Lé rouai d'Argos, Acrisios, avait eune fil'ye, mais i' voulait des fis et n'en avait pon. I' d'mandit à l'oracl'ye pouortchi. L'oracl'ye né lî baillit pon d'explyicâtion mais prédit qu'sa fil'ye, Danaé, portéthait un fis tchi tueûthait san grand-péthe.
Acrisios enfreunmit Dané dans eune chambre dé bronze à seule fîn qu'ou n'pûsse pon rencontrer un houme et aver un êfant. Par les barres d'la f'nêt' dé chutte chambre tout coume, lé dgieu Zéus pouvait vae Danaé et i' la voulait. À seule fîn d'entrer dans a chambre Zéus sé changit en eune achie d'or, et ainchîn Danaé vînt pouor porter un êfant. Ou donnit naîssance à un fis, Pèrsée. Acrisios avait peux du garçon, en s'ramémouaithant d'la prédiction, et enfreunmit Danaé et san fis dans un baheur en bouais qu'i' fît fliantchi dans la mé.
Zéus protégeait Pèrsée et sa mèthe et c'mandit qué l'baheur fûsse êchoué en seûth'té sus les grèves d'eune île paîsibl'ye.
Pèrsée d'vînt un houmme. Lé rouai d'l'île s'enmouothâchit d'Danaé et pensit coumme tchi s'dêbâter d'san fis. I' fit l'feint qu'i' voulait s'mathier auve eune aut' femme et voulait ramâsser des j'vaux pouor un présent d'neuches. Les habitant d'l'île li'offrîtent des j'vaux, mais Pèrsée n'avait pon dé j'va à bailli et au run i' promînt d'aller qu'si la tête dé la Gorgonne, Méduse.
Les trais Gorgonnes 'taient des soeurs monstres à g'veux d'tchilieuvres, cors d'por sauvage, mains d'bronze et ailes d'or. Deux des Gorgonnes 'taient înmortelles, mais Méduse, la mortelle, avait l'pouvé d'touônner autchun êt' vivant en pièrre s'i' l'èrgardait.
Acrisios 'tait seux qu'Pèrsé n'èrveindrait janmais d'sa tchête pouor Méduse, mais Pèrsée pouvait compter sus d'l'aîque dé san péthe, Zéus, et l's aut' dgieux. I' lî consilyîtent d'aller vaie les Grées, les trais soeurs des Gorgonnes, tchi 'taient des vielles chorchiéthes sans ièrs tchi châraiant un yi qu'i' lus entré-pâssaient quand ieune dg'ieux voulait vaie. I' châraient étout lus seule dent. Pèrsée volit lus yi et l'gardit jusqu'à ch'qu'les Grées lî dîssent chein qu'i' voulait saver: par iou trouver des nŷmphes tchi pouvaiet li'aîdgi dans sa tchête.
Les nŷmphes lî baillîtent des sandales ailées pouor voler iou qu'les Gorgonnes démeuthaient, un helme d'învisibilité, eune pouque pouor garder la tête à Méduse dans, et l'dgieu Hèrmès lî baillit un sâbre-faûcil'ye atout tchi coper la tête.
Caûchi dans les sandales ailées et coêffi du helme d'învisibilité, Pèrsée volit au liain siez les Gorgonnes. I'gardait Méduse dans lé driéthe poli dé s'n êtchu à seule fîn dé n'la r'garder directément. I' lî copit la tête atout san sâbre-faûcil'ye, et s'envolit.
Du co copé d'Méduse êcliatchit du sang et d'dans chu sang fûtent nés deux êfants: lé j'va ailé, Pégase, et un fis, Chrysaor, dé tchi l'péthe 'tait l'dgieu, Poséidon.
En r'volant siez li dans l'île, Pèrsée pâssit par l'pays gouvèrnait par l'rouai Képhée et êpyit eune belle d'mouaiselle chaînée à un rotchi sus la côte: ch'tait la fil'ye du rouai, Andromède. La reine, la bouonnefemme à Képhée, tch'avait nom Kassiopée, avait cratchi qu'si fil'ye 'tait pus belle qué les nŷmphes d'la mé. Les nŷmphes, mêrries, avaient d'mandé au dgieu d'la mé, Poséidon, d'peunni la fanmil'ye rouoyale et san peupl'ye. Poséidon envyit un monstre mathîn pouor vengi l'pays. Un oracl'ye consilyit qu'i' 'tait d'mêtchi d'sacrificier Andromède en l'offrant au monstre à seule fîn d'apaîsi l'dgieu.
Pèrsée, enmouothâtchi d'la hardelle en chaînes, décidit d'sauver la prîncesse en tuant l'monstre mathîn. S'lon l's iuns i' fit sèrvi san sâbre-faûcil'ye pouor machacrer la bête, s'lon d'aut' i' lî mouontrit la tête copée d'Méduse qu'i' dêhalit d'sa pouque, et l'monstre fut touônné en pièrre.
À la fîn, Pèrsée rentrit siez li à s'n île acanté sa bouonnefemme, Andromède. Lé rouai d'l'île vengeait acouo Danaé, la méthe à Pèrsée, et Pèrsée touônnit l'rouai en pièrre, acouo eune fais atout la tête à Méduse.
Pèrsée am'nit sa méthe et sa bouonnefemme à Argos, où'est qu'il avait 'té né. Lé rouai, san grand-péthe, avait ouï pâler d'l'arrivée d'Pèrsée et en s'ramémouaithant d'la prophétie d'l'oracl'ye, i' happit la pathe. Pus tard, Pèrsée s'en fut en Thessalie à seule fîn d'prendre part dans des gammes athlétiques, et en lanchant l'disque, par accident, i' tuit iun des spectateurs. Chu spectateu 'tait san grand-péthe Acrisios.
Pèrsée don héthitit l'rouoyame d'Argos mais il avait honte d'aver héthité l'trône par aver tué san grand-péthe, et trotchit l'rouoyaume pouor un aut' rouoyaume, où'est qu'i' d'meuthait et gouvèrnait auve Andromède et lus êfants.
S'lon des vèrsions pus tardives d'la légende, ch'tait Pèrsée tch'avait happé Pégase et allait sus li, et ch'tait ainchîn qu'i' volait.
Viyiz étout: