Air: “Nora Criena.”
|
La villaise s'crait bein brave Atou parasol, vouaile et ribans; De la mode pouore escllave, Ou se met sur le cô tou sen gans; Aut'chose est la campagnarde, Dans sen bed-gown et sen cotillon; I'n'est pas besoin qu'ou s'farde, Oulle est comme un rose en bouton; Pâlèz-mé d'la campagnarde, Qui sait faire pain, beurre et l'livrer; Je l'admire quand j'la regarde A couquir, couostre ou bein à ouvrer. I' faut veir les teurs que s'donne, La villaise atou ses falbalas; Ou se crait une grand personne, Pour mé v'la qui n'm'êblouit pas; Aut'chose est la campagnarde, Sait au d'hors ou sait dans la maison, De tout ch'est lli qu'a la garde, Oulle est la même en toute saison, Pâlèz mé d'la campagnarde, Qui n'a peux de ni pllie ni solèi ; Je l'admire quand j'la r'garde, A férer, traire à tout chein qu'ou fait.
|
Viyiz étout: