Le Ménage ès Feuvres,
St. Ouën.

Lé 1 juilet, 1973.

Moussieu l'Rédacteu,

M'èrvélà en Jèrri auprès aver pâssé eune tchinzaine dans l'Abbaye d'La Lucèrne en Nouormandie. L'Abbé Marcel Le Légard, Conservateur des Antiquités et Objets d'Art du Département de La Manche, est - p'tit à p'tit, comme l'ouaîsé fait san nid - à faithe eune mangnifique restaurâtion d'l'Abbaye. Il est iun des grands savants d'La Nouormandie et un anmîn du Docteu Frank Le Maistre et d'L'Assembliée d'Jèrriais, et ch'est un honneu d'aver l'privilège d'êt' invité à l'Abbaye. Un aut' savant et anmîn qu' nou manque à ch't heu quand nou-s-est là est l'défunt Professeu Fernand Lechanteur, mort si tôt auprès sa r'traite comme Proviseur du Lycée Malherbe à l'Univèrsité d'Caën. En compangnie d'l'Abbé Le Légard j'allis vaie sa tombe l'aut' jour dans l'chînm'tchiéthe d'Agon, et, pus tard, j'eus l'honneu d'présenter mes complyîments, et les cheins du Docteu et d'Madanme Frank Le Maistre, à Madanme Veuve Lechanteur siez lyi.

Eune aut' anmie qu' j'allis vaie l'aut' jour est Madanme Veuve Louis Le Mare. Moussieu L'Mare 'tait d'chutte société tchi s'otchupe d'la consèrvation d'la langue Nouormande et fut l'întèrprete èrnommé d's oeuvres du grand poète Nouormand Louis Beuve. Ou pouvez vaie l'annonce dé san décès dans l'Bulletîn nunmétho onze du preunmié voleunme des Bulletîns d'L'Assembliée d'Jèrriais. En 1953 j'eus l'honneu d'pâsser un p'tit d'temps siez li dans san vivant.

Y'en a tchi m'disent Tchi pliaisi qu'tu peux trouver à pâsser tan temps dans eune Abbaye d'mème, prîncipalement quand tu pâssé si p'tit d'temps en Jèrri viyant qu' tu'es tréjous à viagi d'bord-t-en autre? Eh bein, ch'est eune tchestchion raisonnabl'ye, et j'n'en disconveins pon qué v'a tchi peut pathaître riditchule à bein du monde, mais touos l's ièrs né vaient pon d'eune sorte - comme nouos l'dit l'vièr diton Jèrriais. Quant à mé, j'y trouve, à l'Abbaye, un grand r'pos, un changement absolu du tîntamarre dé la vie en Améthique - et mème en Jèrri d'pis l'învasion touristique.

À l'Abbaye d'La Lucerne nou peut jouï d'la trantchilité. Oulle est située dans eune belle vallée. Nou n'vait qu' bouais et clios à l'entou d'sé. Comme en Jèrri, les vaques pathaîssent contentes dé paître où'est tch'i' sont fitchies dans des cliosées d'hèrbe tchi craît à gogo. Y'a mème des brébis et eune biche à paître à l'ombre d'l'Abbaye, et y'a eune demié-douzaine dé bêtes à saie à fouoilli parmi l'hèrbe dans un clios un p'tit pus liain tchi sont gros et gras et quâsi grands comme eune pétite géniche.

Jé n'vai pon d'télévîsion et je n'ouai pon d'radio. Nou n'ouait qu'la mûsique dé la natuthe. Nou va s'couochi d'vièrs dgiex heuthes et ch'est l'cocolîncheux du co tchi vouos rêvil'ye dé bouanne heuthe lé matîn quand i' fait ses poules lus dêjutchi et c'menchi à gratter et bétchi dans l'bel en caqu'tant et s'entre-coquenochant, pour trouver lus dêjeuner et pus tard pondre l's oeufs qu' j'allons mangi beintôt. Dans la distance, nou ouait eune vaque beûler et un tchian ouasser. L's ouaîsieaux chantent lus antiennes à l'aube du jour. Dans l'vivi, les maillards et l's ouaies pathaîssent à maîntchi endormis en fliottant trantchil'yement, mais quand nou pâsse à côté, en c'mîn pour la Maison Abbatiale, l's ouaies grapinnent à tèrre et vouos disent un briteux bonjour auve lus vouaix râqu'teuses, criyant, j'pense bein, qu' nou s'en va lus donner tchiquechose à mangi.

Lé grand brit du jour est l'son des clioches tch'appellent les gens à la priéthe et à l'adorâtion du Seigneur au sèrvice dé la Mêsse tch'est chantée à Sa glouaithe touos les jours, et tchi nouos rapprèchent du Rouoyaume des Cieux d'eune manniéthe toute spéciale viyant qu'ou nouos appelle à chanter l' Sanctus auve les Anges et Archanges et toute la Compangnie des nouôtres tchi sont au Paradis. Dans la p'tite chapelle lé long d'la grande églyise dé l'Abbaye, les gens d'a l'entou peuvent sé rêuni touos les jours pour èrmèrcier l'Bouan Dgieu pour les bouannes choses dé la vie et Lî d'mander d'lus aidgi à supporter les mauvaises, car ch'est la destinnée d'la grand' partie des gens partout l'monde d'en subithe des deux sortes, et la miyeuthe espéthance est d'en aver pus des bouannes qué des mauvaises dans l'couothant d'la vie.

Eune chose tchi m'pliaît étout à l'Abbaye est d'ouï la Mêsse célébrée en Latîn où'est qué l'Bouan Dgieu est acouo appelé Té. J'sis si consêrvateu d'ma sorte qué j'n'aime pon les changements modèrnes dans les sèrvices dé l'églyise, ni l'langage modèrne dé la Bîbl'ye, et j'n'aime pon ouï l'Bouan Dgieu appelé Vous. J'l'avons appelé Té pour si longtemps qué v'la tchi m'pathaît comme s'il 'tait dév'nu un êtrangi à la pliaiche dé continnuer d'êt' lé Notre Père dé la Litourgie tch'a 'té, auve la Bîbl'ye, lé patron d'nouot' condite dépis l'Bâptème dé nouos p'tits jours.

George d'La Forge
 

Viyiz étout: