Moussieu l'Editeu,
“As-tu r'mertchi,” j'd'mandit à la Merrienne hier au sé, “qu'au grand mathiage la Princêsse promint d'obeï s'n'homme?”
“Pas pûs qu'chonna,” ou raiponnit,” mais pourtchi qu'tu d'mande?”
“Parsque j'voudrais t'r'am'né à la mémouèthe que tu fit la même promêsse le jour que j'te print pour chen qu'tu valais.”
“Quant à chonna,” dit la Merrienne, “il est possiblye que je n'valais pas chi, mais au mains j'éthais fait pûs en vendue à l'encan que l'objet tchy s'trouvait, aupi d'mé chu malheutheux jour-là. Mémée m'avait tréjous dit que j'm'en r'pentithais, et oulle avait raison.”
“Ch'n'est pas là la tchestchon,” j'l'y dit sévèthement. “Tu promint au ministre, d'vant tout l'assemblyée que tu m'obëithais ta vie duthante, mais l'préchain matin quand à chinq heuthes j'te dit d'te l'vé pout traithe les vaques tu m'dit d'allé m'faithe quatorze.”
“Mais ben seûx,” ou s'fit. “Etait-che là une chose à me d'mandé dans les circonstances? Ch'tait l'idée d'un imbécile.”
“Et quand j'r'entrit avec le lait,” j'continuit, “et que j'ramontit à haut te dithe que j'voulais man dêjeuné, tu m'fliantchit un ouôsillyi dans la cabiche et m'dit d'fichi man camp et d'freumé la porte.”
La Merrienne se mint à rithe.
“Vèthe,” ou s'fit, “et tu d'valit les d'gréts, man pouôre Ph'lip, comme un tchan fouôté. Mais tu n'm'en voulit pon, car j'me r'souvains qu'dans les djais heuthes tu m'apportit une tâsse de tais et une galette.”
“Ch'tait une idée tchi m'vint,” j'l'y dit. “J'pensit qu'après tout j'éthais deu t'laissi dormi et tchi n'fallait pas qu'menchi notre vie ensemblye en ayant du brit. Mais, avec chonna, ma chiéthe, tu-avais promint.”
“Je l'fit parsque je n'pouvais pas faithe autrement,” ou dit, “mais mémée m'avait dit que ch'la n'signifiait rain. Et ben seûx et certain qu'ou n'm'avait pas donné un bouon exemplye. J'éthais voulu vais pépee l'y donné un ordre. Y'en éthait yeu un pâtafiâs.”
“Si ch'est d'même,” j'l'y dit, “pourtchi mettre chonna dans l'service du tout?”
“Je n'sait pon,” ou raiponnit, “car ch'est du gniolin. Allons, ne v'la djais heuthes. Il est temps d'allé s'couochi. Allume la chandelle.”
“Allume-la te même,” j'l'y dit. “Ch'est mé tch'y donne les ordres ichin. A l'av'nin tu f'thas comme j'te dithai.”
La Merrienne se l'vit. “Oh, ch'est d'même, ou s'fit. Eh ben, J'allons vais. T'en vas-tu allumé chutte chandelle-là?” Et ou gaffe la bringe.
Moussieu l'Editeu, j'n'ai pas besoin d'en dithe pûs long.
Ph'lip
22/11/1947
Viyiz étout: