Les Pages Jèrriaises

Les Rêsolutions

 

Y'a un vièr diton tchi nos dit qu'les rêsolutions du sé n'sont pon les cheinnes du matîn, et ch'est bein seu, mais pouor lé Nouvel An, y'a un tas d'gens tchi font des rêsolutions auve l'espé dé s'amender. Ch'est en tchi j'avons d'mandé à tchiqu's'uns d'nos anmîns d'nos dithe deux'trais mots entouor lus rêsolutions.

Y'en a tchi nos ont dit qu'i' n'font janmais des rêsolutions et qu'i' sont trop vièrs pouor changi. Et y'en a tchi dithent qué si nou n'espéthe pon trop, nou n'est janmais d'sappointé. I' sembl'ye qu'un tas d'gens laîssent lus rêsolutions à la dreine minnute, même iun d'nos anmîns tch'avait rêsolu d'faithe tout tréjous à l'heuthe duthant l'année.

Un' aut' anmîn a rêsolu d'vîsiter l'Hôpita et d'pâler en Jèrriais auve les vielles gens, et né v'là tch'est bein charitabl'ye et admithabl'ye.

D'aut's rêsolutions sont mains génétheuses, sustout quand les gens font eune rêsolution d'pèrdre du paids auprès l's excès des Fêtes dé Noué - ou d'baithe mains quand nou-s'a trop souffèrt d'la baithie ès partis d'la saîson.

Tch'est qu'ous en pensez, bouannes gens? All'ous faithe eune rêsolution? Si j'pouvons suggéther eune rêsolution pouor les cheins tchi n'ont pon acouo chouaîsi, pouortchi pas décider d'faithe sèrvi l'Jèrriais un brîn pus dans la vie d'touos les jours duthant l'année tchi veint?

Bouanne Année!

 

Viyiz étout:

 

Les Pages Jèrriaises