 Lé Creux du Vis
|
Lé 15 d'août, 1970
Moussieu l'Rédacteu,
Lé Creux du Vis, appelé Lé Creux d'la Touothaille dans les touos vièrs temps viyant tch'il est dans l'fond d'eune crévasse faite comme un vis ou eune touothaille, m'a tréjous întérêssi viyant qu'la preunmiéthe estatue du dgiâbl'ye, en bouais, avait 'té en partie faite par man grand-péthe matèrnel, lé Cap'taine Jean Philippe Giffard, tch'était stchulpteux, dans l'temps tch'i' d'meuthait au bas du Mont d'Ste. Mathie dans La Vallée d'S. Pièrre.
Dé nouos jours, les vièrs noms dispathaissent à grands pas, et j'pense bein tch'i' y'a même un tas d'Jèrriais à ch't heu tchi n'ont janmais ouï L'Creux du Vis appelé autchun aut' nom qué L'Creux au Dgiâbl'ye. Et pourtant, Moussieu Philip Ahyi, M.A., B.Sc., F.R.S.A., li donnit san vraie nom dans s'n histouaithe du naufrage du cotteu La Joséphine dans san livre "Stories of Jersey Seas, of Jersey's Coast and of Jersey Seamen" et i' m'a donné pèrmission d'la raconter en Jèrriais.
Lé cotteur La Joséphine fit caile dé Chèrbourg pour St. Mâlo auve eune cartchaison d'huile dé colze. Lé cap'taine avait nom Nédélec. I' n'est pon dit quantchi tch'i' tchittit Chèrbourg, mais lé 25 d'octobre, 1851, i' fut naufragi sus la côte du nord dé Jèrri - au bas d'la falaise où'est tch'est L'Creux d'la Congre.
I' pathait qu'au moment du naufrage pèrsonne à bord du navithe n'avaient autcheune idée tch'il' 'taient si près d'tèrre. Dans l'arlévée, lé cap'taien avait rondi Sèr et gouvèrne pour Jèrri, mais i' n'connaissait pon les couothants et, la niet v'nue, la mathée avait drivé l'cotteur hors dé sa course. I' faisait néthe niet quand i' s'êchouit sus l'rotchi, et l'êtchipe dé chînq hoummes sé cramponnîdrent ès agrès du mât en attendant la sinnette du jour, mais l'vent sé l'vit et la mé s'enrudit tant tch'i' s'attendaient d'êt' fliantchis d'dans en autcheun moment, quand l'contrémaître, Constant Pétibon (fis des bourgeais), s'dêcidit d'nouer à tèrre. Arrivé - nou peut dithe par un mithacl'ye dans chutte mé-là - au pid d'la falaise, oulle 'tait si d'à pic tch'i' n'put pon attèrri, et i' pèrdit la vie en êprouvant.
L's aut' mênagîdrent à lus garder à fliot sus un rotchi à côte du navithe naufragi qu'la mé n'couvrait pon, et Maît' Jean Richardson d'Ste. Mathie l's appèrchut là l'lendemain au matîn. I' r'touannit dêliément siez li lus ramâsser d'tchi mangi et trouver d'l'aîgue. Auve des longs filîns i' rêussîdrent à lus passer à baithe et à mangi. La mé 'tait basse par chu temps-là et i' s'adonnait qué l'Sieur Nicolas Èrthu sé trouvit au bas d'la falaise, et, auve l'aîgue dé tchiques aut' pèrsonnes, il am'nit les quatres naufragis à tèrre et lus donnit touos les soins nécessaithes pour les ravigoter.
 L'vièr dgiâbl'ye au Creux du Vis
|
En temps et lieu i' s'en r'fûdrent en France, et l'gouvèrnément Français, par l'entrémînse dé san Minnistre pour la Marine et Les Colonies, présentit eune médale d'argent et un cèrtificat d'èrconnaissance à châtchun des Mêssieux Richardson et Èrthu pour les aver s'couothis et aver souangni si bein d'ieux.
Maît' Jean richardson fut né lé 20 d'août, 1820, et mouothit lé 25 dé mar, 1901, à l'âge dé 81. Il 'tait Chentn'yi d'Ste. Mathie.
Moussieu Nicolas Èrthu fut Connêtabl'ye d'Ste Mathie dé 1852 à 1865 et dé 1874 à 1887 - eune affaithe dé 27 ans - et mouothit en 1889 à l'âge dé 70 ans.
I' n'y eut pon fort dé débris du naufrage tchi vînt à tèrre, mais la poupette du navithe fiut trouvée. Oulle 'tait v'nue à fliot l'travèrs du creux au bas du vis, et i' pathait qu'oulle avait eune èrsembliance au Satan, et tchitch'un eut l'idée d'aver man Papa Giffard à v'nîn la vaie. I' fallait tch'i' fûsse dé la même idée au sujet d'la r'sembliance au dgiâbl'ye, car il emmenit la poupette siez-li et li mint des bras et des gambes et un pid fourtchi, et des cornes et eune coue auve eune èrchelle au but, et né v'là un vraie dgiâbl'ye en bouais prêt à faithe la garde dans L'Creux du Vis, et j'pense bein qué v'là tchi fit les gens l'appeler L'Creux au Dgiâbl'ye viyant tch'i' l'viyaient là!
Malheutheusement, j'n'avais qu'à peine treize mais quand Papa Giffard mouothit lé 24 d'octobre, 1892, et jé n'l'ai don pon connu, mais Papa et Manman L'Feuvre m'ont souvent dit quand j'tais mousse tch'il' avaient veu l'dgiâbl'ye dans s'n appentis dans La Vallée d'St. Pièrre dans l'temps tch'il 'tait à li mettre les bras et aut' membres en pliaiche. Il 'tait un supèrbe stchulpteux. Ch'tait li étout, tch'avait stchulpté l's êmânues et décorâtions ès Caves dé Champion à La Crouaix d'Bouais aut'fais, et l's armueûthies d'Angliétèrre, acouo en plieine veue au haut d'la côtchiéthe dé la maîson prîncipale dans l'bel dé La Prison. J'mé d'mande s'i' s'en vont l'abattre quand la neuve prison s'sa ouvèrte à La Mouaie à St. Brélade. Si oui, j'ai envie dé d'mander à Moussieu l'Vicomte dé m'donner la pliaque pour la présèrver et la mett' dans l'bel du Mênage à sèrvi d'monûment à la mémouaithe dé Papa Giffard!
George d'la Forge
Viyiz: