Le Ménage ès Feuvres,
St. Ouën
Lé 9 d'août, 1980
Moussieu l'Rédacteu,
Nou vait d'drôles dé choses dans la gâzette ches jours. Par exempl'ye, eune chose bein amusante est qu'cèrtaines pèrsonnes sont offensées viyant tch'il' ont veu des femmes sus les grèves auve rein sus l'co en d'ssus d'la taille. Ch'est assez r'mèrtchabl'ye qué pèrsonne né s'est offensé d'vaie un homme souos les mêmes circonstances. Quant à mé, j'en ai veu d'toutes les sortes dans ma longue vie, et j'ai veu des femmes habilyies (ou d's'habilyies?) d'même en Afrique et ailleurs, et j'peux dithe qué j'n'ai pon trouvé ch'la offensif. À m'n idée, tout ch'tch'est naturel est bé à vaie. Mais ch'est assez drôle qué j'n'en ai pon veu sus nos grèves.
Ch'est întérêssant dé sé ramémouaither d'un tas d'choses quand nou-s-a vêtchu si longtemps comme mé. J'ai r'mèrtchi l'habilement des femmes avaû l's années, et ch'est r'mèrtchabl'ye qué lus faichon dé s'habilyi a changi bein des fais. Quand j'tais mousse, eune femme s'habilyait comme eune femme - des bouans forts souliers en tchui auve des talons d'hauteu respectabl'ye, et solides, et des cauches dé laine sus les pids.
Lé vêtement dé d'ssous, à femme, dé tchi nou n'mentionne pon l'nom mais tch'a rempliaichi l'drapé qu'nou met ès êfants, 'tait fait d'bouân fort coton et avait deux gambes tchi d'valaient jusqu'au g'nou ou en d'ssous, auve du brodage ou d'la dentelle au bas. À ch't heu, chu vêtement n'a pus d'gambes et est si p'tit qu'nou peut l'patchi p'tit assez pour lé mett' dans sa pouchette comme un mouoché.
Les femmes mettaient des cotillons, et lus robes trainaient quâsi à tèrre. Tchiquefais les cotillons avaient eune belle pétite dentelle au bas étout. Quand i' prannaient eune pouangnie d'robe et cotillons au côté, à bein près à hauteu du g'nou, pour les l'ver jusqu'au d'ssus d'la g'vil'ye du pid pour les empêchi d'trainer dans la route ou dans l'pité quand il avait tchaie d'la plyie, nou viyait d'la dentelle et du brodage. Ch'tait assez pour faithe un homme frémi! Et quand eune femme l'vait robe et cotillons jusqu'au g'nou pour monter dans l'quèrre ou dans la vainne, nou viyait assez d'dentelle pour faithe un homme s'êvanni, car nou peut dithe qué dans chu temps-là tout ch'qu'un homme viyait d'sa janne fille dévant la mathier tchi n'tait pon couvèrt d'habits 'tait sa fache et ses mains. À ch't heu, nou vait tant d'gambes et d'dgéthets qué nou n'y prend pon d'avis.
Quand v'nait l'hivé, les femmes sé gardaient caudes atout des cotillons d'rouoge fliannet, et eune capote lus gardait l'co et la tête caude lé tou d'la maîson et dans l'bel et pour aller dans l'vaîsinné ou boutitchi.
Les cotillons c'menchîdrent à dispathaître auprès la preunmié grand' dgèrre et les robes d'vîndrent un p'tit pus courtes, mais bein êtraites, et les femmes 'taient oblyigies dé racourchi lus pas. V'là tchi duthit eune volée, et i' m'sembl'ye qué tant pus êtraites qué les femmes pûssent gabather atout, tant pus il' 'taient à la mode.
Et pîs l'temps vînt qué les cotillons dispathûdrent tout à fait et qu'les robes 'taient si courtes tch'i' couvraient à peine la partie du corps qué nou s'assied d'ssus. Ch'tait supèrbe à vaie quand les gambes 'taient jannes et bein faites. Quand l's anciennes 'taient à la mode v'là tchi pathaîssait riditchule. J'pense qué les conmèrçants tchi fîdrent lé pus d'sou duthant l'êpoque dé la courte robe 'taient les boutiques à leunettes, car touos l's hommes tch'avaient la veue faibl'ye ou tch'i' viyaient d'près acataient d'neuves leunettes!
La courte robe, à m'n idée, s'en allait êt' à la mode pour tréjous, tellement qu'oulle 'tait populaithe et admithée par les hommes, mais, nannîn, i' faut qu'tchitch'un mett' tréjous un bâton dans les reues, et né v'là-t-i' pon qu'ou dispathut et fut rempliaichie par eune laie et large robe couvrant les gambes jusqu'au d'ssous du g'nou, et souvent chutte robe 'tait faite dé vèrt dgêne. L's Améthitchains appellent ch'la du "denim". Les leunettes d'hommes ont duthé bein pus longtemps dépis l'abandon dé la courte robe!
À ch't heu i' sont à garder la robe longue, mais il' y mettent eune ouvèrtuthe dédans pour qué nou piêsse vaie d'la gambe. V'là tchi s'en va êt' profitabl'ye pour les boutiques à leunettes. Mais en général, hommes et femmes sont en braies et ont les j'veux longs, et ch'n'est pon aîsi d'dithe tch'est fille ou garçon, et lé vèrt dgêne est dév'nu aussi populaithe comme il est laid. Et si les femmes prannent l'habitude dé lus montrer sus les grèves habilyies seulement jusqu'à la taille, les grèves es'sont beintôt pus populaithes qué la Batâle dé Flieurs!
George d'La Forge
Viyiz étout: