L'Assistante crouaîse la strade en portant eune p'tite boête mèrtchie "Grandes choses"
	La Journaliste #1 entre, sé mâte sus la strade et r'garde à haut. Oulle a un livret et eune plieunme.
Journaliste #1:	Ah! Ch'est-i' qu'oulle est grande!
	La Journaliste #1 fait des notes dans san livret.
	L'Assistante èrcrouaîse la strade en portant eune pus grande boête mèrtchie "P'tites choses"
	La Journaliste #2 entre, sé mâte sus la strade et r'garde à haut. Oulle a un livret et eune plieunme étout.
Journaliste #2:	Ah! Ch'est-i' qu'oulle est mangnifique!
	La Journaliste #2 fait des notes dans san livret. La Journaliste #1 est gênée.
	L'Assistante èrcrouaîse la strade en portant eune pus grande boête mèrtchie "Acide Sulphuthique"
Journaliste #1:	Ah! Ch'est-i' qu'oulle est bein grande!
	La Journaliste #2 est gênée. Nou-s'entanme eune manniéthe dé compétition, en pâlant pus quédaine.
Journaliste #2:	Ah! Ch'est-i' qu'oulle est mangnifiquement grande!
Journaliste #1:	Mangnifiquement încriyabl'ye!
Journaliste #2:	Încriyabliément mangnifique!
Journaliste #1:	Supèrbément nobl'ye!
Journaliste #2:	Nobliément supèrbe!
Journalistes #1 et #2 (ensembl'ye):	Boustrément grande!
	Les journalistes scribl'yent futhieusement dans lus livrets. L'Assistante èrcrouaîse la strade en portant eune pus grande boête mèrtchie "Pouques à thée". La Professeûthe entre, habilyie en câsaque dé laboratouaithe.
Prof:	Ah, vos v'là! J'vai bein qu'ous êtes à r'garder not' fîsée spatiale. Tch'est qu'ous en pensez?
Journaliste #2:	Oulle est mangnifique!
Journaliste #1:	Oulle est bein grande!
	Les deux journalistes lus entr'-èrgardent si ch'est pouor lus r'entre-hèrtchîngni.
Prof:	Véthe, oulle est la pus grande fîsée spatiale qué j'avons janmais bâti en Jèrri.
Journaliste #2:	Ch'est la preunmiéthe qué Jèrri a bâti en tout!
Prof:	Vos v'là don: la preunmiéthe et la pus grande! Il est d'mêtchi d'rapporter chenna.
	L'Assistante èrcrouaîse la strade en portant eune pus grande boête mèrtchie "Drâses anti-gravité".
Journaliste #1:	À seule fîn d'rapporter les dêfinnissâles: combein qu'la fîsée spatiale a d'haut exactément, Madanme la Professeûthe?
Prof:	Oulle a...
	Ou hale un caltchuleux d'sa pouchette. Ou fait des cartchuls complyitchis en s'grattant la tête. L'Assistante èrcrouaîse la strade en portant eune pathe d'êtchelles mèrtchies "Êtchelles întèrplianétaithes".
Prof:	Oulle a exactément chîn mètres dé haut. Ch'est la pus grande qué j'pouvêmes bâti dans la Salle Pârouaîssiale sans aver à pèrchi la muthâle.
Journaliste #1:	Chîn mètres dé haut? Ch'est încriyabl'ye!
Journaliste #2:	Ch'est mangnifiquement nobl'ye!
Journaliste #1:	Mais est-alle grande assez pouor transporter les deux astronautes?
Prof:	Oh, j'crai qu'oui. La preuve du podîn ch'est dé l'gouôter. Et les v'chîn achteu, nos deux braves astronautes.
	Les Astronautes entrent coumme si ch'est pouor marchi sus la Leune. I' sont habilyis sportivement. L'Assistante èrcrouaîse la strade en portant deux grandes valises mèrtchis "Habits ès Astronautes". L's Astronautes lèvent lé bras pouor saluer l'monde - mais acouo eune fais bein douochement coumme si ch'est tout en espace.
Astronautes:	Bouônjour, Tèrriens!
Journaliste #2:	Bouônjour, Mesdanmes (Mêssieux) les Astronautes! Criy'-ous qu'i' y'étha assez d'run dans la fîsée pouor les deux d'vous? Ou s'sez sans doute patchi(e)s coumme des sardinnes dans chutte tinne-là!
Astronaute #1:	Oh, i' n'y'étha pon d'souain: j'avons 'té à pratitchi.
Journaliste #1:	Dans la fîsée même?
Astronaute #2:	Nânnîn. J'avons fait d's expéthînments dans d's êtablyissements spécialîsés pouor la paqu'thie d'pèrsonnes en bein p'tit d'run.
Journaliste #2:	Ches êtablyissements, ch'est bein seux des bases ségrètes!
Astronaute #1:	Nou-fait! J'avons pratitchi dans "Chambers"...
Astronaute #2:	...siez "La Cala"...
Astronaute #1:	...au "Mimosa"...
Astronaute #2:	...et au "Havana Club"
	Les journalistes sont à scribler dans lus livrets. L'Assistante èrcrouaîse la strade en tchithiant des boêtées mèrtchies "Bouaîssons des Astronautes" ou "Vodka d'Spoutnique" ou tchiquechose dé même.
Prof:	La duithie d'nos astronautes a 'té longue et duthe. Assa, pouor la fîn d'châque séthée, il' avaient la tête tchi touônnait et i' n'taient dgéthe capabl'yes d'rester d'but. Tchi dêtèrminnâtion! Achteu ch'est quâsiment l'heuthe pouor lanchi not' fîsée! Allez, cache, astronautes! Madanme la Sénateûthe, la Minnistre pouor l'Espace, s'en va arriver pouor la lanch'chie officielle.
	Les Astronautes lus en vont, en marchant acouo eune fais s'i' 'taient sus la Leune. La Minnistre entre. Ou porte eune rôsette: "Votez pouor mé!". Ou liet d'un dôssyi.
Minnistre:	Bouônjour. Ch'est un pliaîsi d'vaie tant d'monde à l'ouvèrtuthe dé chutte salle.... Nou-fait...
	(ou chèrche lé bouôn papi)
	Ch'est un pliaîsi d'vaie tant d'monde à la preunmié mouontréthie d'chu film... Nou-fait....
	L'Assistante èrcrouaîse la strade en tchithiant un tas d'boêtées mèrtchies "Affiches êlectorales et fieillets"
	Ch'est un pliaîsi d'vaie tant d'monde à la... la... véthe... la lanch'chie d'la preunmié fîsée spatiale dé Jèrri. Ch'est eune nouvelle îndustrie pouor Jèrri. Ch'est un p'tit pas pouor un Jèrriais... mais un tas d'vouaix pouor eune candidate... Extchûthez-mé! j'veurs dithe "un grand sauticot pouor les gens d'Jèrri"... Duthant chu viage, nos braves astronautes lus en vont faithe des grandes explorâtions, des împortantes dêcouvèrtes, il' îthont bravement ioù qu'nu Jèrriais n'a 'té d'vant!
Journaliste #1:	Coumme tchi qu'les astronautes lus en vont èrvénîn en Jèrri auprès lus grand viage d'explorâtion et dêcouvèrte?
Prof:	J'avons boutchi deux sièges sus l'baté Condor d'à ces sé.
Journaliste #2:	Sus l'baté Condor? Ioù qu'la fîsée va, don?
Minnistre:	Un viage hardi dangéreux pouor dêcouvri iun des grands mystéthes dé l'Unnivèrs. Nos braves astronautes s'sont lanchis dans eune région bein au liain.
Journaliste #1:	Combein d'années-leunmiéthe? Dans tchi galaxie? Combein liain qu'la fîsée s'en va viagi?
Prof:	Dans les quarante kilomètres.
Journaliste #2:	Raîque quarante kilomètres!
Journaliste #1:	Tch'est qu'i' lus en vont dêcouvri?
Minnistre:	J'allons dêcouvri à la fîn s'i' y'a d'la vie întelligente en Dgèrnésy!
	Les journalistes scribl'yent. L'Assistante èrcrouaîse la strade en tchithiant eune boête mèrtchie "Cârottes pouor les Ânes".