Pouor vos dithe la vérithèt, si vous n'avez pas veu mes dithes dans la gazette d'pis tchiques mais ch'est viyant que deux ou trais fais d'suite l'boss erfusi de publier des p'tites scènes qui s'passites dans différentes paraisses.
Et couomme j'ly d'mandais pouortchi qui s'montrait achteu si épineux y m'réponnit qu'il n'voulait pon publier dithèt gnollin qui n'faisait qu'encouoragi une djingue de jeunes corps à faithe un tas de sales tricks, rein que pouor en vais mettre un but sus la gazette!!
J'pensis en mé même d'pis que ch'est de même eh! bein l'boss peut aller s'faithe quatorze et ch'n'est pon mé qui s'en va aller ès écoutes, au risque de m'faithe tithèt, pouor l'y remplyi une colonne de sa gazette ou envièthe mes écrits dans chu pagni qu'il a oprès d'san desk et qui un jour ou l'autre mettra l'feu à la boutique car il n'est pas ergardant et oprès avèr satchi une allumette pouor allumer sa cigarette, qu'il a tréjous à la becque, ch'est l'but d'la cigarette fumée et l'allumette qu'il envie dans chu pagni!
Mais l'autre Samedi, en viyant chein que l'Sieur Caouain avait mins dans la gazette à l'entouor des biaux pyjamas que j'avais acaté sièz Johnnie Vibert, j'pensis que d'pis que ch'tait d'même qu'nous faisait une riselée de mé, je raconterai pourtchi que j'avais acaté chein qui rendi l'Caouain comme un fô!
Dans chein que chu peule vos raconti il y avait un p'tit de vérithèt, pas touote la vérithèt et beaucoup qui n'tait pon d'la vérithèt en touot!
Ch'tait vers l'mitan d'la saison des patates. J'tais couochie dans notre mansarde mais pas moyen d'fermer l'yi viyant le tintamarre des cats dans d'heurler couomme des mousses à tchi nous fait du mâ.
J'entendis l'Sieur Caouain monter bein douochement les degrés d'notre mansarde et n'v'la qui m'parut un miot suspect. Je m'fit mine d'rein sinon que d'ly faithe acraithe que j'ronfliais mais je l'guetti. Y déshalli de dessous sa casaque un p'tit ballot qu'il alla mucchi dans ieunne carre d'la bouaite à oranges qui nous sert de wardrobe. Il halli ses cauches que couomme de coutume y mins à sètchi sus l'but de wire qui fut mins en d'hors d'l'ôzaine d'notre mansarde car y faut que j'vos dise qu'il y a deux ou trais ans Moussieu l'Inspecteur sanitaire vint sièz nous pouor saver tchès qu'était la cause que ch'la sentait la pouaison et viyant qu'il n'découvri rein pouor explitchi chunna y prétendit que ch'tait les vieilles cauches au Sieur Caouain qui sentaient d'même!!
Oprès avèr mins son chapé sus le ballot dans la carre d'notre wardrobe, l'Sieur Caouain s'couochi et bétot y fut, couomme nous dit en français de France, dans l'royaume des rêves.
J'pensi n'v'la ma chance pouor en savèr un p'tit pus long au sujet de chu ballot qu'il a si bein mucchi et bé vite j'fut horte de lièt et j'apprins chein que ch'tait... et qui n'est pon d'vos affaithes pour quand achteu.
N'v'la qui m'rumini dans la cervelle touote la nièth et au matin j'pensi que j'en saurais un p'tit pus long.
Donc quand l'Sieur Caouain s'fut réveilli, nous parlimes du biau temps, d'la saison des patates et autres choses d'même.
Quand vint l'temps d'aller à l'office, l'Sieur Caouain s'n'alli au wardrobe ou à l'armoithe, couomme y vos plaira d'appeler chutte boîte à oranges. Ch'tait pouor prendre son chapé mais chein que Marie avait tchatchulé s'arrivi et l'ballot rouolli à terre!
N'v'la notre Sieur Caouain bein! embarrassi quant j'ly d'mandi tchès qu'éthait chu ballot là que j'n'avais jamais vu d'vant! Y sauti dessus et s'fit: Ch'est un overall que l'boss ma fait présent. Vais tu Marie, avec la nouvelle louaie sus la taxation du rât, les Connétables sont bein en retard avec lus listes de rât et à l'office j'sommes si embarrassés que l'huileux des machines n'a pon l'temps de netti. Et ch'est de l'encre un miot partout.
"Vèr, que j'ly dis, j'sais bein qui sont fort enbarrassis à l'office à l'entouor des listes du rât, d'pis que v'la quassiment trais s'maines que du m'dis que ch'est pouor chunna que tu n'peux pon être de r'touor fort d'vant minièth. Mais tchès que touot chunna a affaithe avec ton overall.
Eh bein, ch'est couomme chunna. Tu sais bein qu'il y a tchicque temps j'avais acaté une belle neuve qu'minse à buan marchi. L'autre sé, en lus aidant à l'office, n'v'la ty pas que j'eut l'malheur de m'approchi un petit trop près d'iun des rouliaux à encre et ch'fut une grande dab d'encre en pliain au mitan de ma belle qu'minse. L'boss s'adonni à arriver sus l'moment que j'tais à éprouver d'enlever l'encre avec d'la paraffine et y m'd'mandi si j'criyais qu'il allait m'payi à passer mon temps d'même. J'ly réponni que v'la qui n'tait pon d'ma faute en touot et qui f'rait p't'-être mus d'me payi une nouvelle qu'minse.
Pouor encouore en faithe autant, qui s'fit, mais pouortchi m'prends tu pouorre bête. Avec un oisé couomme té ch'est un overall qui t'faut. Et d'pis que ch'est d'même, vas de ma part au “Vièrr Soudard” ou à “La Belle Jardinière,” et dit leur qu'il t'en fournisse ieun des milleurs marché possible sus l'compte de La Chronique.
Je n'fit mine de rein mais j'pensi en mé même, pouor un menteur l'Sieur Caouain est un raide buan menteur qui pouor seur aurait l'prumi prix à l'Eisteddfod s'il y avait un concours à tchi mentira l'pus car j'savais bein que ch'n'tait pon un overall qu'il y avait dans chu ballot puisque ch'tait... chein que j'vos dirai Samedi tchi veint et qui vos expliquera pouortchi j'alli acater des pyjamas!!
Marie Hibou
1930
Viyiz étout: