'J'pâlaimes y'a tchique temps', sé fit l'Ph'lip Desclios quand jé l'vis l'aut' sémaine à faithe son brancage, 'j'pâlaîmes dé partis dans l's' Etats, mais dis-mé, tchiqu'en est d'chu nouvieau parti, les Verts?'
'Ah, mon garçoun,' j'lis rêpounni, 'jé n'pouarrais pas t'en faithe eun bouan français, car jé n'crai pas qu'les Verts ieux-mêmes savent iou qu'il' en sount. Mais, à chein qu'nou's y coumprend il' ount bein des choses en lus faveu'. Par exemplye, i' sount countre toute chutte salop'rie qu'les fèrmiers mettent sus la terre coumme engrais ou pour tuer la sèrcl'ye. N'ya pas d'doute qu'à la loungue v'là tchi dêtruit la terré et empouaîsounne les sources éd'ieau. Té qui t'ércounnais dans l'Ecritures tu t'rappelles bein qué dans l'temps du Vièr Téstament ieunne des pièthes choses qué nou' pûsse faithe countre l'enn'mîn ch'tait d'empouaîsounner son pis. Eh bein, nos v'là à faithe d'ité, mais ch'n'est pas l'pis dé l'enn'mîn qué j'soummes en train d'empouaîsounner, ch'est l'nôtre. Là d'sus, les Verts ount raisoun. Et il'ount raisoun étout d'vouler préserver l'paysage et la campagne qué j'soummes à saccagi et à bâti d's'us partout.
'Mais, vé-tu,' j'countinui',"les Verts, pour la puspart, ount buonne volanté, mais ount-i' l' couorage nécessaithe? Dabord, si i' veullent vraiment qué Jèrri érdéveinne vert i' faudrait rêduithe la population dé tchiques dgiêxaines dé milles, et v'là tchi n'frait pas d'ma', car y'est v'nu en Jèrri ches dreinnes années un tas d'racâille dé tchi què j's'raîmes bein aise dé nos dêfaithe, et i'faudrait étout rêduithe dé bein pus qu'la maintchi lé noumbre éd touristes qui nos envahissent à loundgeur d'année. Mais tchi qu'en s'rait l'résultat? A la loungue jé s'raîmes bein mus qué jé n'soummes achteu, mais au court terme jé s'raîmes assez en embarrâs. I' parait qu'y'a tchiques membrés d's'Etats qui s'rendent coumpte qué j'soummes à galoper coumme des affolés sus l'mauvais c'mîn, mais in'tâchent qué d'nos ralenti la vitesse, pas d'nos faithe ertouônner. Et à m'idée, il en est d'même des Verts. Il' ount la langue bein pendue, mais jé m'd'mande s'il' ount bein êtudié la politique ou s'i' savent coumment s'y prendre. Et pis, jé n'pâle pas du parti ichein en Jerri car jé n'les counnais pas assez pour en jugi, mais j'sai bein qu'en Anglièterre y'a bein d'souôdisants membres qui n'sount pas Verts dutout - chest des Rouoges dêguîsées avec d'la verduthe pour enjôler les simplyes. Mais, dis chein qu' tu' veurs, n'y'a pas d'doute qué, si j'peux mêlangi mes couleurs, les Verts ount acquo les talouns jaunes. I' disent qu'i' s'en vount mett' des candidâts sus les rangs pour les préchainnes êlectiouns ès Etâts, mais jé n'crai pas qu'il' éthount ma vouaix. Ch'n'est pas qué j'lus veurs dé ma, bein au countraithe, mais je n'crai pas qu'il' ount l'expéthience qu'i' faut'.
Le Ph'lip se mint à ritounner. 'Et té', i'm'd'mandit, 'tu dis qu'i' n'ount pas l' couorage qu'i' faut, mais té, si t'avais l'déstin d'Jèrri dans la main éthais-tu l'couorage dé prendre les m'suthes nécessaithes pour nos d'fendre countre les malheurs qué tu nos prédis?'
Il est malîn, lé Ph'lip, mais s'i' coumptait d'm'attraper dans son piège i's'tait bein mêpreint. 'Bah, bah', j'lis dis, ch'n'est pas eunne tâche pour eun pouarre vièr malfichu coumme mé, qui c'menche à batt' dé l'aile. Chest des gas coumme té, acquo tout jannes, qui dévraient s'y mettre'
Le Ph'lip s'êcliatit d'rithe. 'Quand tu m'verras', i' s'fit, 'mé mett' sus les rangs j'té promêts qu'tu verras du feu d'satchi'.
Viyiz étout: