L's anciens Grècs voulaient explyitchi coumem tchi qu'les humains avaient atchis l'feu. s'lon lus mythologie, d'vant les dgieux Olŷmpiens, y'avait eune race dé dgieux app'lée les Titans, nés d'la Dêêsse d'la Tèrre. Ches Titans fûdrent vaintchs par les Olŷmpiens et lus êfants 'taient parmi les caractéthes d'un tas d'histouaithes qué les Grècs lus cont'pétaient.
Y'a d's histouaithes tchi racontent les faits d'Prométhée. S'lon ieune des mythes, ch'fut Prométhée tchi moûlit les preunmié hommes du pité. Mais en tout cas, dans l's histouaithes Prométhée 'tait l'champion et l'gardgien d's humains contre les dgieux - et i' 'tait un tritcheux étout, rusé coumme un r'nard.
Un jour les dgieux et l's hoummes 'taient pouor fricoter ensembl'ye, et un grand boeu fut rôti et Prométhée avait à sparti l'boeu rôti parmi les dgieux et l's hoummes. I' griyit don deux pliats: iun cont'nait un tas d'bouonne viande couèrt dé tripâles; et sus l'aut' pliats, i' tâssit l's os du boeu couèrts d'eune couoche dé gras. Ch'fut à Zéus, lé rouai des dgieux, d'chouaîsi tchi pliat qu'les dgieux mang'geaient, et i' prînt la pliat'lée d'os. Auprès chutte trique dé Prométhée, quand eune bête 'tait sacrificiée ès dgieux, l's hoummes gardaient tréjous la miyeu viande pouor ieux-mêmes et laîssaient l's os brûlés ès dgieux.
Zéus 'tait mârri d'aver 'té tritchi d'même et gardait lé s'gret du feu d's humains. Mais Prométhée volit l'feu d'l'Olŷmpe en muchant eune fliambe dans eune tigue creuse dé fanon, à seul fîn d'l'emporter à la tèrre.
Zéus peunnit Prométhée pouor aver bailli l'feu ès gens. I' fit enchaîner à eune falaise dans les Montangnes d'la Caucase et c'mandit qu'un aigl'ye vînssent touos les jours pouor li'êraichi l'faie. Et châque jour lé faie à Prométhée s'èrgriyait à seule fîn qu'i' r'souffrîssent lé matîn. Chutte tortuthe duthit bein longtemps, mais à la fîn Zéus pèrmînt qu'san fis Hèrtchule tithîsse l'aigl'ye et lâtchîsse Prométhée.
À part lé feu, nou disait qu'Prométhée avait ensîngni ès gens humains d's arts et des scienches.
Geraint Jennings
Viyiz étout: