à Portinfé, Saint Ou,
Vendredi au sé.
Moussieu l'Editeu,
J'si content d'vos dithe que ma Merrienne est de bouonne humeur chais jours. Sans doute ch'est l'temps, car j'ai veu l'contraithe pûs d'une fais. J'me r'souveins d'une bordée, y'a bein d's années, quand pour prèsque une sémaine ch'tait achie après achie le long des jours, et y'avait des mathes d'ieau partout. Mé, j'prenais chonna comme i' v'nait, mais ma bouonnefemme ne faisait que r'oupillyi, et de niet ou m'touônait l'dos et je n'pouvais pas en appréchi. Comme ou pouvez craithe, Moussieu, chonna est bein du à enduther pour un homme de ma dispôsition, et si l'temps n'avait pas changi et dév'nu bé, j'éthais 'té forchi d'aller vaie l'Connêtablye pour li d'mander de m'trouver une autre femme. Heutheusement, le solé dêshallit justement en temps, et je n'eus autchun troublye après. Tchi drôle de créatuthes que les femmes, Moussieu!
Man grand, le Bram, vînt nos vaie hier au sé pour nos annoncer que la Bella avait produit un autre mousse, un garçon chutte fais. J'bûmes un lermin à la santé du p'tiot, mais quand l'Bram s'en r'fut, la Merrienne me dit que l'Bram et sa Bella dév'thaient à ch'teu' arrêter.
"Et pourtchi?" j'li d'mandis. "Quand tu étais d'lûs âge tu n'pâslais pas d'même, et j'n'en avons pas 'té d'piéthe."
"P't'être bein," ou dit, "mais dans chais temps-là ch'tait difféthent. A qu'menchi, une femme n'allait pas à un hôpita pour aver san mousse. I' 'tait né dans la bouonne chambre, et si l'docteu arrivait un mio tard, nou s'en pâssait. Epis i' n'y avait pas de chais grandes réceptions à tchique hôtel. Après une sémaine ou deux tchiques pathens et amins v'naient féliciter la méthe et nou lûs donnait de l'ieau d'canelle. Les vielles-filles surtout aimaient l'ieau d'canelle, et pûs d'une fais, j'en ai veu tchi n'marchaient pas trop drait en lûs en r'allant siez-yeux. Le bâptême né couôtait rain, et nou payait l'docteu quand nou pouvait, tchiquefais après d's années. Comme j'te dis, Ph'lip, ch'tait bain difféthent."
Après chonna, Moussieu, j'nos mimes à pâsler du Pape et des Catholiques et général. "Ch'tait un bouon homme, le Pape," s'fit la Merrienne, "et nou-s-étha une djobbe à l'rempliéchi. Quand j'tiomes jeunes, té et mé, les Catholiques ne comptaient pas pour grand chose dans l'Ile. Té r'souveins-tu que quand nou-s-en rencontrais yun, nou marchait d'l'autre bord d'la route?"
"Oui," j'li dis, "et bein souvent nous li fliantchait une piêrre à la tête, car nou n'avait autchun respect pour lûs réligion. Et j'té dithais, Merrienne, la raison pourtchi qu'les Catholiques sont pûs forts en Jêrri agniet que touos les Protestants mîns ensemblye. Ch'est parsque un Protestant peut apparteni à autchun de pûs d'une doûzaine dé tchultes, mais pour un Catholique i' n'y a qu'une réligion et un tchulte. Epis i' faut admettre étout qu'un prêtre catholique ne d'mande pas un grand salaithe, et est content avec bein p'tit."
"J'ai même oui dithe," ou r'mertchit, "que y'en a tchi r'chèvent au tout rain qu'un louis la s'maine. Nos Recteurs paient pûs que chonna à lûs domestiques."
"Vèthe, sans doute," j'li dis, "mais le prêtre se pâsse de domestique, et d'même n'est pas gêné. À ch'teu', bouonnefemme, laissons les Recteurs, les prêtres, les ministres et tout l'restant à lûs ramâsser. Sans doute, i' pouôrront s'accorder quant i' veindront tous d'l'autre bord, et ch'n'est pas à nous de nos imaginer tchèsqu'i' trouv'thont là."
Mé v'là bétôt fini pour agniet, Moussieu, car je n'si pas ocquo bein raide et i' faut que j'me r'pôse. À la s'maine tchi veint!
Ph'lip
Viyiz étout: