Né v'chîn coumme tchi qu'nou fit lé cidre au Mangni d'Sanmathès au mais d'Août 2000.
Lé tou d'preinseu est au mitan du bel. I' soulait êt' dans un bâtisse tchique bord mais i' fut èrbâti ichîn y'a tchiques années.
Coumme nou peut vaie, il a 'té plianté auve des flieurs - mais nou peut l'faithe sèrvi pouor êcrâser les pommes pouor lé cidre.
Les bouêtées d'pommes sont dans la vainne. Ch'est les mousses tchi lus otchupent des pommes, mais pouor c'menchi i' faut att'ler lé j'va (tch'a nom Sam).
Y'a un tas d'vîsiteurs ichîn aniet à vaie la faith'thie d'cidre et à d'mander des tchestchions.
Nou vèrse les pommes dans l'tou d'preinseu. Lé j'va marche et hale la meûle tch'êcrâse les pommes. I' faut touônner les pommes pouor asseûther qu'toutes les pommes sont bein êcrâsées.
Quand les pommes sont prêtes, i' faut les transféther au preinseu.
Les mousses sont à travailli dû à remplyi les boutchets auve les pommes êcrâsées.
Aut'fais nou faisait sèrvi d'la pâlle pouor faithe les couoches dé pommes, mais achteu ch'est pus commeun d'faithe sèrvi du cannevas.
Ichîn au Mangni y'a deux preinseurs.
Nou met un cannevas sus l'amet et pis nou vèrse les bouqu'tées d'pommes sus l'cannevas pouor faithe eune couoche. Ch'est faithe la motte, ou couochi l'mar. Quand y'a eune bouonne couoche, nou couvre la couoche.
Pis nou met acouo eune pièche dé cannevas sus, et pis nou-s'ajouôte acouo des pommes.
Auve lé paids des couoches dé pommes, lé jus est dêjà à puther dans l'tchué.
Et pouor l'aut' preinseu, i'faut faithe sèrvi d'la pâlle entré les couoches dé pommes.
Ichîn nou vait l'Seigneu d'Sanmathès à vèrser eune bouqu'tée d'pommes dans chu preinseu.
Tchi mangnifique journée!
Viyiz étout: