile dé Jèrri.
Des plians et prépathâtis pour eune înmense variêté d'êvénements duthant l'année sont en main, comprennant l'êducâtion, lé fèrmage, lé tourisme et autres aspects dé la vie d'l'Ile. La chose împortante es'sa l'inaugurâtion d'eune sculputhe en bronze d'un troupe dé bêtes Jèrriaises dé grandeu naturelle, duthant la visite des membres du Bureau Mondial dé Bêtes Jèrriaises au mais d'Septembre 2001, et i' s'adonne qué ché s'sa lé 50ième annivèrsaithe du Bureau Mondial dé Bêtes Jèrriaises. Lé Bureau fut formé suivant eune conférence qu'eut lieu en Jèrri en 1949, et qui fut couronnée dé succès. A la fîn d'la conférence un janne Améthitchein Lea Marsh qui faisait l'êlevage dé bêtes Jèrriaises, suggéthit qu'eune organisâtion fûsse établyie pour continuer lé dêbat sus lé dêvloppement d'la race à l'av'nin. Des plians fûtent faits dans l'couothant des deux préchaines années et en 1951 lé Bureau des Bêtes Jèrriaises fut formé. A c'menchi, les associâtions pour l'êlevage dé bêtes Jèrriaises dans dgiex pays, dévintent membres,et au jour d'aniet y'a vingt-sept pays qu'en sont membres auve des membres îndividuels dans pus d'quarante pays. L'ordre dé créer la sculputhe dé bêtes Jèrriaises à causé un divèrs întéthêt parmi les sculpteurs du Rouôyaume Uni, et d'la France.
La comission à té donnée à un membre dé note dé la Sociêté Rouoyale dé Sculpteurs dé La Grande Bretangne, John McKenna, qu'a eune expéthience dé sculputhes dé toutes grandeurs et dé lus matériels. La sculptuthe es'sa d'eune mode classique et es'sa pliaichie dans un endrait spécial dé la ville dé St Hélyi.
Le conmité auve Mme Anne Perchard, Présidente du Bureau à la tête, est dêja embarassé à faithe les prépathâtions pour lé programme d'èvenements en 2001; lé drein étant dé pliaichi la sculputhe.
Duthant eune entréveue tout dèrniéthement, la Présidente dit qu'il' espéthaient d'aver tout l'support possibl'ye pour chutte entréprînse, du peupl'ye dé Jèrri, et des sieins qui font l'êlevage dé bêtes Jèrriaises, et des gens întérêssis partout l'monde. La sculputhe es'sa un tribut pèrmanent à la vaque qu'a 'té si împortante dans la vie des Jèrriais et dans la cheinne des fèrmièrs des bêtes Jèrriaises partout l'monde.
Les rêunions du conmité du Bureau Mondial des Bêtes Jèrriaises éthont lieu en Jèrri au mais d'Septembre et les êleveurs dé bêtes Jèrriaises dé partout l'monde es'sont faits les bein'v'nus, et il est espéthé qu'i' trouv'thont bein du pliaîsi dans chein qui dév'tha être un temps intérêssant et exceptionel.
Anne Perchard
Viyiz étout: