'Ch'es qutu crais,' me d'mandit l'Ph'lip Desclios l'aut' sé 'de chu propos qu'a 'tait fait dans l's Etats de nos dêfaithe des Counnêtablyes'?
'Ch'est dêtruithe la counstitiutoun d'Jèrri,' j'lis dis. 'Ch'est justement ch'là que certains gens veullent: i'n craient pas qu'Jèrri devrait être indépentant, et voudraient que j'fûmes gouvernés coumme eune régioun d'Anglièterre'.
'J'sis tout à fait de t'n opinioun et t'n avis' s'fit l'Ph'lip, 'mais y a des gens qui n'sount pas countre les Counnêtablyes, mais qui disent qu'i n'devraient pas être dans l's Etats. Tchi qu'tu pense la d'sus'?
'Les Counnêtablyes', j'lis dis, 'ount deux services à faithe. Eun est d'soignyi d'lus pâraisse, et l'autre est d'la réprésenter dans l's Etats. Ches deux services sount nécessaithes, et nou n'peut en faithe ieun coumme i' faut sans faithe l'autre. Car les pâraisses fount partie d'l'île et d'son gouvernément, et chest dans l's'Etats que Jèrri est gouverné'.
'Et si nou's'dêfaisait des Counnêtablyes tchi nou' mettrait dans lus pliaiche? Eun Coummité ou eun founctiounnaithe payi? Nânnin, mon Ph'lip, che s'rait la fin de not'systeme honorific, qui nos a servi si bein et si loungtemps. Enfin j's'rait la fin d'Jèrri coumme nou'l'counnais et d'tout d'chi que j'soummes tellement fièrs. Me, j'dis à touas ches êtrangiers qui veullent changi Jèrri: 'Allez marchander vos idées en Anglièterre ou tchiqu'bord d'autre, mais laissez nous Jèrriais en r'pos'.
'La vie d'eun counnêtablye n'est pas tréjous pliaisante. Quand les pârouaissiens ount tchique chose qui les gêne il'aiment mus aller en pâler discrètement au Counnêtablye que d'aller porter pliainte à la police, à lus houmme d'affaithe ou même d'en pâler au Recteu. Le Counnêtablye est vraiement le pèthe de la pâraisse. Nou' va a li s'nou manque de sou pour se nouarri, pour acater les nécessaithes d'la vie, de lief ou qu'nou n'est pus capablye de soignyi d'sé même, et il arrange tout.
'Eun bouan Counnêtablye dait aver étout eune femme qu y'aide. Dans l'vièr temps y'avait bein des Counnêtablyes qui n'taient pas mariés ou qui 'taient veuvièrs. Me, j'em rappelle de deux, le sieur Frainque Jeune et l'bounhoumme Ph'lip Cabot, touas les deux veuvièrs. Mais dans chu temps-là v'la tchi n' faisait d'rein, car les femmes en 'taient pas supposées de s'mêler d'politiques, même ch'était 'té scandaleux s'oulles avaient éprouvé. Après tout, n'ya pas si loungtemps qu'oulles ount le droit d'vouaix. Mais achteu tout ch'là a changi. J'avouns même des femmes Counnêtablyes, et p'têtre que ch'là pas si loungtemps devant j'éyouns eunne femme Baillyi.
'Mais, que ch'sait hoummes ou femmes, i' nos faut des Counnétablyes. Je n'pourraimes pas être sans.'
Viyiz étout: