Dans la mythologie Grècque, Pégase est un j'va ailé. S'lon l'histouaithe dé Pèrsée, quand ch'tî-chîn copit hors la tête à Méduse, deux criatuthes fûtent nées d'san sang: Pégase, lé j'va ailé, et san fréthe, l'houmme, Chrysaor.
Pégase fut gensé par Bellérophon, fis du rouai d'Corînthe, tchi pouvait voler sus l'dos d'Pégase et ainchîn faîthait des faits héroïques.
Bellérophon s'endormit dans l'templ'ye d'Athène à Corînthe et dans un rêve, la déêsse li'offrit eune bride en or et lî dit d'sacrifier un blianc touauthé au dgieu Poséidon. I' s'rêvilyit et trouvit la bride au ras d'li et fit l'sacrifice d'mandé. Bellérophon s'en fut à la fontaine où'est qu'lé j'va ailé soulait s'abréver et en m'ttant la bride lé tou d'san co, l'gensit.
Bellérophon fut oblyigi d'tchitter la ville dé Corînthe viyant qu'il avait tué un houmme. I' s'en fut au rouoyaume dé Tithŷnthe où'est qu'i' fut atchilyi par lé rouai. Malheutheûthement la reine du pays vînt enmouothâchie du janne Bellérophon. I' r'jétit ses avanches, et pouor sé vengi contré li, ou l'atchûthit d'viol. San bouanhoumme, lé rouai avait peux d'faithe mârri les dgieux en tuant li-même lé janne houmme et l'envyit au run siez san bieau-péthe, lé rouai d'Lycie, auve un m'sage pouor ch'tî-chîn. Lé rouai d'Lycie atchilyit Bellérophon et li'offit des grands fricots duthant pus d'eune s'maine. À la fîn l'rouai liut lé m'sage et comprînt qué ch'tait eune d'mande dé tuer l'porteux d'la lettre. Li étout, il avat peux d'faithe mârri les dgieux en tuant tchitchun qu'il avait atchilyi coumme un învité (ch'tait d'tchi tchi 'tait contre les couôteunmes des Grècs). I' décidit don dé l'envyer à sa mort en accomplyissant tchique tchête. I' lî c'mandit don aller tuer la Chînméthe, un monstre à trais têtes. Oulle avait la tête d'un lion en d'vant, eune tête dé tchilieuvre en driéthe, et au mitan du corps eune tête dé biche tchi soûffliait du feu.
En volant dans l'air par d'ssus d'la Chînméthe sus l'dos d'Pégase, Bellérophon tuit l'monstre. S'lon eune vèrsion i' tithit l'monstre atout d's èrchelles; s'lon eune aut' vèrsion i' fit sèrvi eune lanche en pliomb qu'i' pitchit dans la tête dé biche. Les fliambes du soûffl'ye d'la tête fondit l'pliomb tch'offustchit la Chînméthe.
Sus Pégase, Bellérophon avait d's aut' aventuthes mais la dreine s'adonnit fatale. I' décidit d'aller siez les dgieux sus l'Mont Olŷmpe, et s'envolit en haut. Zéus, mârri par ch't' action rupée, envyit un taon pouor pitchi Pégase tchi fit eune lévée d'tchu. Bellérophon tchit bas et fut tué, mais Pégase fut prîns par Zéus au Mont Olŷmpe pouor haler sa tchéthiolée d'êparts.
Viyiz étout: