À chein tchi pathaît y'étha un parti Consèrvateu d'Jèrri tchi s'en va s'mett' sus les rangs ès préchaines êlections. Nou-s'éthait creu qu'des Consèrvateurs Jèrriais éthaient voulu consèrver la Constitution, mais nou-fait, nou dit qu'i' lus en vont proposer un tas dé r'formes.
Ch'est en tchi les strades ès rêunnions êlectorales lus en vont êt' chèrgies coumme des moûques à myi si touos les cheins tchi voudraient proposer des r'formes lus laîssent porter candidat. Bein seu qu'touos ches supporteurs dé r'formes né sont pon d'avis entouor tchi r'formes sont nécessaithes et nou-s'en va ouï acouo du hèrtchîn entouor les taxes et tout chenna d'vant l's êlections d'l'année tchi veint.
D'pis d's années nou-s'a ouï, s'lon les cheins tchi sont contre les partis politiques, qu'les Jèrriais n'ont pon 'té accouôteunmés à voter pouor des partis. Mais nou-fait! Car s'ou d'meuthez dans eune vielle maîson tch'a un louothi ou un rôsyi êtablyi d'pis bein longtemps dans l'gardîn, y'a toute eune pôssibilité qu'lé propriêtaithe temps pâssé 'tait du parti du Louothi ou du parti d'la Rose. Les Louothièrs 'tait les consèrvateurs tchi voulaient prêsèrver la vielle constitution, quandi qu'les Roses 'taient pouor eune pus grande démocratie.
Pièrre L'Sueux, lé grand Connêtabl'ye èrformateu dé Saint Hélyi du mitan du dgiêx-neuvième siècl'ye, et dé tchi l'monument est iun des pus bieaux ornéments d'la Grand' Rue, 'tait du parti d'la Rose. La tchaîse du Connêtabl'ye dans la Salle d'Assembliée d'la Salle Pârouaîssiale dé Saint Hélyi a des roses stchulptées sus.
Et y'a ieu d'aut's partis en Jèrri avaû l's années, mais au jour d'aniet les Membres d's Êtats sont pustôt des souô-dîthants îndépendants - ouaithe qué nou diche qué ches'-chîn sont d'chutte racachie-chîn et ches'-là sont d'chutte dgaîngue-là.
Nou pouôrrait compather la situâtion auve l'Île dé Man où'est qu'ès dreines êlections en 2006 24 membres fûtent êlus à la Chambre des Cliés (la bâsse chambre d'lus parlément) dé tchi trais 'taient proposés par des partis politiques - deux des libéthaux Manx et iun des travaillistes Manx. Chein tch'est r'mèrquabl'ye ch'est qu'la politique Manx a ieu des mouvements et partis nâtionnalistes - lé minnistre Manx dé l'agritchultuthe d'achteu soulait êt' membre d'un parti nâtionnaliste et même a 'té en boête pouor la brûl'lie d'bâtisses coumme protêt politique.
Ch'est à espéther qu'les Consèrvateurs d'Jèrri, s'il' arrivent à présenter des candidats ès êlections, lus en vont au mains consèrver nos vièrs bâtisses!
Geraint Jennings
Viyiz étout: