St. Servan-sur-Mer, France.
Lé 29 dé juilet, 1967.
Moussieu l'Rédacteu.
Quand j'sis en Jèrri et qué j'vai la moutarde dans les clios, v'la tchi m'ramémouaithe qué iun des r'mièdes des anciens pour lé ma dans l'dos and dans l'estonma 'tait d'y mett' un empliâtre d'moutarde. Et quand eune personne 'tait enchifrénée et craingnait tch'i' y'avait eune suée d'fraid en v'nant, un bouan vèrre caud et les pids dans eune petite toubée dg'ieau caude, atout eune bouanne pouangnie d'moutarde d'dans, dévant s'couochi, valaient la peine d'êprouver pour empêchi la suée d'fraid d's'êpanni. J'en ai connu tch'avaient tellement d'fouai dans l'vèrre caud tch'i' viyaient tréjous les suées d'fraid v'nîn d'liain!
En Améthique, les fielles dé la pliante dé la moutarde sont hardi aimées à mangi eune fais bouoillies. L's Améthitchains mangent ch'la comme i' mangent d'la bette, et tchiquesfais - pour changement d'goût - i' bouoillent les freûles dé tournops pour les mangi. I' pathaît qu'toute chutte vèrduthe-là est plieine dé fé, et qu'd'en mangi en quantité est d'valeu comme gros.
J'm'èrsouveins, étout, qué l's anciens faîsaient sèrvi des poussots pour un tas d'maux, sustout des mains et des pids. Quand nou-s-avait un pitchet dans la main ou dans les dés qu'nou n'pouvait pon haler atout eune adgule, Manman y m'ttait un poussot d'pain et d'molle graisse et v'la tch'i' l'faîsait sorti. Un poussot d'mème 'tait fanmeux, étout, pour èrdgéthi des frouëts. V'la tchi faisait la méche sorti, et nettissait l'malon.
Un poussot d'bran 'tait bouan pour lé mal ès dents, et un poussot d'linnette 'tait fanmeux pour faithe dispathaître eune enflieunme à la gorge par du fraid. Tchiquesfais, l's anciens bouoillaient eune touffe dé pèrsi pour poussoter sus eune enflieunme étout.
Eune chose qué nou mangeait hardi à St. Ouën quand j'tais mousse 'tait d'la pèrche-pièrre. I' pathait qu'oulle est plieine d'iode, et qu'les personnes tch'en mangent ne souffrent janmais d'la maladie appelée la Grosse Gorge, ou l'Gouaître. Mais y'a probabliément d'l'iode dans l'air en Jèrri, car j'n'ai janmais veu pèrsonne souffri d'chutte maladie-là dans l'Île. Au Canada et ès Etats-Unis d'Améthique nou-s-en vai un tas, et i' disent là-bas qu'ch'est viyant tch'i' vivent liain d'la mé. Quand j'tais mousse j'allions à l'Êta en ramasser, d'la pèrche-pièrre, et Manman la lavait bein dans deux-s'trais ieaux et la m'ttait au picl'ye. Ou' m'ttait des p'tits ouognons d'dans pour donner du goût, et nou-s-en mangeait souvent. Les gens d'à ch't heu n'en mangent pon, ouaithe qué j'ôse craithe qué y'en a p't êt' sus la tabl'ye siez m'n anmîn Maît' Fraînque Lé Maistre à La Brecquette, tch'est vièr Jèrriais dans l'âme et tch'aime aussîn bein l'mangi du temps passé comme il aime et respecte les couôteunmes, les moeurs et la langue dé nouot' pétit pays natal!
Et tch'est tchi mange des baînis et v'licots au jour d'aniet? Quand j'tais mousse nou-s-en mangeait hardi, et nou s'faisait un pliaisi d'aller au rotchi les qu'si et fliêter les baînis. M'n onc'lye Charles, tchi d'meuthait au Ménage ès Feuvres, y'allait acouo dans sa septantaine, et man fréthe Fraînque y'allait auve li. I' m'a tréjous dit qu'eune fais l'bouanhomme Charles s'êtrav'lit dans eune mathe en lus en r'vénant chèrgis dans l'rotchi et laissi sa pann'lée d'baînis tchaie à l'ieau! Il eut à sé r'mouoilli eune deuxième fais eune fais r'lévé pour èrtrouver ses baînis et r'chèrgi san pangni! I' n'en trouvit pon la maîntchi, mais comme l'affaithe en 'tait il en avait assez pour un homme dé s'n âge à remporter siez-li quand nou pense tch'i' fallait ramonter L'Mont du Vallet atout sa pann'lée! M'n oncl'ye Adolphus y'allait étout, ès baînis, et il aimait l's êcovi au rotchi et les mangi crus!
Il' taient hardi bouans bouoillis et mangis dans lus sau où'est qu'nou les laissait eune volée pour tch'i' fûssent pus tendres. Tchiquesfais, Manman les m'ttait au picl'ye. Nou-s appelait l'ieau dans tchi qu'nou bouoillait les v'licots du sau étout. Manman les puchait dé d'dans l'sau atout eune pétite puch'rêsse et les m'ttait sus nouos assiettes, et pis nou les dêhalait d'la coque atout eune adgule à cauches et nou les mangeait auve eune beurrée. Nou mangeait les baînis auve eune beurrée étout. Nou pînchait la tête du baîni atout l's ongl'yes du ponché et du preunmié dé, et en la halant lé p'tit boudîn v'nait étout. L'baîni 'tait bouan pour homme et annima. Nou donnait eune bollée d'baînis tchuits à eune trie aupres qu'oulle avait couochonné pour lî donner d'l'appétit.
Eune couôteunme du temps passé tch'a dispathu d'nouos jours étout 'tait d'mangi des colînmachons crus pour la conseunmtion. Heutheusement, ch'est eune maladie tch'a presque dispathu à ch't heu, mais un tas d'monde en mouothaient quand j'tais mousse. I' pathaît qué l'colînmachon, êcovi et avalé cru, apportait du soulagement au conseunmtif, si pas la r'dgéthîthon. Quant à mé j'l'aime mus prépathé et tchuit comme i' l'font en France, mais dans man cas ch'est, Dgieu mèrci, comme gourmet pûtôt qu'comme maladif qué j'm'en régale!
George d'la Forge
Viyiz étout: