Les Pages Jèrriaises

Pour vos amuser

Eune vaque Jèrriaise V'chin une histouaithe que j'ouï l'aut'e jour au “Show” à l'Arsenal de St.-Martin. Un Moussieu qu'était à r'garder les Juges chouaîsi la pus belle bête pour la “sweepstake” dit à une autre opprès que l'riban fut donné, “Nou dithait quasi que la vaque lyi-même pathaîtrait erconnaissante pour l'honneur qu'i' li ont fait.”

“Mais sans doute, l'autre li raîponni, ou pathaissiz vos en motchi, mais savous bain que che s'sait pas la prumié feis que des bêtes féthaient preuve de lus gratitude. Je me r'souvains un jour, je ouiyais une bûlelie abominablye tout auprès du canal de Samarès et quand j'fus vaie tch'est qu'i' y avait, je trouvi une pouore vaque à faithe du train sus l'bord de l'ieau.

Dan viau était à s'nier dans l'mitan du dout.

Je n'hésiti pas mé mais j'sauti d'dans à l'ramasser et je l'rameni sus la banque.

La pouere mèthe se mins à l'litchi pour le rêcauffer et dès qu'ou s'aperchevi qu'il 'tait oquo en vie ou s'en vint et s'min à m'litchi ettou, ch'tait la seule méthode pour me têmoigni sa réconnaissance.

Tch'est qu'ou criyiz de chenna acheteu?

“Eh bain, l'autre raîponni, je n'crai pas que ch'en 'tai là la raison du tout.”

“Oh vraiment! pourtchi qu'ou m'litchait, don?”

“Tout simplyement parceque la pouore bête criyait qu'oulle avait ieu des jumiaux!”

Lé Caouain
Les Chroniques de Jersey 15/5/1920

 

Viyiz étout:

 

Les Pages Jèrriaises