La Ville a bein changi d'pis l'temps quand les c'mîns 'taient bliotchis, duthant la saîson, par des vainnées d'bathis, quand lé d'si d'châque fèrmyi 'tait d'env'yer s'n avoût au Bridge à seule fîn d'èrchéver l'miyeu prix. Iun des pus împortants produits 'tait l'cidre, dé tchi d's ochéans fûdrent exportés d'la caûchie d'Saint Hélyi. Au c'menchement du dgiêx-neuvième siècl'ye, un quart d'l'Île 'tait plianté d'auve des gardîns à pommièrs, et en 1839, eune seule année, 268,199 gallons d'cidre fûdrent exportés en Angliétèrre. Nou b'vait du cidre étout dans les cabathets et siez sé (n'oubliez pon qué, d'vant les r'formes du Connêtabl'ye Pièrre L'Sueux, l'ieau d'la ville n'tait dgéthe bouonne).
Y'a dans les trente ans, la Rue d'Driéthe et la Ruette Hadgais fûdrent pavées, et nou-s'embellit la carre en y pliaichant un tou d'preinseu. D'pis mil neu chents septante-huit lé tou d'preinseu a 'té là, mais combein qu'i' y'a d'gens et d'vîsiteurs tchi l'èrconnaîssent achteu? Et chenna sustout quand ch'est tout plianté atout des flieurs.
La production d'cidre fut rempliaichie par la tchultivâtion d'patates, et pouor 1880 Saint Hélyi n'tait d'aut' un grand exportateux d'cidre, et les gardîns à frit à l'entou d'la Ville fûdrent passecrits. Tout coumme lé tout d'preinseu dans les rues pavées nos ramémouaithe not' histouaithe êcononmique. "Vive lé cidre, lé cidre tchoeuthu! Lé cidre est remplyi dé vèrtu!"
Geraint Jennings
Viyiz étout: