San Antonio, Texas, USA.
Lé 4 dé févri, 1984.
Moussieu l'Rédacteu,
J'vouos ai tellement pâlé d'crianches à ches drein qu' j'ai quâsi peux qu'ou-s-allez en êt' enn'yés, mais j'ai d's anmîns à l'êtrangi tchi mé d'mandent dé continnuer à les r'corder, et n'en v'chîn tchiques-eunes qué j'n'ai p'têt' pon mentionné d'vant.
Prenez garde dé n'vouos assiéthe pon treize à tabl'ye, car eune ancienne crianche nouos dit qué quand treize pèrsonnes lus mettent à tabl'ye iun ou ieune dé ieux mouorra dans l'couothant d'l'année.
Dévant s'mett' à tabl'ye un travailleux s'lave d'habitude les mains, mais i' faut souangni d'empêchi trais pèrsonnes dé les laver dans la même ieau en même temps, ou bein si'en cas i' faut faithe lé sîngne dé la Crouaix dans l'ieau. Mais deux peuvent les laver dans la même ieau.
Lé pâlement d's'assiéthe à tabl'ye mé ramémouaithe tch'i' y'a eune crianche entouôrre la fouângnêthie du pain tch'est si nécessaithe sus la tabl'ye et l'souôtchien du dos qué l's anciens l'app'laient la gângne dé Dgi. Quand nou s'en va fouângner l'lendemain, lé sé nou fait lé sîngne dé la Crouaix sus lé l'vain auve un dé, et quatre pétits creux, deux à haut et deux à bas, pour èrprésenter la Crouaix et les clious, tout en r'citant, en bas, "Au nom du père et du Fils et du Saint Esprit, fais léver lé l'vain comme Tu as fait léver lé grain." Pour d'la gâche dé pâte nou fait eune crouaix sus la pâte. Quand nou d'bat la gâche, nou l'fait auve lé solé, et quand nou fait lé l'vain, étout, nou l'dêmêle comme lé solé. Janmais à contre sens.
Quandi qué j'sommes à tabl'ye, i' m'veint à l'idée qu'un tas d'femmes aiment à saver lus chance dans la tâsse. Eh bein, né v'chîn vouot' chance, mes danmes d'apprendre comme tchi la dithe. Eune fielle dé thée fliottant sus l'thée annonce l'arrivée d'un amouotheux. Si l'pid d'la fielle est mo, l'amouotheux s'sa charmant. Si l'pid est dû ou rude, il étha mauvaise minne et né s'sa pon du tout av'nant. Un pid d'fielle tchi fliotte, nou l'hale et l'met sus l'dos d'la main gauche, et pis nou donne un coup atout la main drouaite pour tch'i' tchaie. Au preunmié coup, la pèrsonne nomme lé nom d'chu jour-là, au deuxième coup lé préchain et ainchîn d'siette jusqu'à qué l'pid tchaie, et né v'là l'jour qu'eune lettre arrivetha.
Quand tout l'thée est bu, i' faut mett' la tâsse sens d'ssus d'ssous dans la souôtâsse, et atout la main gauche i' faut la touânner trais fais en même sens qué l'solé, pas à contre sens, pour l'êgouter. Et pis i' faut la présenter à la dis'rêsse dé chance. Oulle examinne la formâtion des fielles et vouos donne sén întèrprétâtion dé chein qu'ou s'înmaginne vaie. Et i' pathaît tch'il' ont eune supèrbe înmaginnâtion et tch'i' vaient un tas d'choses dans les fielles qué d'aut' né vaient pon. Par exempl'ye, s'i' vaient la formâtion d'un tchian, ch'est bouanne chance s'il a la coue en l'air!
Y'en a tch'aiment à feunmer eune cigare ou eune pipée dé p'tun en baillant d'lus becque à la tabl'ye auprès lé r'pas. Dans tel cas ch'est mauvaise chance pour trais à faithe sèrvi la même alleunmette à l'alleunmer.
Y' a-t-i' du pâté d'pommes pour lé déssèrt? Eh bein, y'a eune charmante crianche au sujet d'la pomme. Si, en la p'lant, la p'liche reste entchiéthe, i' faut l'env'yer par sus s'n'êpaule gauche. Quand la p'liche tchait, la lettre à tchi qu'ou r'sembl'ye l'pus es'sa la preunmié lettre du nom au chein qu' la fil'ye tch'a p'lé la pomme s'en va mathier.
Quand nou s'lève dé tabl'ye i' faut qu'nou r'garde à sé dé n'tchulbuter pon sa tchaise, car eune vielle crianche nouos dit qu'ch'est mauvaise chance d'en tchulbuter ieune, sustout pour eune fil'ye tch'est en veue dé s'mathier.
Y'avait tellement d'crianches dans les vièrs temps qué v'là tchi m'fait penser qué nouos anciens d'vaient aver d'bouannes mémouaithes pour pouver les r'ténîn!
Viyiz étout: