Ch'tet a la fin d'Juin par un vendredi,
Qu'ls'avions Allemands bombardident Jerri.
Les prumié bombes ch'tet sus La Rocque,
Et bein vite après la ville en senti l'choque.

Le samedi et l'dimanche y'eu d's'alarmes
Et nous entendit souvent sounné la sirene;
Et d'bouane heuthe lundi l' prumi d'Juillet
Un avion Allemand laissi couare un patchet.

Y fut ramassé et porté à Moussie l'Bailli,
T'chi bein vite les Etats rasemblyi -.
Lus dit, Messieurs, si l'Ile n'est pas rendue promptement,
Nou nos m'niche d'un bein fort bombardement

Y fut bein du d'aver a decidé,
Mais pour êviter massachre fallait accepté.
L'Angyéterre ne pouait pas nos porté s'cours,
Oul attendit l'invasion d'Jour en Jour.

L'Arlevée même l'enemi arrivi
Et su l'Airport y d's'semberchi.
Dans la sethée n'ou l'viyait en ville
A faithe des cliens a nos jeune filles.

Lé prechain sé sus la gazette appathi
Les ordres t'chi fallait obéi,
Fallait pas sorti avec ses autos,
Ni écouté d'nouvelles sus ses radios.

Donc pour chinq ans notre p'tit Jerri
Resti souas la botte de l' ennemi;
J' fut pour tous une duthe êpreuve
Mais fallet quand même se mettre à l'oeuvre.

Y resti bein des cliosés d'patates,
Fallu abandonner ses belles tomates,
Y nos vint d's'ordres t'chi t'chultiver
Et t'chi plianter dans le r'nouvé.

Pas d'cliosés d'tomates coume autrement
Mais d'l'aveine, du biet et du froment,
Des pais, des ledgumes, pas tant d'patates
Et y'en eu t'chi r'cenmmenchident a garder des vaques.

Nos rations devnaient pus et pus maigres
T'chiquefais du vin coume du vinaigre;
Sus la tablye pas d'biaou Jigot,
Par chance un mio d'lard ou du bichot.

De temps en temps y'avait d'l'extra:
Margarine, macaroni ou chocolat,
Du Camembert t'chiquefais pouarri,
Et p't'être de l'huile pour fricachi.

Notre pain t'chiquefais mêslé d'aveine,
Y'en avet quatre a siez livres la s'maine.
Pas d'lard a trouver dans l'saleux
Que y'ou qui muchais un couachon ou deux.

Même le paisson tet bein écart,
Pas d'mulet ni yieu ni vra ni bar.
D'ormers y'en avait pas tes tas,
Mais "d'verte crabes" y'en ment'chait pas.

Des chents persounnes allaient au lanchon
D'pis les Haises jusqu'a l'Avathizon,
Et bein d'autres qu'allaient es manchos,
Es crabes, es bainis ou es vliquots.

Des ordres signés par Gussek et Schumaker,
Knackfuss, Caspar et Von Helder,
Même par Peltz, chu salle p'tit mâtin
T'chi n'avet pas l'esprit d'un bantin.

Nos bouais et bouaizies futent abbatus,
Car de t'cherbon y'en avet pus.
Si y'en v'net d'France ch'tet pas des tas
Et ch'tet d'la salté t'chi n'brulet pas.

De nos belles fermes y'en eu d'ruinés,
Nos maisons abattus et brulés.
Des tranchies d' creusés dans les clios,
Ch'tet assez pour vos touané fos.

Nos gazettes t'est plyienes de menties
D'pis les lundis jusqu'es samedis;
T'chi honte pour l'Post et la Chronique
T'ch'avaient trejous tet si veridique.

Pour travaillyi sus forts et fortifications,
Y'en euu d'amnés de toutes les nations:
Espagnos, Belges, Russes et Polonais,
Algériens, Hollandais et Français.

Nos radios futent confis't'chis,
Mais y'en eu des chentaines de muchis,
Et quand les amins s'ent rencontraient
Ne f'chin t'chi qui s'ent disaient.

