Trenton,
Lé 18 dé juilet, 1981.
Michigan, USA.
"Bon!" Manman lî dît, "ou n'mé pathaîssiz pon mal habilyie, pourtant. Et ch'n'est pon l'habit tchi fait l'mouaine!"
"Nan", ou s'fît, "mais i' lî'aigue hardi! Mais, en pâlant d'mouaines, j'mé sis souvent d'mandée tch'est tch'est la difféthence entre un mouaine et un prêtre. N'sont-i' pon touos les deux prêtres comme les Jésuites que j'viyons par les c'mîns? I' sont touos Catholiques n'est-'ch'ti-pon?"
"Véthe," Manman lî dît, "nou veut dithe tch'i' sont touos Catholiques Romains. Ch'est à dithe les cheins qu' nou vait en Jèrri. Mais y'a des mouaines et des nonnes dans nouot' Églyise Anglyicanne étout - ouaithe qu' un tas d'monde ichîn n'lé savent pon viyant qu' l'Églyise Anglyicanne n'a pon d'monastaithes ni d'couvents en Jèrri. Y'en a plusieurs en Angliétèrre, au Cannada, en Améthique et aut' pays. Un mouaine n'est pon tréjous un prêtre. Les Jésuites qué nou vait ichîn sont généralement des prêtres, ouaithe qué cèrtains êtudiants dans lus collège lus habillent en nièr étout et y'a un tas d'monde tchi les prannent pour des prêtres".
"Pour dé mé," nouos dit Missis Lé Sbithé, "ch'est touos les Quoac Quoacs comme des nièrs corbîns, ches Jésuites-là et j'en ai peux, mé!"
"Bon!" s'fît Manman, "pourtchi en aver peux? I' n'font pon d'ma à pèrsonne, et i'sont bein polis. Ou n'avez pon d'peux d'nouos Minnistres et i' sont prêtres étout sénon qu'nou l's appellent des Minnistres. Èrgardez Moussieu Bichery, don. N'en v'là iun. I' n'y'a pon un homme pus charmant qu'li. Ou n'avez qu'à d'mander à la Tante Vine."
"Véthe dgia," s'fît Missis Lé Sbithé, "j'ai même ouï tch'i' va mangi siez Mait' Ph'lippe Hamon quand i' veint prechi à St. Georges. Un bouan vièr corps, Moussieu Bichery. I' fait des courts sérmons - un exempl'ye pour les aut' Minnistres!"
"I' c'menche à êt' rond d'êpaules," s'fît Manman. "Nou vait bein tch'il a vieilli à ches drein, mais i' marche acouo comme un janne homme."
"Nou sé d'mande pourtchi qu' touos ches Quoac Quoacs-là lus en veinnent en Jèrri quand y'a bein pus d'run pour ieux en France," s'fît Missis Lé Sbithé. "Et pis i' laissent lus femmes et fanmil'yes là-bas."
"Lus famil'yes, véthe," Manman lî dît "mais i' n'sont pon mathiés. Les Jésuites et les prêtres dans l'Églyise Catholique Romaine né sont pon pèrmîns d'lus mathier"
"Eh bein, n'en v'là eune drôle dé régl'ye!" ou s'fît. "Nou pâle dé corbîns, mais jé c'menche à penser tch'i' sont des drôles d'ouaîsieaux, mé. Et mé tch'avait peux d'ieux - ch'est ieux tch'ont peux des femmes!"
"Nou-fait!" Manman lî dît. "Ch'est qué l'Pape né l'pèrmet pon. Ch'est un avantage pour l'Églyise Romaine sus bein des sens. Nouos Minnistres lus mathyissent et il' ont à gângni et tcheûter assez pour maintnîn femme et fanmil'ye. Et êtant êdutchis i' faut env'yer lus êfants au collège. Et i' faut qu'la pâraîsse lus fournisse un probytaithe et l'maintnîn étout. Et l'Minnistre est fourchi d'pâsser eune partie d'san temps à souangni d'sa fanmil'ye à la pliaiche dé l'donner entchiéthement à l'églyise. L'Églyise Romaine est pus malinne. Lus prêtres, n'êtant pon mathiés, peuvent donner tout lus temps, sept jours la s'maine, à lus eglyise. Et i' peuvent vivre eune demié douzaine dans l'même probytaithe, et travailli pour presque rein viyant tch'i' n'ont ni femme ni êfants à souangni et êl'ver."
"Les Brétons tchi veinnent dêfoui les patates," s'fît Missis Lé Sbithé, "n'sont-i' pon Catholiques étout?"
"Oui dgia!" Manman lî dît "Eh bein," ou s'fît, "pourtchi tchi veinnent à nouot' églyise quand i' restent ichîn comme domestiques auprés la saîson?"
"Ch'est bein aîsi à comprendre," Manman lî dît. "I' vaient eune églyise tchi r'sembl'ye à la leu, un Minnistre tchi met eune soutane et eune p'lisse comme lus prêtres. Tchiquefais l'sèrvice est en Angliais tch'i' n'comprennent pon, mais comme i' n'savent pon l'Latîn dans lus églyises ni n'tout vlà tchi lus fait pon grande difféthence. Mais comme mé l'disait Moussieu Pépin l'aut jour, lé temps veindra qu'l'Églyise Romaine s'en va s'appèrchéver d'chutte situàtion et f'tha d'san mus pour les faithe èrtouanner câsaque!"