|
Quand la famille des Lêcaudeys ont tchiquechose dans la tête, Ch'est inutile de tâchi d'les changi Les vieilles gens ont biau protester, i' n'est rain qui l's arrête, Autchun obstaclye ne peut les dêrangi. Ch'est la Blanche, la nièche à Dan, qu'est je pense, la piéthe de toutes, I' disent qu'ou fut gâtée quand oulle 'tait janne, V'là tchi s'fait vaie acheteu, et ch'est grand damage sans doute, Mais ch'est tout-d'même une hardelle pour le fanne. Ou n'mantchi pas l'année passée, un seul des Carnavals, Et oulle en était si émervillie Qu'ou s'dédicidi, séance tenante, d'y aller ch'tanné à cheval, Si la pouliche n'tait pon trop rêvillyie. Oulle en fit part à ses gens mais, le bouonhomme se mârri "Comment"! qu'i' dit, "aller t'exposer d'même"? I' dit qu'ch'tait scandaleux, et la bouannefemme tintamârri, Mais Blanche lus dit qu'ou s'n allait l'faithe tout d-même. "Vas-y s'tu veurs"! se fit Maîte Dan, "mais pas sus la Bijou, Les gens connaissent ma vieille pouliche trop bain Le Caouain en f'thait des riselées, et le "Critic" ettoû"! "Eh bain," s'fit Blanche, "criyous qu'chenna m'fait d'rain"? La fin d'Octobre 'tait arrivée, mais Blanche ne pouvait pas Se décider quant au chouaix d'san costume; Les uns disaient "Va comme Jeanne D'Arc"! d'autres, "Comme un Epeûthas"! "Ou bain comme un Indien couvert de pliumes." La pouore fille n'savait pus tchi faithe, ni sus tchi pid danser, Et dans un temps v'la l'couothage qui li manque; Quand tout-d'un-coup tchiquechose fut dit qui fit la Blanche penser A san biaufrèthe qu'est clerque dans une banque. Ou li êcrivi une lettre tout-d'suite li d'mandant des avis Pour la r'tither de dans s'n embrarras. Tchi caractéthe qu'i' fallait prendre, et tchi sorte d'habits? Hors du commun! Comme i' n'y en avait pas. Mais san biaufréthe 'tait un farceux, et raîponni comme ch'la: Ma pouore chiéthe Blanche, n'té fait pas d'mauvais, La chose est tout-à-fait facile, tout ch'qui t'faut est un ch'va, Et tu s'sa prumiéthe par sus tout l'restant. Le caractéthe que j'te r'quémande est iun de dans l'Histouaithe, Et bain c'mode pour un Carnaval surtout. Car comme "Lady Godiva," d'auchun costume tu'n'as qu'faithe, Car i' n'faut pas porter d'habits du tout! Acheteu, ou voulez tous saver si Blanche suivra s'n avis, Mais dame! faites tous comme mé, allez-y vaie! Je n'craithais pas, d'la frais qui fait, qu'ou risquethait sa vie Pour un jam-dish, ou p't-être un pot-à-thée. Caouain |
Viyiz étout: