Y'a chent ans en mille neu chents dgix, la p'tite maîson dans la Grand' Rue fut bâtie. Achteu ch'est un café. L'année pâssée l'Assembliée d'Pâraisse avait accordé en prîncipe la r'êcalopp'sie d'la p'tite maîson d'La Banque et l'café vaîthîn. Vot' meunicipalité et l's Êtats lus entré-hèrtchîngnent acouo entouor les p'tites maîsons en Ville. Ch'est en tchi toute l'Île les fait sèrvi mais ch'est les contribuabl'yes dé Saint Hélyi tchi paient pouor.
1910 'tait étout l'année des deux conmètes. La Grande Conmète dé Janvyi 'tait la pus cliaithe dé tout l'vîngtchième siècl'ye, épis la Conmète à Halley r'vînt coumme ch'tait préveu au mais d'Mai. Nou bliaûmait même la conmète pouor les hardelles tchi lus gaûbèrgeaient en Ville sus des patîns à rouôlettes.
Mais sav'-ous tch'est qu'nou veurt dithe quand nou va vaie la conmète? Assa, quand les p'tites maîsons n'taient pon des palais sannitaithes modèrnes coumme au jour d'aniet, nou-s'allait au bas du gardîn. "J'm'en vais aller vaie la conmète," qué nou dit.
J'avons-t-i' avanchi d'pis ches temps-là! Et j'avanch'chons acouo dans La Banque.
Geraint Jennings
2010
Viyiz étout: