Donc pouor vos continuer chutte histouèthe à l'entouor de mes pyjamas, y faut que j'vos dise annièth chein qu'il y avait dans chu ballot que l'Sieur Caouain criyait aver mucchi dans notre armouaithe ou wardrobe.
Ch'tait une pathe d'braies en flanelle couomme les visiteurs ont et qu'nous peut acater pouor une pièche d'échu ou un p'tit pus dans n'importe quelle boutique d'la ville.
P't'être bein que vous allez dithe que n'v'la qui n'vous intéresse pon en touot. J'pense que nennin mais pouor mé n'v'la qu'est un miot différent, non pon que j'sis un miot jalouse de chu triste oisé qu'est l'Sieur Caouain mais viyant qu'oprès touot j'ai drouait au p'tit qui gagne à l'office et que j'n'vais pon pouor tchi que d'autres que mé en profiterait.
Donc, pour seur, dithèt blianche braies n'taient pon pouor aller à son travas à l'office mais est ce que cela n'explitchait pon pouortchi que d'pis deux ou trais s'maines y n'tait pon d'r'touor à notre mansarde fort avant minièth.
Et dame couomme deux et deux font quatre, j'pensi n'v'la pouortchi éttouot qu'il y a tchiques s'maines il acati un pullover que les anglais appelent un blaizer ou tchique chose d'même pour deux trais chelins, à chein qui m'dit et éttouot une qu'minse sans collet ni d'jingue.
Ch'tait viyant que l'boss ly avait dit qu'il fallait qu'il paraisse un p'tit pus smart pouor être dans la boutique, à chein qui m'dit et viyant qu'un oisé couomme ly, qui faisait parlé d'ly par ses d'vis dans touot Jerri, devait montrer à touos les siens qui lisent son gnollin qu'il tait un smart corps.
Autant de dit et autant de menteries, fouai de Marie Hibou. Mais tchi faithe?
J'apprins bé vite touot chein que chunna voulait dithe et pouor seur si l'Sieur Caouain était fort embarrassi jusqu'à des minièth, ch'tait pon à l'office mais ailleurs!
Quand j'tais Marie Hibou touot court et que de Missis Caouain j'n'pensais guère porter l'nom que j'n'aurais jamais porté si j'avais seu, j'avais lu dans la littérature d'une vieille gazette un trick qui fut joué par une pouorre jeune hardelle qui s'trouvait dans la même position qu'mé. Et chu trick consistait à faithe ou sembliant d'faithe la même chose à celui que vous l'faisait.
N'v'la des dithes qui vous paraissent p't'être un miot dans la bliaze et tchi sait si vous n'en êtes pon à vos d'mander si ch'est que j'ai la berlue. Que nennin et vous allais vais.
Ch'est chunna qui m'décidi à acater deux ou trais verges de cretonne à buan compte et à buan marchi viyant que ch'tait d'la cretonne qui avait été abimée par aver été exposée au soleil dans la vitrine d'un marchand de la ville qu'est un miot de ma parenté.
Couomme vos l'dit Caouain ch'tait tchique chose de smart par ses couleurs.
Donc une séthée, sus la lièt j'étendis l'p'tit veston et la pathe de braies de touotes les couleurs de l'arc en ciel un p'tit d'vant l'arrivée du Sieur Caouain pouor l'thée que j'ly avais prépathé oprès ly avoit dit, chein qu'était une menterie, que Moussieu l'Recteu était v'nu me vais pouor que j'aille à un meeting pouor l'bézaar et que p't'être bein j'n's'rais pon de r'touor pouor l'heuthe du thée.
Quand j'rentri, l'Sieur Caouain était couomme un satan car y voulait saver tchès que chunna voulait dithe. Et mé j'ly d'mandi tchès que ses blianches braies voulaient dithe sinon que ch'tait pouor faithe d's'embarras et faithe à craithe ès visiteuses qu'ly éttouot était visiteu en viage dans l'Ile.
Et ch'est qu'il en eut pouor ses quatre souos et fut touot surprins quand j'l'dis iout qu'il avait passé la séthée de d'vant et que pouor seur ch'n'tait pon à l'office à folder les listes du râ!
N'v'la qui ly montre que j'en savais un p'tit d'trop mais savous chein qu'il eut l'affront de m'dithe? Et bein, Marie, d'pis que ch'est d'même, j'vais te dithe la vérithèt. J'avais dans l'idée de te faithe plaisi et une surprinse pouor ton birth-day. J'sais bein que tu aimes être à la mode et j'acathi chutte pathe de blianche braies d'un visiteur qui s'en r'tournait dans son pays. J'avais dans l'idée de d'mander à une couthutièthe d'en faithe une pathe de shorts que j't'aurais fait présent pouor aller t'bagner au solé au mais d'Août, couomme font touotes les grandes dames.
- Et ch'est pouor chunna que tu les mettais touos les sèrs té même.
- J'pensais d'en profiter pendant tchiques s'maines d'vant d'les douonner à la coututhièthe pouor les arrangis pouor té!
- Autant d'menteries Moussieu Caouain, autant d'menteries.
- Mais et té tchès que tu allais faithe avec ch'est pyjamas.
- Pouor bête, crais tu que j'ai acaté dithèt pouor m'habilyer couomme touotes ch'est drinèthes qui n'voudraient pas s'habiller d'même dans lus pays.
Et pouor vos dithe la vérithèt ch'tait qu'un make up car chutte cretonne j'm'en servi pouor faithe des ridiaux!!
Marie Hibou
1930
Viyiz étout: