Es filles, ès femmes, ès p'tits êfans
Es garçons, à lus p'pée
A tous, amins, vêsins, pathens
J'vos souette une buonne Année.

Es campagnards, et ès villais
N'importe oùest qu'ou d'meuthez,
Sé vieille maison, ou p'tit palais
J'vos souette une buonne Année.

S'ou gangniz ov vos bras vot' pain,
Si la plume ou mangnez,
J'vos l'dit oquo, ch'la n'y fait rein
J'vos souette une buonne Année.

Qu'ou faichiz servi bêque ou fouet,
Qué d'dès ou vos servez;
N'importe ov tchi qu'vot travas s'fait
J'vos souette une buonne Année.

Si vos habits ne sont pas neufs
Mais s'i sont viers et laids
Ch'est d'bein buon tcheu séyis en seux
J'vos souette une buonne Année.

S'ou n'avez pas peu réussi
Jusqu'achteu; r'êprouvez,
Fait' dé vos mus; pour vos aidji
J'vos souette une buonne Année.

Jerriais ou autres, sé p'tits ou grands
N'importe là you qu'ou s'sez,
J'vos souette à tous en finissant
Une buonne nouvelle Année.