Y'a ti des nouvelles a matin?
Oui, Stalingrad est prins par Stalin,
Tripoli est prins par l's' Angyais,
L's Amethit'chains capuchent les Japounais.

L'Italie d'mende une Armistice,
Y pasle de grandes emutes en Autriche,
Mille avions sus l'haut d'Cologne,
Les Russes sont entrés en Pologne.

Y'en avait qu'oubliaient qui t'est Jerriais
Et avec l' enemi lus associais,
N'ou s'en trouvé parmi grands et p'tits
Et même parmi la pus haute lignyie.

Les nouvelles de pus en pus nos rejouissais:
Les Russes entraient en Roumanie,
En Italie, Rome prins par l's' Angyais,
Le prechain matin, l'invasion en Normandie.

Les Alliés allaient d'success en success:
Bayeux, Cherbourg, Avranches et Falaise,
Rennes, St. Malo, Le Mans, Paris et Calais,
Nou s'entent diset la fin est près.

Mais fallu equot passer le pus du hivé,
Le gas de pis t'chique mais avet mant'chi,
D'electricitet y'en eu pus du mais d'Janvi,
De t'cherbon fallait bein s'en passé.

Le pain vint presque a nos mant'chi,
Mais un jour le Vega nos arrivi
Avec des patchets, de viande, bistchuit et chocolat,
D'la Nouvelle Zelande et du Canada.

Les Allemands betot lus rendaient partout:
En Italie, Hollande, Danmarque et siez y'eux
Et d'vant bein des jours ch'fut notre tout
De t'elles rejouissances n'ou n'avait jamais veu.

N'ou n'viyet pus le vert du Nazi,
Mais partout notre bouan vier khaki,
Et l'Swastika nou n'le viyet pas,
Car notre vier pavillon tet au haut du mat.

JACQUES LE ROTCHI.

Ch'tait à la fîn d'Juîn par un Vendrédi,
Qu'les avions Allemands bombardîdrent Jèrri.
Les preunmié bombes ch'tait sus La Rocque,
Et bein vite auprès la ville en sentit l'choc.

Lé Sanm'di et l'Dînmanche y'eut d's alarmes
Et nou-s'entendit souvent sonner la sirène;
Et d'bouonne heuthe Lundi l'preunmyi d'Juilet
Un avion Allemand laîssit couôrre un patchet.

I' fut ramâssé et porté à Moussieu l'Bailli,
Tchi bein vite les Êtats rassemblyit -.
Lus dit, Mêssieurs, si l'Île n'est pas rendue promptément,
Nou nos m'niche d'un bein fort bombardément

I' fut bein dû d'aver à décider,
Mais pour êviter machacre fallait accepter.
L'Angliétèrre ne pouait pas nos porter s'cours,
Oulle attendit l'învâsion d'jour en jour.

L'arlévée même l'enn'mîn arrivit
Et sus l'Aéroport i' d'sembèrtchit.
Dans la séthée nou l'viyait en ville
À faithe des clyîns à nos jannes fil'yes.

Lé préchain sé sus la gâzette appathit
Les ordres tchi fallait obéi,
Fallait pas sorti auvec ses autos,
Ni êcouter d'nouvelles sus ses radios.

Don pour chînq ans notre p'tit Jèrri
Restit souos la botte dé l'ennemîn;
Ch'fut pour tous eune duthe êpreuve
Mais fallait quand même sé mettre à l'oeuvre.

I' restit bein des cliôsées d'patates,
Fallut abandonner ses belles tonmates,
I' nos vînt d's ordres tchi tchultiver
Et tchi plianter dans l'Èrnouvé.

Pas d'cliôsées d'tonmates comme autrément
Mais d'l'avaine, du blié et du fronment,
Des pais, des lédgeunmes, pas tant d'patates
Et y'en eut tchi r'quémenchîdrent à garder des vaques.

Nos râtions dév'naient pus et pus maigres
Tchiquefais du vîn comme du vinnaigre;
Sus la tabl'ye pas d'bieau dgigot,
Par chance un mio d'lard ou du bichot.

Dé temps en temps y'avait d'l'extra:
Margarine, macaroni ou chocolat,
Du Camembèrt tchiquefais pouôrri,
Et p't-être dé l'huile pouor fricachi.

Notre pain tchiquefais mêlé d'avaine,
Y'en avait quatre à siêx livres la s'maine.
Pas d'lard à trouver dans l'saleux
Qu'éyou qui muchait un couochon ou deux.

Même lé paîsson 'tait bein êcars,
Pas d'mulet ni lieu ni vra ni bar.
D'ormèrs y'en avait pas des tas,
Mais "d'vèrtes crabes" y'en mantchait pas.

Des chents pèrsonnes allaient au lanchon
D'pis les Haîses jusqu'à l'Avathîthon,
Et bein d'autres tch'allaient ès manchots,
Ès crabes, ès baînis ou ès vlicots.

Des ordres sinnés par Gussek et Schumacher,
Knackfuss, Caspar et Von Helder,
Même par Peltz, chu sale p'tit mâtîn
Tchi n'avait pas l'esprit d'un bannetîn.

Nos bouais et bouaîs'sies fûtent abattus,
Car dé tchèrbon y'en avait pus.
Si y'en v'nait d'France ch'tait pas des tas
Et ch'tait d'la saleté tchi n'brûlait pas.

Dé nos belles fèrmes y'en eut d'ruinnées,
Nos maîsons abattues et brûlées.
Des tranchies d'creusées dans les clios,
Ch'tait assez pour vos touônner fos.

Nos gâzettes 'tait plieinnes dé menneties
D'pis les Lundis jusqu'ès Sanm'dis;
Tchi honte pouor l'Post et la Chronique
Tch'avaient tréjous 'té si véridiques.

Pouor travailli sus forts et fortificâtions,
Y'en eut d'am'nés de toutes les nâtions:
Espangnos, Belges, Russes et Polonnais,
Algériens, Hollandais et Français.

Nos radios fûtent confistchis,
Mais y'en eut des chentaines dé muchis,
Et quand l's anmîns s'ent'-rencontraient
Né v'chîn tch'est qu'i' s'ent'-disaient:

"Y'a-t-i' des nouvelles à matîn?"
Oui, Stalîngrad est prîns par Stalîn,
Tripoli est prîns par l's Angliais,
L's Améthitchains capuchent les Japonnais.

L'Italie d'mande eune Armistice,
I' pâlent dé grandes êmeutes en Autriche,
Mille avions sus l'haut d'Colongne,
Les Russes sont entrés en Polongne.

Y'en avaient tch'oubliaient qu'i' 'taient Jèrriais
Et auvec l'enn'mîn lus associaient,
Nou-s'en trouve parmi grands et p'tits
Et même parmi la pus haute lîngnie.

Les nouvelles dé pus en pus nos rêjouissaient:
Les Russes entraient en Roumannie,
En Italie, Rome prîns par l's Angliais,
Le préchain matîn, l'învâsion en Nouormandie.

Les Alliés allaient d'succès en succès:
Bayeux, Chèrbourg, Avranches et Falaise,
Rennes, St. Mâlo, Lé Mans, Paris et Calais,
Nou s'ent'-disaient: la fîn est près.

Mais fallut acouo pâsser l'pus dû Hivé,
Le gas dépis tchiques mais avait mantchi,
D'êlectricité y'en eut pus du mais d'Janvyi,
Dé tchèrbon fallait bein s'en pâsser.

Le pain vînt presque à nos mantchi,
Mais un jour lé Vega nos arrivit
Auvec des patchets, dé viande, bistchuits et chocolat,
D'la Nouvelle Zélande et du Cannada.

Les Allemands bétôt lus rendaient partout:
En Italie, Hollande, Dannemar et siez ieux
Et d'vant bein des jours ch'fut notre tou
D'itelles rêjouissances nou n'avait janmais veu.

Nou n'viyait pus lé vèrt du Nazi,
Mais partout notre bouôn vièr khaki,
Et l'Swastika nou n'lé viyait pas,
Car notre vièr pavillon 'tait au haut du mât.